టీవీల్లోకి వస్తున్న ఉప్పెన హీరోయిన్ కొత్త సినిమా
ఉప్పెన హీరోయిన్ కృతిశెట్టికి ఈ మధ్య కాలంలో సరైన హిట్ పడలేదు. ఉప్పెన తర్వాత శ్యామ్ సింగరాయ్, బంగార్రాజు మినహా మిగతా చిత్రాలన్నీ డిజాస్టర్ గా నిలిచాయి. ఆ డిజాస్టర్లలో "ఆ అమ్మాయి గురించి మీకు చెప్పాలి" అనే చిత్రం కూడా ఉంది. సుధీర్ బాబు హీరోగా నటించిన ఈ చిత్రానికి ఇంద్రగంటి మోహన కృష్ణ దర్శకత్వం వహించారు. క్లాస్ గా ఉన్న సినిమా టైటిల్, జనాలను ఆకర్షించింది గానీ, సినిమా మాత్రం వినోదం అందించలేకపోయింది. 2022 సెప్టెంబర్ 16వ తేదీన విడుదలైన ఈ సినిమా, ప్రేక్షకులను పెద్దగా ఆకట్టుకోలేక పోయింది. మోహనకృష్ణ గత సినిమా, సమ్మోహనంలోని అంశాలు ఈ సినిమాలోనూ కనిపించడం, సినిమా స్లోగా ఉండడంతో కలెక్షన్ల మీద ప్రభావం పడింది.
థియేటర్లో ఆడని సినిమా టీవీల్లో ప్రభావం చూపిస్తుందా?
సుధీర్ బాబు, ఇంద్రగంటి మోహనకృష్ణ కాంబినేషన్లో వచ్చిన మూడవ సినిమా ఇది. సమ్మోహనం, వి తర్వాత ఆ అమ్మాయి గురించి మీకు చెప్పాలి అంటూ ప్రేక్షకుల ముందుకు వచ్చి అపజయాన్ని మూటగట్టుకున్నారు. ఈ చిత్రం జనవరి 29వ తేదీన మద్యాహ్నం 12గంటలకు జెమినీ టీవీలో ప్రసారం అవనుంది. థియేటర్లలో పెద్దగా ఆకట్టుకోని ఈ సినిమా, టీవీలో ఎలాంటి రేటింగ్స్ తెచ్చుకుంటుందో చూడాలి. ఇదిలా ఉంటే, సుధీర్ బాబు నటించిన కొత్త సినిమా "హంట్", రిపబ్లిక్ డే సందర్భంగా జనవరి 26వ తేదీన విడుదవుతోంది. ఇక కృతిశెట్టి విషయానికి వస్తే, నాగచైతన్య సరసన కస్టడీ సినిమాలో నటిస్తోంది. అలాగే తమిళ దర్శకుడు బాల దర్శకత్వంలో "వానన్ అన్" అనే సినిమాలో సూర్య సరసన కనిపించనుంది.
