ధమాకా తో వందకోట్లు కొల్లగొట్టిన రవితేజ నెగెటివ్ రోల్స్ చేయబోతున్నాడా?
మాస్ మహరాజ్ రవితేజ, డీజేటిల్లు హీరో సిద్ధు జొన్నలగడ్డ తో కలిసి వెండితెరను పంచుకోనునున్నట్లు తెలుస్తోంది. ఈ మల్టీస్టారర్ కూడా ఓ రీమేక్ కోసమని సమాచారం. తమిళంలో విజయం అందుకున్న మానాడు సినిమాను తెలుగులో రీమేక్ చేయాలని అనుకుంటున్నారట. మానాడు సినిమాలో హీరోగా శింబు, విలన్ గా ఎస్ జె సూర్య కనిపించారు. ప్రస్తుతం ఎస్ జే సూర్య పాత్రను తెలుగులో రవితేజ చేస్తాడని అంటున్నారు. కాకపోతే ఈ పాత్రకు నెగెటివి షేడ్స్ ఉంటాయి. హీరోని ఎదిరించే పాత్ర అది. ప్రస్తుతం రవితేజ ఖాతాలో వరుసగా వందకోట్ల సినిమాలు ధమాకా, వాల్తేరు వీరయ్య ఉన్నాయి. అందుకే ఈ టైమ్ లో నెగెటివ్ పాత్రల్లో కనిపించడం కరెక్ట్ కాదని రవితేజ అనుకుంటున్నట్లు చెబుతున్నారు.
కథలో మార్పులు చేయమని రవితేజ చెప్పినట్లు వార్తలు
నెగెటివ్ పాత్రలో కాకుండా హీరోగా శింబు పాత్రలో రవితేజ చేస్తే, ఎస్ జే సూర్య పాత్రకు సిద్ధు జొన్నలగడ్డకు సెట్ కాడని చిత్రబృందం ఆలోచిస్తుందట. అందుకే, కథలో మార్పులు చేయమని రవితేజ సూచించినట్లు సోషల్ మీడియాలో వార్తలు వస్తున్నాయి. ఎస్ జే సూర్య పాత్రను పూర్తి నెగెటివ్ గా చూపించకుండా ఉండాలని రచయితల బృందం పనిచేస్తుందని సమాచారం. మానాడు సినిమాలో కాలంలో చిక్కుకుపోవడం అనే కాన్సెప్ట్ ఉంటుంది. ఎస్ జే సూర్య పోలీస్ ఆఫీసర్ పాత్రలో కనిపిస్తారు. ఈ సినిమాను తెలుగులో రీమేక్ చేస్తే బాగానే ఉంటుందనే వాళ్ళు కొందరైతే, ఓటీటీల ద్వారా బయటకు వచ్చేసాక రీమేక్ చేయడం అంత మంచిది కాదని మరికొందరు అంటున్నారు.
