Salim Khan: బాలీవుడ్లో టెన్షన్.. సల్మాన్ ఖాన్ తండ్రికి ఐసీయూలో చికిత్స
ఈ వార్తాకథనం ఏంటి
బాలీవుడ్ నటుడు సల్మాన్ ఖాన్ తండ్రి, ప్రముఖ కథారచయిత సలీమ్ ఖాన్ ముంబైలోని లీలావతి హాస్పిటల్లో చేరారు. ఈ వార్త బయటకు రావడంతో అభిమానుల్లో ఆందోళన నెలకొంది. ఆయన ఆరోగ్యం త్వరగా కోలుకోవాలని పలువురు ప్రార్థిస్తున్నారు. అయితే, సలీం ఖాన్ ఆరోగ్య పరిస్థితిపై ఇప్పటివరకు ఎలాంటి అధికారిక ప్రకటన విడుదల కాలేదు. ఖాన్ కుటుంబ సభ్యులు కూడా ఈ విషయంపై మౌనం పాటిస్తున్నారు.
Details
తండ్రిని కలిసేందుకు ఆసుపత్రికి చేరుకున్న సల్మాన్
సలీం ఖాన్ ఆసుపత్రిలో చేరినట్లు తెలిసిన వెంటనే ఖాన్ కుటుంబం ఆందోళనకు గురైంది. సమాచారం అందుకున్న వెంటనే సల్మాన్ ఖాన్ లీలావతి ఆసుపత్రికి వెళ్లారు. ఆయన ఆసుపత్రికి చేరుకున్న వీడియోలు, ఫోటోలు ప్రస్తుతం సోషల్ మీడియాలో వైరల్ అవుతున్నాయి. ఆ చిత్రాల్లో సల్మాన్ ముఖంలో బాధ, ఆందోళన స్పష్టంగా కనిపించింది. అలాగే కుమార్తె అల్విరా ఖాన్ కూడా తన తండ్రిని కలిసేందుకు ఆసుపత్రికి వెళ్లారు. అర్పిత మరియు ఆమె భర్త ఆయుష్ శర్మ కూడా అక్కడికి చేరుకున్నట్లు ఫోటోలు సూచిస్తున్నాయి. అయితే, సలీం ఖాన్ సాధారణ ఆరోగ్య పరీక్షల కోసమే ఆసుపత్రికి వెళ్లారా లేదా ఏదైనా తీవ్రమైన సమస్య కారణంగా చేరారా అనే విషయంపై ఇప్పటివరకు కుటుంబ సభ్యులు స్పష్టత ఇవ్వలేదు.
Details
సలీం ఖాన్ గురించి
సలీం ఖాన్ బాలీవుడ్లో దిగ్గజ రచయితల్లో ఒకరిగా గుర్తింపు పొందారు. సినీ ప్రయాణాన్ని మొదట నటుడిగా ప్రారంభించిన ఆయన, తర్వాత కథా రచయితగా విశేష ఖ్యాతి గడించారు. ప్రముఖ రచయిత జావేద్ అక్తర్తో కలిసి 'జంజీర్', 'షోలే', 'డాన్', 'షాన్', 'యాదోం కి బారాత్' వంటి ఐకానిక్ చిత్రాలకు కథలు అందించారు. వ్యక్తిగత జీవితానికి వస్తే, సలీం ఖాన్ 1935 నవంబర్లో మధ్యప్రదేశ్లోని ఇండోర్లో జన్మించారు. 1964లో సుశీలా చరక్ (సల్మా ఖాన్)ను వివాహం చేసుకున్నారు. వీరికి ముగ్గురు కుమారులు — సల్మాన్ ఖాన్, అర్బాజ్ ఖాన్, సోహైల్ ఖాన్ — అలాగే ఒక కుమార్తె అల్విరా ఖాన్ ఉన్నారు. అదనంగా అర్పితను దత్తత తీసుకున్నారు.