వాల్తేరు వీరయ్య: మెగాస్టార్ తో మాస్ మహారాజ్ స్టెప్పులు.. సాంగ్ వచ్చేస్తోంది
గాడ్ ఫాదర్ తర్వాత వాల్తేరు వీరయ్య సినిమాతో ప్రేక్షకుల ముందుకు వస్తున్నారు మెగాస్టార్ చిరంజీవి. సంక్రాంతి సందర్భంగా జనవరి 13వ తేదీన థియేటర్లలో సందడి చేయనుంది. ఈ నేపథ్యంలో ప్రచారాన్ని గట్టిగా మొదలెట్టింది చిత్రబృందం. ఇప్పటికే ఈ సినిమా నుండి మూడు పాటలను రిలీజ్ చేసింది. అన్ని పాటలకు మంచి రెస్పాన్స్ వచ్చింది. ప్రస్తుతం నాలుగవ పాటని రిలీజ్ చేసే ప్లాన్ లో ఉన్నారు. పూనకాలు లోడింగ్ అంటూ సాగే ఈ పాటలో మెగాస్టార్ తో స్టెప్పులు వేయనున్నారు రవితేజ. డిసెంబర్ 30వ తేదీన పాటను రిలీజ్ చేస్తున్నట్లు చిత్రబృందం తెలిపింది. ఈ సినిమాలో రవితేజ స్పెషల్ రోల్ చేస్తున్న సంగతి తెలిసిందే. ఆల్రెడీ రవితేజ మీద చిన్న గ్లింప్ల్ వీడియోని వదిలారు.
తెలంగాణ యాసలో రవితేజ డైలాగులు
మేకపిల్లను ఎత్తుకుని పులి వచ్చిందనే డైలాగ్ తో వదిలిన రవితేజ గ్లింప్స్, అందరినీ ఆకట్టుకుంది. తెలంగాణ యాసలో రవితేజ పలికిన డైలాగులు ఈ సినిమా మీద అంచనాలను మరింత పెంచాయి. పూనకాలు లోడింగ్ పాట రిలీజ్ డేట్ ని ప్రకటిస్తూ చిరంజీవి, రవితేజ స్టెప్పులేస్తున్న ఫోటోను విడుదల చేస్తారు. ఈ ఫోటో చూస్తుంటే నిజంగా పూనకాలు వచ్చేలా కనిపిస్తుంది. దేవిశ్రీ ప్రసాద్ సంగీతం అందించిన ఈ సినిమాను బాబీ కొల్లి డైరెక్ట్ చేస్తున్నారు. మైత్రీ మూవీ మేకర్స్ బ్యానర్ లో నవీన్ యేర్నేని, రవిశంకర్ నిర్మిస్తున్నారు. మెగాస్టార్ సరసన హీరోయిన్ గా శృతిహాసన్ కనిపిస్తోంది. సంక్రాంతి పండక్కి వస్తున్న వాల్తేరు వీరయ్య ఎలాంటి సందడి చేస్తాడో చూడాలి.
