Tiger Shroff: సల్మాన్‌ ఖాన్‌ను పొగిడినందుకే టైగర్‌ ష్రాఫ్‌పై కాల్పులు?
ఈ వార్తాకథనం ఏంటి
సల్మాన్‌ ఖాన్‌ను ప్రశంసించిన వ్యాఖ్యలే బాలీవుడ్‌ నటుడు టైగర్‌ ష్రాఫ్‌పై కాల్పుల ఘటనకు కారణమయ్యాయా? ఈ కేసులో లారెన్స్‌ బిష్ణోయ్‌ గ్యాంగ్‌తో సంబంధం ఉన్న నిందితుడి వాంగ్మూలం ఆధారంగా ఈ అనుమానం వ్యక్తమవుతోంది. 2022లో ఓ సినిమా ప్రచార కార్యక్రమంలో సల్మాన్‌ ఖాన్‌ను టైగర్‌ ష్రాఫ్‌ ప్రశంసించడాన్ని దాడికి ఒక కారణంగా భావిస్తున్నట్లు నిందితుడు పోలీసుల విచారణలో చెప్పినట్లు జాతీయ మీడియాలో కథనాలు వెలువడ్డాయి. అయితే, ఈ విషయాన్ని పోలీసులు ఇంకా అధికారికంగా ధ్రువీకరించలేదు. టైగర్‌ ష్రాఫ్‌ నటించిన 'హీరోపంతి 2' సినిమా ప్రమోషన్ల సమయంలో ఈ వ్యాఖ్యలు చేసినట్లు తెలుస్తోంది.
వివరాలు
ముంబైలోని జుహు ప్రాంతంలో కాల్పుల ఘటన
ఈద్‌ సందర్భంగా సినిమా విడుదల గురించి అడిగిన ప్రశ్నకు ఆయన స్పందిస్తూ..''ఈ ఇండస్ట్రీలో ఒకే ఒక్క టైగర్‌ ఉన్నాడు.అతనే సల్మాన్‌ సర్‌.ఆయన ముందు నేను పిల్లిలాంటి వాడిని. నేను సింబా.. పులి పిల్లను'' అని అన్నట్లు సమాచారం.
అప్పట్లో ఈ వ్యాఖ్యలు సామాజిక మాధ్యమాల్లో విస్తృతంగా ప్రచారమయ్యాయి.
ఈ వ్యాఖ్యలే దాడికి కారణాల్లో ఒకటై ఉండవచ్చని నిందితుడు చెప్పినట్లు పోలీసు వర్గాలను ఉటంకిస్తూ జాతీయ మీడియా పేర్కొంది.
అక్టోబర్‌ 18న ముంబైలోని జుహు ప్రాంతంలో ఈ కాల్పుల ఘటన చోటుచేసుకుంది.
ఫుట్‌బాల్‌ ఆడిన అనంతరం కారులో వెళ్తున్న టైగర్‌ ష్రాఫ్‌పై దుండగులు కాల్పులు జరిపారు.
ఆయన ప్రయాణిస్తున్న బీఎండబ్ల్యూ కారుపై ఏడురౌండ్ల కాల్పులు జరిపిన అనంతరం నిందితులు బైక్‌పై అక్కడి నుంచి పరారయ్యారు.
వివరాలు
ఆడియో సందేశం విడుదల
ఈ ఘటనలో టైగర్‌ డ్రైవర్‌తో పాటు ఓ పాదచారికి గాయాలయ్యాయి. టైగర్‌ మాత్రం ఎలాంటి గాయాలు కాకుండా సురక్షితంగా బయటపడ్డారు.
కాల్పుల ఘటన తర్వాత లారెన్స్‌ బిష్ణోయ్‌ గ్యాంగ్‌తో సంబంధం ఉన్న వ్యక్తి దాడికి బాధ్యత వహిస్తూ ఆడియో సందేశాన్ని విడుదల చేసినట్లు సమాచారం.
సల్మాన్‌ ఖాన్‌తో కలిసి పనిచేసే వారిని లక్ష్యంగా చేసుకుంటామని అందులో హెచ్చరించినట్లు పోలీసులు దర్యాప్తు చేస్తున్నారు.
ఈ సందేశం, టైగర్‌ గతంలో చేసిన వ్యాఖ్యలు, దాడి వెనుక ఉన్న కారణాలపై పోలీసులు వివిధ కోణాల్లో విచారణ కొనసాగిస్తున్నారు.
ఈ కేసులో దాడికి పాల్పడినట్లు అనుమానిస్తున్న ముగ్గురిని రాజస్థాన్‌లోని కోటా రైల్వే స్టేషన్‌ సమీపంలో రైలులో పోలీసులు అదుపులోకి తీసుకున్నారు.
వివరాలు
ముగ్గురు మహిళల అరెస్ట్
నిందితులు పోలీసుల కదలికల గురించి తెలుసుకునేందుకు సామాజిక మాధ్యమాలు,ఇంటర్నెట్‌ కాల్స్‌ను ఉపయోగించినట్లు దర్యాప్తులో అనుమానాలు వ్యక్తమయ్యాయి.
పోలీసుల నుంచి తప్పించుకునేందుకు బైక్‌లు, రైళ్లు,క్యాబ్‌ల ద్వారా ప్రయాణించినట్లు అధికారులు గుర్తించారు.
క్యాబ్‌ డ్రైవర్‌కు చేసిన ఓ సాధారణ ఫోన్‌ కాల్‌ వారి ప్రయాణ మార్గాన్ని గుర్తించడంలో కీలకంగా మారినట్లు తెలుస్తోంది.
మరోవైపు, ఈ కేసులో ఆయుధాల సరఫరాకు సంబంధం ఉందనే అనుమానంతో మరో ముగ్గురు మహిళలను కూడా పోలీసులు అరెస్టు చేశారు.
కాల్పుల వెనుక అసలు కారణం, నిందితుల పాత్ర, ఆయుధాల సరఫరా వ్యవస్థపై దర్యాప్తు కొనసాగుతోంది.
సల్మాన్‌ ఖాన్‌ను ప్రశంసిస్తూ టైగర్‌ చేసిన వ్యాఖ్యలకు, ఈ దాడికి నిజంగా సంబంధం ఉందా అనే విషయం పోలీసుల అధికారిక నిర్ధారణ తర్వాతే స్పష్టత రానుంది.