Toxic: యశ్ అభిమానులకు షాక్.. 'టాక్సిక్' విడుదల వాయిదా
ఈ వార్తాకథనం ఏంటి
రాకింగ్ స్టార్ యశ్ అభిమానులకు ఇది నిరాశ కలిగించే వార్త. జూన్ 4, 2026న భారీ స్థాయిలో విడుదల కావాల్సిన 'టాక్సిక్: ఏ ఫెయిరీ టేల్ ఫర్ గ్రోన్ అప్స్' సినిమా విడుదలను నిర్మాతలు వాయిదా వేశారు. ఈ విషయాన్ని యశ్ స్వయంగా సోషల్ మీడియా వేదికగా భావోద్వేగపూరిత లేఖ ద్వారా వెల్లడించారు. ఇటీవల నిర్వహించిన సినిమాకాన్ (CinemaCon) కార్యక్రమంలో 'టాక్సిక్' చిత్రానికి వచ్చిన విశేష స్పందన చూసి యశ్ బృందం ఆనందానికి లోనైంది. ఈ సినిమాకు ప్రపంచవ్యాప్తంగా మంచి అవకాశాలు ఉన్నాయని గుర్తించిన చిత్రబృందం, దీనిని ఒకేసారి అంతర్జాతీయ స్థాయిలో భారీగా విడుదల చేయాలని నిర్ణయించింది.
వివరాలు
త్వరలోనే కొత్త రిలీజ్ డేట్ ప్రకటిస్తామని వెల్లడి..
దీని కోసం విదేశీ ప్రముఖ సంస్థలతో పంపిణీ ఒప్పందాలు చేసుకోవడం, అలాగే ప్రపంచవ్యాప్త విడుదల ప్రణాళికను సమగ్రంగా సిద్ధం చేయడం అవసరమని యశ్ తెలిపారు. "భారతీయ సినిమా గ్లోబల్ వేదికపై మరింత గర్వంగా నిలవాలనే లక్ష్యంతోనే ఈ నిర్ణయం తీసుకున్నాం" అని ఆయన తన లేఖలో పేర్కొన్నారు. అదేవిధంగా సినిమా చిత్రీకరణ పూర్తైందని, ఫలితంపై తమకు పూర్తి నమ్మకం ఉందని యశ్ స్పష్టం చేశారు. "కొన్ని కథలు, కొన్ని ప్రయాణాలు కొంత ఓపికను కోరుతాయి. మీరు సంబరపడే గొప్ప సినిమాను అందిస్తామని హామీ ఇస్తున్నాను" అంటూ అభిమానులను సహనంతో ఉండాలని కోరారు. సినిమా కొత్త విడుదల తేదీని త్వరలోనే అధికారికంగా ప్రకటించనున్నారు.