Yatra 2 : యాత్ర 2 టీజర్‌కి ముహుర్తం ఖరారు.. వైఎస్ జగన్ పాత్రలో జీవిస్తున్న స్టార్ హీరో జీవా
కోలీవుడ్ స్టార్ నటుడు జీవా నటిస్తున్న యాత్ర 2 టీజర్‌కి ముహుర్తం ఖరారైంది. ఈ సినిమాలో వైఎస్ జగన్ పాత్రలో జీవా నటిస్తున్నారు. 2019 ఎన్నికలకు ముందు వైఎస్సార్ బయోపిక్'గా దర్శకుడు మహి వి రాఘవ్ యాత్ర సినిమాని తెరపైకి తీసుకొచ్చారు. ఆ సినిమా మంచి విజయం సాధించింది. ఇప్పుడు దానికి సీక్వెల్'గా, మళ్లీ ఎన్నికల ముందు యాత్ర 2 సినిమాను బరిలో నిలుపుతున్నారు. మహి వి రాఘవ్ దర్శకత్వంలోనే తెరకెక్కుతున్న ఈ సినిమా త్రీ ఆట‌మ్ లీవ్స్‌, వీ సెల్యూలాయిడ్, శివ మేక సంయుక్త నిర్మాణంలో తెరకెక్కుతోంది. ఇప్పటికే ఈ మూవీ నుంచి ముఖ్య పాత్రలకు సంబంధించిన ఫస్ట్ లుక్ ప్రేక్షకుల ముందుకు వచ్చేసింది.
జనవరి 5న ఉదయం 11 గంటలకు టీజర్ రిలీజ్
జనవరి 5న ఉదయం 11 గంటలకు ఈ సినిమా టీజర్ విడుదలకు రంగం సిద్ధమవుతోంది.చిత్ర నిర్మాణ బృందం రిలీజ్ చేసిన పోస్టర్ ఆకట్టుకుంటోంది. వైఎస్సార్ పాత్రలో మమ్ముట్టి కుర్చీలో ఒదిగిపోతే, ఆయన పక్కనే జీవా జగన్ పాత్రలో జీవిస్తున్నారు. ఈ సినిమాని 2024 ఫిబ్రవరి 8న రిలీజ్ చేయబోతున్నారు. వైఎస్ మరణానికి ముందు, వైఎస్ జగన్ పరిస్థితులు, తర్వాత జగన్ ఎలా సీఎం అయ్యారనే అంశాలను ఇందులో ప్రదర్శించనున్నారు. ఇదే పాయింట్'తో ఆర్జీవీ తెరకెక్కించిన 'వ్యూహం' రిలీజ్ అయ్యేందుకు ఎదురీదుతోంది. ఈ చిత్రాన్ని విడుదల చేయకూడదని తెలుగుదేశం నేతలు కోర్టును ఆశ్రయించారు. ఎన్నికల ముందు ఇటువంటి సినిమాలు ప్రజలపై ప్రభావం చూపిస్తాయని, ఈ మేరకు మూవీ విడుదలను అడ్డుకోవాలని పిటిషన్ దాఖలు చేశారు.
