బ్రో మూవీ టెలివిజన్ ప్రీమియర్: టీవీల్లోకి వచ్చేస్తున్న పవన్ కళ్యాణ్ కొత్త చిత్రం.. ఎప్పుడు టెలిక్యాస్ట్ కానుందంటే?
పవర్ స్టార్ పవన్ కళ్యాణ్, మెగా మేనల్లుడు సాయి ధరమ్ తేజ్ కలిసి నటించిన చిత్రం బ్రో. మామ అల్లుళ్లు మొదటిసారిగా బ్రో చిత్రంలో కలిసి నటించారు. సముద్రఖని దర్శకత్వంలో తెరకెక్కిన బ్రో సినిమా థియేటర్ల వద్ద ఓ మోస్తారు విజయాన్ని అందుకుంది. ప్రస్తుతం బ్రో సినిమా టెలివిజన్ ప్రేక్షకుల ముందుకు వచ్చేస్తుంది. అక్టోబర్ 15వ తేదీన సాయంత్రం 6 గంటలకు జీ తెలుగు ఛానల్ లో పవన్ కళ్యాణ్ నటించిన బ్రో మూవీ ప్రసారం కానుంది. ఈ మేరకు జీ తెలుగు నుండి అధికారికంగా సమాచారం వచ్చింది.
బ్రో మూవీ కథ ఏంటంటే
చిన్నప్పుడే నాన్నను కోల్పోయిన మార్కండేయులు(సాయి ధరమ్ తేజ్) ఇంటి బాధ్యతను తన భుజాల మీద మోస్తాడు. చిన్న చెల్లి చదువు, పెద్ద చెల్లి పెళ్లి, తమ్ముడి జీవితపు లక్ష్యాలను నెరవేర్చాలని బాధ్యతగా ఉంటాడు. అయితే సడెన్ గా మార్కండేయులు ఒకానొక ప్రమాదంలో చనిపోతాడు. అప్పుడే అతనికి బ్రో(పవన్ కళ్యాణ్) కలుస్తాడు. తన బాధ్యతలు నెరవేర్చకుండా చనిపోయినందుకు మార్కండేయులు బాధపడుతుంటే ఆ బాధ్యతలు నెరవేర్చడానికి సమయాన్ని బ్రో ఇస్తాడు. చనిపోయి మళ్ళీ తిరిగి వచ్చిన మార్కండేయులు తాను నెరవేర్చాలనుకున్న బాధ్యతలను నెరవేర్చాడా లేదా అన్నదే సినిమా కథ. పీపుల్ మీడియా ఫ్యాక్టరీ, జీ స్టూడియోస్ సంయుక్తంగా నిర్మించిన బ్రో సినిమాకు స్క్రీన్ ప్లే, మాటలను త్రివిక్రమ్ అందించారు.
