Financial Times Rankings 2024: టాప్ 100లో 21 భారతీయ సంస్థలకు చోటు

వ్రాసిన వారు Sirish Praharaju

Sep 09, 2024

06:00 pm

ఈ వార్తాకథనం ఏంటి

ఫైనాన్షియల్ టైమ్స్ మాస్టర్స్ ఇన్ మేనేజ్‌మెంట్ (FT MiM) 2024 గ్లోబల్ ర్యాంకింగ్స్ తాజాగా విడుదల అయ్యాయి. ఈ అంతర్జాతీయ ర్యాంకింగ్స్‌లో భారత వ్యాపార పాఠశాలలు తమ స్థాయిని బలంగా ప్రదర్శించాయి. భారతీయ విద్యాభవన్‌కు చెందిన ఎస్‌పీ జైన్ ఇన్‌స్టిట్యూట్ ఆఫ్ మేనేజ్‌మెంట్ అండ్ రీసెర్చ్ (SPJIMR) 35వ స్థానంతో ప్రపంచస్థాయిలో అగ్రస్థానం దక్కించుకుంది. టాప్ 50లో మొత్తం మూడు భారత సంస్థలు స్థానం పొందాయి. ఇండియన్ ఇన్‌స్టిట్యూట్ ఆఫ్ మేనేజ్‌మెంట్, అహ్మదాబాద్ (IIM A) 39వ ర్యాంక్ సాధించగా, IIM బెంగుళూరు 41వ స్థానాన్ని దక్కించుకున్నాయి.

వివరాలు

55వ ర్యాంకులో IIM లక్నో

ఈ ర్యాంకింగ్స్‌లో మొత్తం 100 స్థానాల్లో 21 భారతీయ ఇన్‌స్టిట్యూట్లు చోటు దక్కించుకున్నాయి. IIM లక్నో 55వ ర్యాంకులో ఉండగా, IIM కలకత్తా 56వ స్థానంలో నిలిచింది. XLRI - జేవియర్ స్కూల్ ఆఫ్ మేనేజ్‌మెంట్ 65వ స్థానాన్ని, IIM కోజికోడ్ 68వ స్థానాన్ని కైవసం చేసుకున్నాయి. SCMHRD 76వ ర్యాంక్, IIM ఉదయపూర్ 81వ, IIM ఇండోర్ 83వ, మేనేజ్‌మెంట్ డెవలప్‌మెంట్ ఇన్‌స్టిట్యూట్ గుర్గావ్ 85వ, ఇంటర్నేషనల్ మేనేజ్‌మెంట్ ఇన్‌స్టిట్యూట్ న్యూ ఢిల్లీ 86వ, NMIMS ముంబై 94వ, మేనేజ్‌మెంట్ టెక్నాలజీ ఘజియాబాద్ 97వ స్థానాలను దక్కించుకున్నాయి. ఈ విధంగా టాప్ 100లో అనేక భారత విద్యాసంస్థలు తమ స్థానాలను దక్కించుకున్నాయి.

వివరాలు

చైనా నుంచి రెండు ఇన్‌స్టిట్యూట్లు

ప్రపంచవ్యాప్తంగా, స్విట్జర్లాండ్‌లోని సెయింట్ గాలెన్ విశ్వవిద్యాలయం అగ్రస్థానంలో నిలిచింది. ఫ్రాన్స్‌కు చెందిన HEC పారిస్, ఇన్‌సీడ్, ఎడెక్ బిజినెస్ స్కూల్ రెండవ, మూడవ, నాల్గవ స్థానాల్లో నిలిచాయి. చైనాలోని షాంఘై జియావో టోంగ్ విశ్వవిద్యాలయం మొదటి ఐదు స్థానాల్లో చోటు సంపాదించింది. టాప్ 10లోని ఆరు సంస్థలు ఫ్రాన్స్‌కు చెందినవే. 24 ఫ్రెంచ్ ఇన్‌స్టిట్యూట్లు టాప్ 100లో నిలిచాయి. చైనా నుంచి కేవలం రెండు ఇన్‌స్టిట్యూట్లు మాత్రమే ఈ జాబితాలో చోటు దక్కించుకున్నాయి.