UBT: మహారాష్ట్ర రాజకీయాల్లో సంచలనం.. ఉద్ధవ్ వర్గం నుంచి షిండే శిబిరానికి ఆరుగురు ఎంపీలు!
ఈ వార్తాకథనం ఏంటి
ఉద్ధవ్ థాకరే నేతృత్వంలోని శివసేన (యూబీటీ) పార్టీకి మహారాష్ట్ర రాజకీయాల్లో పెద్ద ఎదురుదెబ్బ తగిలింది. లోక్సభలో పార్టీకి ప్రాతినిధ్యం వహిస్తున్న తొమ్మిది మంది ఎంపీలలో ఆరుగురు సభ్యులు ఏక్నాథ్ షిండే నాయకత్వంలోని శివసేన వర్గంలో చేరేందుకు సిద్ధమైనట్లు రాజకీయ వర్గాల్లో చర్చ జరుగుతోంది. కొన్ని రోజులుగా 'ఆపరేషన్ టైగర్' పేరుతో సాగుతున్న రాజకీయ పరిణామాలు ఆదివారం కీలక మలుపు తిరిగాయి. మధ్యాహ్నం 3 గంటలకు ఢిల్లీలో ఈ వ్యవహారానికి సంబంధించిన అధికారిక ప్రకటన వెలువడే అవకాశముందని సమాచారం. తిరుగుబాటు చేసిన ఎంపీలుగా సంజయ్ దినా పాటిల్,సంజయ్ దేశ్ముఖ్,సంజయ్ జాదవ్, భావూసాహెబ్ వాక్చౌరే,నగేష్ పాటిల్ అస్తికార్,ఓంప్రకాష్ రాజే నింబాల్కర్ పేర్లు వినిపిస్తున్నాయి.
వివరాలు
మూడింట రెండు వంతుల సభ్యుల మద్దతు తిరుగుబాటు వర్గానికి..
వీరు ఇటీవల ఉద్ధవ్ వర్గం నిర్వహించిన పార్లమెంటరీ పార్టీ సమావేశానికి హాజరుకాకపోవడం రాజకీయ ప్రాధాన్యత సంతరించుకుంది. ఫిరాయింపుల నిరోధక చట్టం కింద అనర్హత చర్యలు తప్పించుకోవడానికి అవసరమైన మూడింట రెండు వంతుల సభ్యుల మద్దతు తిరుగుబాటు వర్గానికి లభించినట్లు తెలుస్తోంది. దీంతో వీరి నిర్ణయం రాజకీయంగా మరింత ప్రాధాన్యం సంతరించుకుంది. ఇప్పటికే ఎంపీలు నగేష్ పాటిల్ అస్తికార్, ఓంప్రకాష్ రాజే నింబాల్కర్ తమ వైఖరిని బహిరంగంగా వెల్లడించారు. గత రెండేళ్లుగా తమ నియోజకవర్గాల అభివృద్ధికి తగిన నిధులు అందలేదని, పార్టీలోని కొందరు సీనియర్ నేతల వ్యాఖ్యలు తమను తీవ్రంగా నిరాశకు గురి చేశాయని పేర్కొన్నారు. తాము పార్టీ సిద్ధాంతాలను వీడలేదని, శివసేనలోని మరో వర్గంలోకి మాత్రమే వెళ్తున్నామని వారు స్పష్టం చేశారు.
వివరాలు
త్వరలోనే ఢిల్లీ నుంచి అధికారిక ప్రకటన
ఈ పరిణామాలపై స్పందించిన మహారాష్ట్ర ముఖ్యమంత్రి దేవేంద్ర ఫడ్నవీస్, ఉప ముఖ్యమంత్రి ఏక్నాథ్ షిండేలు 'ఆపరేషన్ టైగర్' పూర్తిగా విజయవంతమైందని వ్యాఖ్యానించినట్లు సమాచారం. త్వరలోనే ఢిల్లీ నుంచి అధికారిక ప్రకటన వెలువడుతుందని వారు విశ్వాసం వ్యక్తం చేసినట్లు తెలుస్తోంది. అలాగే తిరుగుబాటు ఎంపీలు లోక్సభ స్పీకర్ ఓం బిర్లాను కలిసి తమను ప్రత్యేక గ్రూప్గా గుర్తించాలని కోరనున్నారని సమాచారం. మరోవైపు ఈ పరిణామాలు ఉద్ధవ్ థాకరే శిబిరంలో తీవ్ర ఆందోళనకు కారణమయ్యాయి. పార్టీని వీడిన నేతలను ఉద్ధవ్ థాకరే తీవ్రంగా విమర్శించారు. వ్యక్తిగత ప్రయోజనాలు, అధికార ఆశల కోసం ప్రజలు ఇచ్చిన తీర్పును అవమానిస్తున్నారని ఆయన ఆరోపించారు.
వివరాలు
అసెంబ్లీ వర్షాకాల సమావేశాలు కొనసాగుతున్న సమయంలోనే ఈ రాజకీయ పరిణామం
పరిస్థితిని సమీక్షించేందుకు, పార్టీ ప్రజాప్రతినిధుల్లో మరింత అసంతృప్తి పెరగకుండా చర్యలు తీసుకునేందుకు ఉద్ధవ్ థాకరే అత్యవసర సమావేశాన్ని ఏర్పాటు చేశారు. నారిమన్ పాయింట్లోని 'శివాలయ' కార్యాలయంలో శివసేన (యూబీటీ) ఎమ్మెల్యేలు, ఎమ్మెల్సీలతో సమావేశమై భవిష్యత్ కార్యాచరణపై చర్చించనున్నారు. మహారాష్ట్ర అసెంబ్లీ వర్షాకాల సమావేశాలు కొనసాగుతున్న సమయంలోనే ఈ రాజకీయ పరిణామం చోటుచేసుకోవడం విశేషం. లోక్సభలో పార్టీ బలంపై ప్రభావం చూపడమే కాకుండా, రాబోయే అసెంబ్లీ ఎన్నికల సమీకరణాలపై కూడా దీని ప్రభావం ఉండొచ్చని రాజకీయ విశ్లేషకులు అభిప్రాయపడుతున్నారు.