Rahul Gandi: 99 ఓటములు.. అయినా అదే కథ.. రాహుల్ గాంధీపై బీజేపీ ఫైర్
ఈ వార్తాకథనం ఏంటి
2026 అసెంబ్లీ ఎన్నికల నేపథ్యంలో కాంగ్రెస్ పార్టీ ఎదుర్కొంటున్న కష్టాలను ఎత్తిచూపుతూ బీజేపీ నేతలు రాహుల్ గాంధీపై తీవ్ర విమర్శలు గుప్పించారు. ఐదు రాష్ట్రాల్లో జరుగుతున్న ఎన్నికల్లో కాంగ్రెస్ వెనుకబడుతున్న నేపథ్యంలో, గాంధీ ఎన్నికల ప్రదర్శనపై బీజేపీ వ్యంగ్యాస్త్రాలు సంధించింది. సోషల్ మీడియా వేదిక Xలో బీజేపీ పోస్ట్ చేస్తూ, "ఎన్నికలు ఒక క్రీడ అయితే రాహుల్ గాంధీకి ఓ బలమైన రికార్డు ఉండేది. 99 ఓటములు అనేది కేవలం గణాంకం కాదు, ఒక సుదీర్ఘ పరంపర. రాష్ట్రాలు మారినా, సంవత్సరాలు మారినా, ప్రచార నినాదాలు మారినా ఫలితం మాత్రం ఒకటే. శతకం దిశగా దూసుకెళ్తున్నారంటూ ఎద్దేవా చేసింది.
వివరాలు
95 ఎన్నికల్లో ఓటమిని చవిచూసింది
గత రెండు దశాబ్దాల్లో కాంగ్రెస్ సుమారు 95ఎన్నికల్లో ఓటమి చవిచూసిందని బీజేపీ ఇప్పటికే పలుమార్లు ఆరోపించింది. తాజా ఎన్నికల సమయంలో ఈఅంశాన్ని మళ్లీ ప్రస్తావిస్తూ గాంధీపై విమర్శలు మళ్లీ ముమ్మరం చేసింది. ప్రస్తుతం పశ్చిమ బెంగాల్, తమిళనాడు, కేరళ, అస్సాం, పుదుచ్చేరి రాష్ట్రాల్లో ఓట్ల లెక్కింపు కొనసాగుతోంది. ప్రారంభ ట్రెండ్స్ ప్రకారం పలు కీలక రాష్ట్రాల్లో బీజేపీ ఆధిక్యంలో ఉండగా, కాంగ్రెస్ వెనుకబడింది. పశ్చిమ బెంగాల్లో బీజేపీ గణనీయ ప్రదర్శన కనబరుస్తూ మెజారిటీ మార్క్ను దాటి 180కి పైగా స్థానాల్లో ముందంజలో ఉంది. అధికార టీఎంసీ వెనుకబడగా, కాంగ్రెస్ స్వల్ప స్థాయిలోనే కొనసాగుతోంది. అస్సాంలో కూడా బీజేపీ స్పష్టమైన ఆధిక్యంతో ముందంజలో ఉండగా, కాంగ్రెస్ ఆధ్వర్యంలోని కూటమి గణనీయంగా వెనుకబడినట్లు ట్రెండ్స్ సూచిస్తున్నాయి.
వివరాలు
మరో ఎన్నిక.. మరో ఓటమి
అయితే కేరళలో మాత్రం కాంగ్రెస్ నేతృత్వంలోని యూడీఎఫ్ వామపక్షాలతో కఠిన పోటీ ఇస్తోంది. ఇది కాంగ్రెస్ పోటీగా నిలిచిన అరుదైన రాష్ట్రంగా నిలిచింది. ఇదిలా ఉండగా బిహార్ ఎన్నికల తర్వాత కూడా బీజేపీ ఇదే విధంగా గాంధీపై విమర్శలు గుప్పించింది. ఆ సమయంలో కూడా "95 ఎన్నికల ఓటములు" అనే అంశాన్ని ప్రస్తావించింది. బీజేపీ ఐటీ సెల్ అధిపతి అమిత్ మాల్వీయా కూడా ఎక్స్లో స్పందిస్తూ, "రాహుల్ గాంధీ! మరో ఎన్నిక, మరో ఓటమి. ఎన్నికలలో స్థిరత్వానికి అవార్డులు ఉంటే అన్నింటినీ గెలిచేవారు. ఈ స్థాయిలో పరాజయాలను ఎలా అంత క్రమబద్ధంగా సాధిస్తున్నారు అనేది ఆశ్చర్యకరమంటూ వ్యంగ్యంగా వ్యాఖ్యానించారు.