Bunker Buster: అమెరికా ఇరాన్ దాడుల తర్వాత, బంకర్ బ్లస్టర్ క్షిపణి ప్రాజెక్టు వేగవంతం చేసిన భారత్
ఈ వార్తాకథనం ఏంటి
గతవారం అమెరికా, ఇరాన్‌లోని ఫోర్దో అణు కేంద్రాన్ని లక్ష్యంగా చేసుకుని అత్యాధునిక GBU-57/A మాసివ్ ఆర్డినెన్స్ పెనెట్రేటర్ బాంబులతో దాడులు నిర్వహించిన నేపథ్యంలో,భారత్ తన బంకర్ బ్లాస్టర్ సామర్థ్యాలను వేగంగా అభివృద్ధి చేయాల్సిన అవసరాన్ని గుర్తించింది. నేటి ప్రపంచంలో పెరుగుతున్న యుద్ధ భయాల నేపథ్యంలో,భూగర్భ లక్ష్యాలను ఛేదించగల శక్తివంతమైన ఆయుధ వ్యవస్థలు భారత్‌కు అత్యంత అవసరమవుతున్నాయని సంకేతాలు వెల్లడి చేస్తున్నాయి. ఇప్పటికే అభివృద్ధిలో ఉన్న అగ్ని-5ఖండాంతర బాలిస్టిక్ క్షిపణికి అధిక పేలోడ్ సామర్థ్యం కలిగిన వేరియంట్‌లను డిఫెన్స్ రీసెర్చ్ అండ్ డెవలప్‌మెంట్ ఆర్గనైజేషన్(DRDO)రూపొందిస్తోంది. ఈతాజా వేరియంట్ 7500కి.గ్రా బంకర్ బ్లాస్టర్ వార్‌హెడ్‌ను మోసుకెళ్లగల సామర్థ్యం కలిగి ఉండటం వల్ల,భూమి లోపల 80నుంచి 100మీటర్ల లోతులో దాగి ఉన్న శత్రు స్థావరాలను ధ్వంసం చేయగలదు.
వివరాలు
ప్రత్యక్ష లక్ష్యాలను టార్గెట్ చేసే సామర్థ్యం
ఈ క్షిపణుల రూపకల్పనలో అమెరికా అభివృద్ధి చేసిన GBU-57 బాంబుల తరహాలో భారీ పేలోడ్ సామర్థ్యాన్ని ప్రధాన లక్ష్యంగా తీసుకున్నారు. అయితే,వాటిని పెద్ద బాంబర్ విమానాల ద్వారా మోహరించాల్సిన అవసరం లేకుండా,నేరుగా క్షిపణుల ద్వారా లక్ష్యాన్ని ఛేదించగలిగే విధంగా డిజైన్ చేస్తున్నారు. ఇది తక్కువ ఖర్చుతో పెద్ద ఫలితాన్ని సాధించే వ్యూహాత్మక దిశగా భారత ముందడుగు. అగ్ని-5కు సంబంధించి ప్రస్తుతం రెండు వేరియంట్‌లు అభివృద్ధిలో ఉన్నాయి. ఒకటి భూ ఉపరితలంపై ఉన్న లక్ష్యాలను నాశనం చేయడానికి సాధారణ వార్‌హెడ్‌తో,మరొకటి కాంక్రీట్‌తో నిర్మించిన లేదా భూగర్భ బంకర్లను ఛేదించడానికి డీప్ పెనెట్రేటింగ్ వార్‌హెడ్‌తో రూపొందిస్తున్నారు. వీటి పేలోడ్ సామర్థ్యం 8 టన్నుల వరకు ఉండటంతో, ఇవి ప్రపంచవ్యాప్తంగా అత్యంత శక్తివంతమైన క్షిపణులుగా గుర్తింపు పొందుతున్నాయి.
వివరాలు
పాకిస్థాన్, చైనా అణు కేంద్రాలే లక్ష్యం
ఈ సరికొత్త స్థానికంగా అభివృద్ధి చేసిన క్షిపణి వ్యవస్థలు పాకిస్థాన్, చైనా వంటి దేశాల్లో ఉన్న అణు కేంద్రాలు, సైనిక ఆధారభూత మౌలిక సదుపాయాలు, కమాండ్ కంట్రోల్ కేంద్రాలపై అత్యంత ఖచ్చితంగా దాడి చేసే సామర్థ్యాన్ని భారతదేశానికి అందించనున్నాయి. ఇవి మాక్ 8 నుండి మాక్ 20 మధ్య వేగాన్ని సాధించగలుగుతాయి, అందువల్ల వీటిని హైపర్‌సోనిక్ ఆయుధాలుగా పరిగణిస్తారు. బంకర్ బ్లాస్టర్ బాంబుల సిద్దాంతంతో పోల్చదగ్గ ఇవి, అమెరికా రూపొందించిన ఆయుధాలకు సమానమైన వేగంతో పాటు, మరింత అధిక పేలోడ్ సామర్థ్యం కలిగి ఉంటాయి. ఈ స్థానికంగా అభివృద్ధి చేస్తున్న ఆయుధ వ్యవస్థలు భారత్ రక్షణ రంగంలో స్వావలంబన వైపు ఒక కీలక అడుగుగా నిలుస్తున్నాయి.