Delhi ATC Failure: ఢిల్లీ విమానాశ్రయంలో GPS స్పూఫింగ్.. అజిత్ దోవల్ కార్యాలయం దర్యాప్తు
ఈ వార్తాకథనం ఏంటి
గతవారం దిల్లీ అంతర్జాతీయ విమానాశ్రయంలో చోటుచేసుకున్న సాంకేతిక లోపం కారణంగా సుమారు 800 విమాన సర్వీసులు ప్రభావానికి గురయ్యాయి. ఈ ఘటనకు రెండు రోజుల ముందే అక్కడ జీపీఎస్ స్పూఫింగ్ జరిగినట్టు అనుమానాలు కలుగుతున్నాయి. ఈ నేపథ్యంలో జాతీయ భద్రతా సలహాదారు (NSA) అజిత్ దోవల్ కార్యాలయం ఈ అంశంపై దర్యాప్తు ప్రారంభించినట్లు సమాచారం.
వివరాలు
రాజధాని పరిధి నుంచి సుమారు 60 నాటికల్‌ మైళ్ల ప్రాంతంలో ఈ సమస్య
దేశంలోని అత్యంత రద్దీ విమాన కేంద్రంగా దిల్లీ ఐజీఐ విమానాశ్రయం ప్రసిద్ధి. ఇక్కడ నిత్యం 1,500కు పైగా విమానాలు టేకాఫ్, ల్యాండింగ్ చేస్తుంటాయి. ఎయిర్ ట్రాఫిక్ కంట్రోల్ డేటాతో లింక్ అయి పనిచేసే ఆటోమేటిక్ మెసేజ్ స్విచింగ్ సిస్టమ్‌ (AMSS)లో ఏర్పడిన సాంకేతిక గందరగోళమే విమానాల షెడ్యూల్‌లో అంతరాయానికి కారణమని చెప్పబడుతోంది. అంతేకాదు, ఇంతకుముందు కొందరు పైలట్లు తప్పుడు నావిగేషన్ సమాచారం లభించినట్లు నివేదించిన సంగతి కూడా వెలుగు చూసింది. ముఖ్యంగా రాజధాని పరిధి నుంచి సుమారు 60 నాటికల్‌ మైళ్ల ప్రాంతంలో ఈ సమస్య కనిపించిందని పేర్కొన్నారు.
వివరాలు
విచారణలో డీజీసీఏ,ఎయిర్‌పోర్ట్స్ అథారిటీ ఆఫ్ ఇండియా సంస్థలు
ఈ కేసులో దర్యాప్తు సమన్వయ బాధ్యత నేషనల్ సైబర్ సెక్యూరిటీ కోఆర్డినేటర్ (NCSC) విభాగం తీసుకుంది. ప్రస్తుతం ఈ విభాగానికి నవీన్ కుమార్ సింగ్ అధిపతిగా ఉన్నారు. స్పూఫింగ్ నిజంగానే జరిగి ఉంటే, దానికి ఉన్న అవకాశాలు, కారణాలు, దీనిలో సైబర్ దాడి లేదా విదేశీ ప్రమేయం ఉందా లేదా అన్న విషయాలను సమగ్రంగా పరిశీలించనున్నారు. ఈ విచారణలో డీజీసీఏ (DGCA), ఎయిర్‌పోర్ట్స్ అథారిటీ ఆఫ్ ఇండియా (AAI) సంస్థలు కూడా భాగస్వామ్యం అవుతున్నాయి.
వివరాలు
జీపీఎస్ స్పూఫింగ్ అంటే ఏమిటి?
విమానం ఉన్న వాస్తవ స్థానం మరియు దిశను తప్పుదోవ పట్టించేలా నకిలీ జీపీఎస్ సంకేతాలను పంపడం జీపీఎస్ సిగ్నల్ స్పూఫింగ్‌గా పిలుస్తారు. ఇందులో నిజమైన శాటిలైట్ సిగ్నల్స్‌ను అడ్డుకుని, వాటి స్థానంలో కృత్రిమ సంకేతాలను పంపడం ద్వారా జీపీఎస్ రిసీవర్‌ను తప్పు సమాచారాన్ని నమ్మించేలా చేస్తారు. దీని వలన విమానం ప్రస్తుత స్థానం, సమయం వంటి వివరాలు తప్పుగా చూపించేలా చేస్తాయి. అంతర్జాతీయ మార్గాల్లో పౌర విమానాలను లక్ష్యంగా చేసుకుని ఇలాంటి సైబర్ దాడులు గతంలో కూడా పలుమార్లు నమోదయ్యాయి.