Cyclone Montha: మొంథా తుపాను నేపథ్యంలో విజయవాడలో భారీ వర్షాలు: వాతావరణశాఖ
ఈ వార్తాకథనం ఏంటి
మొంథా తుపాన్ కు సంబంధించి మంగళవారం విజయవాడలో భారీ వర్షాలు కురిసే అవకాశం ఉందని వాతావరణ శాఖ అంచనా వేసింది. 16 సెంటీమీటర్లకు పైగా వర్షపాతం నమోదయ్యే అవకాశం ఉందని అధికారులు తెలిపారు. ఈ హెచ్చరికల నేపథ్యంలో విజయవాడ మున్సిపల్ కార్పొరేషన్ (వీఎంసీ) అధికారులు జాగ్రత్త చర్యలు ప్రారంభించారు. అత్యవసర పరిస్థితులు తప్ప ప్రజలు ఇళ్ల నుంచి బయటకు రావొద్దని విజ్ఞప్తి చేశారు. వర్షాల తీవ్రత అధికమైతే వ్యాపార, వాణిజ్య సంస్థలు, దుకాణాలు మూసివేయాలని సూచించారు. అయితే మెడికల్ షాపులు, పాల విక్రయ కేంద్రాలు, కూరగాయల దుకాణాలు మాత్రం తెరచి ఉంచవచ్చని తెలిపారు.
వివరాలు
కలెక్టరేట్‌, వీఎంసీ ప్రధాన కార్యాలయాల్లో కంట్రోల్ రూమ్‌లు
ఎన్టీఆర్ జిల్లా కలెక్టరేట్‌, వీఎంసీ ప్రధాన కార్యాలయాల్లో కంట్రోల్ రూమ్‌లు ఏర్పాటు చేశారు. కలెక్టరేట్‌లో 9154970454, వీఎంసీ కార్యాలయంలో 08662424172, 08662422515, 08662427485 నంబర్లను అందుబాటులో ఉంచారు. ఏదైనా అత్యవసర పరిస్థితి లేదా సమస్య ఎదురైనప్పుడు ఈ నంబర్లకు కాల్ చేసి సహాయం పొందవచ్చని అధికారులు తెలిపారు. నదీ పరివాహక ప్రాంతాలు మరియు ముంపు ప్రమాదానికి గురయ్యే ప్రాంతాల ప్రజలకు ముందస్తు హెచ్చరికలు జారీ చేశారు. వీఎంసీ పరిధిలోని 64 డివిజన్లలో మొత్తం 34 పునరావాస కేంద్రాలను సిద్ధం చేశారు. ఈ కేంద్రాలకు తరలివచ్చిన ప్రజలకు అవసరమైన అన్ని సదుపాయాలను అందుబాటులో ఉంచుతూ అధికారులు తగిన ఏర్పాట్లు చేశారు.