Andhra Pradesh Municipal Elections: ఏపీ పురపాలక ఎన్నికల్లో కూటమి హవా.. 17 మున్సిపాలిటీలు ఏకగ్రీవం
ఈ వార్తాకథనం ఏంటి
ఆంధ్రప్రదేశ్‌లో జరుగుతున్న పురపాలక ఎన్నికల్లో టీడీపీ, జనసేన, బీజేపీ కూటమి పలు స్థానాలను ఏకగ్రీవంగా దక్కించుకుంది. పోలింగ్‌కు ముందే రాష్ట్రంలోని 17 మున్సిపాలిటీలు, నగర పంచాయతీల్లో ఛైర్‌పర్సన్ పదవులను కూటమి అభ్యర్థులు ఏకగ్రీవంగా గెలుచుకున్నారు. వీటిలో తెలుగుదేశం పార్టీకి 15, జనసేనకు ఒకటి, బీజేపీకి ఒక ఛైర్‌పర్సన్ స్థానం దక్కింది. వార్డులు, డివిజన్లలోనూ కూటమి అభ్యర్థులు పెద్ద సంఖ్యలో ఏకగ్రీవంగా ఎన్నికయ్యారు. కూటమి తరఫున మొత్తం 726 స్థానాలు ఏకగ్రీవం కాగా, వీటిలో టీడీపీ 660, జనసేన 38, బీజేపీ 28 స్థానాలను దక్కించుకున్నాయి. మరోవైపు, ప్రతిపక్ష వైఎస్సార్ కాంగ్రెస్ పార్టీ 19 స్థానాల్లో మాత్రమే ఏకగ్రీవ విజయాలను నమోదు చేసింది.
వివరాలు
పులివెందులలోనూ పలు వార్డులు ఏకగ్రీవం
సీపీఐ ఒక స్థానంలో, స్వతంత్ర అభ్యర్థులు ఐదు స్థానాల్లో ఏకగ్రీవంగా ఎన్నికయ్యారు.
రాష్ట్రవ్యాప్తంగా మొత్తం వార్డుల్లో 21.08 శాతం, డివిజన్లలో 12.58 శాతం స్థానాలు ఏకగ్రీవమయ్యాయి.
ప్రతిపక్ష నేత వైఎస్ జగన్మోహన్ రెడ్డికి సొంత జిల్లాగా ఉన్న కడపలో కూటమి సాధించిన ఏకగ్రీవ విజయాలు రాజకీయంగా ప్రాధాన్యం సంతరించుకున్నాయి.
జిల్లాలో ఎనిమిది పురపాలక సంఘాలకు ఎన్నికలు జరుగుతుండగా, వాటిలో ఆరు చోట్ల ఛైర్‌పర్సన్ పదవులను కూటమి ఏకగ్రీవంగా దక్కించుకుంది.
కడప కార్పొరేషన్‌లోని మొత్తం 66 డివిజన్లకు గాను 50 స్థానాలను కూటమి అభ్యర్థులు ఏకగ్రీవంగా గెలుచుకున్నారు.
అలాగే, పులివెందుల మున్సిపాలిటీలో మొత్తం 40 వార్డులకుగాను 20 వార్డులను ఏకగ్రీవంగా కైవసం చేసుకున్నారు.
వివరాలు
పలుచోట్ల అభ్యర్థులను నిలబెట్టలేకపోయిన వైసీపీ
వీటితోపాటు పుంగనూరు, నగరి, గురజాల నియోజకవర్గాల్లోని మూడు పట్టణ స్థానిక సంస్థల్లోనూ కూటమి అభ్యర్థులు ఏకగ్రీవ విజయాలు సాధించారు.
రాష్ట్రవ్యాప్తంగా 87 మున్సిపాలిటీలు, 13 కార్పొరేషన్లకు ఎన్నికలు నిర్వహిస్తున్నారు.
అయితే, కొన్ని ప్రాంతాల్లో స్థానికంగా నెలకొన్న విభేదాలు, ఇతర సాంకేతిక కారణాల వల్ల వైఎస్సార్ కాంగ్రెస్ పార్టీ అభ్యర్థులను బరిలోకి దింపలేకపోయిందని రాజకీయ వర్గాల్లో చర్చ జరుగుతోంది.
పోలింగ్‌కు ముందే నమోదైన ఏకగ్రీవ ఫలితాలు రాష్ట్రంలోని పట్టణ స్థానిక సంస్థల ఎన్నికల్లో ఆసక్తికరంగా మారాయి.