Andhra Pradesh: ఏపీలో మరో కొత్త ఎయిర్పోర్ట్.. కాకినాడకు ప్రాధాన్యం
ఈ వార్తాకథనం ఏంటి
ఆంధ్రప్రదేశ్లో ఇప్పటికే పలు జిల్లాల్లో విమానాశ్రయాలు ఉన్నప్పటికీ, మరిన్ని ప్రాంతాలకు ఎయిర్పోర్ట్లు విస్తరించేందుకు ప్రభుత్వం చర్యలు ప్రారంభించింది. ఈ క్రమంలో కాకినాడ జిల్లాలో కొత్త విమానాశ్రయం నిర్మాణంపై ప్రణాళికలు రూపొందిస్తోంది. ఈ అంశంపై ఆంధ్రప్రదేశ్ విమానాశ్రయ అభివృద్ధి సంస్థకు సమగ్ర నివేదిక సమర్పించాలని సంబంధిత అధికారులకు ఆదేశాలు జారీ చేసింది. దీంతో జిల్లా అధికారులు త్వరలోనే ప్రదేశాలను పరిశీలించి, విమానాశ్రయం నిర్మాణానికి అనుకూలతపై వివరమైన నివేదికను సిద్ధం చేయనున్నారు. ఈ నివేదిక ఆధారంగా తుద ప్రతిపాదనలు రూపొందించబడతాయి. తుని-అన్నవరం ప్రాంతాల మధ్య విమానాశ్రయం ఏర్పాటు చేయాలని అధికారులు భావిస్తున్నారు.
వివరాలు
కొత్తగా ఏడు విమానాశ్రయాలు
రాష్ట్రంలో మొత్తం ఏడు కొత్త విమానాశ్రయాలను నిర్మించేందుకు ప్రభుత్వం ముందడుగు వేసింది. ఇందులో భాగంగా కాకినాడ జిల్లాలో తుని-అన్నవరం మధ్య స్థలాన్ని ఎంపిక చేశారు. మొదట పాయకరావుపేట-తుని మధ్య నిర్మాణం చేపట్టాలని భావించినప్పటికీ, తర్వాత ప్రణాళికలను సవరించి కొత్త ప్రదేశాన్ని ఖరారు చేశారు. ఈ నేపథ్యంలో విమానాశ్రయం నిర్మాణానికి సంబంధించిన అన్ని అంశాలపై సమగ్ర నివేదిక ఇవ్వాలని జిల్లా కలెక్టర్ సహా అధికారులను ప్రభుత్వం కోరింది. భూముల లభ్యత, రవాణా సౌకర్యాలు, విద్యుత్, నీటి వసతి వంటి మౌలిక సదుపాయాల వివరాలను సమర్పించాలని సూచించింది. అలాగే భూ సర్వే సంఖ్యలు, అధికారిక రికార్డులు వంటి సమాచారం కూడా అందించాలని ఆదేశించింది.
వివరాలు
ఒంగోలు, పల్నాడు జిల్లాల్లోనూ కొత్త విమానాశ్రయాలు
త్వరలోనే అధికారులు ప్రదేశాలను సందర్శించి నివేదికను సమర్పించనున్నారు. ఈ విమానాశ్రయం నిర్మాణం పూర్తయితే కాకినాడ నౌకాశ్రయం నుంచి సరుకు రవాణా వేగవంతం అవుతుంది. గగన మార్గం ద్వారా ఇతర ప్రాంతాలకు సరుకులను సులభంగా తరలించే అవకాశం కలుగుతుంది. ఇక కాకినాడతో పాటు ఒంగోలు, పల్నాడు జిల్లాల్లోనూ కొత్త విమానాశ్రయాల నిర్మాణానికి ప్రభుత్వం చర్యలు చేపడుతోంది. రాష్ట్రంలోని అన్ని ప్రాంతాల ప్రజలకు ఎయిర్ కనెక్టివిటీ అందించాలనే లక్ష్యంతో ఈ కార్యక్రమాలు కొనసాగుతున్నాయి. వీలైనంత త్వరగా నిర్మాణ పనులు ప్రారంభించేందుకు ప్రభుత్వం గడువు కూడా నిర్ణయించింది.
వివరాలు
జూన్లో భోగాపురం విమానాశ్రయం ప్రారంభం
ఇదిలా ఉండగా, భోగాపురం విమానాశ్రయాన్ని జూన్ నెలలో ప్రారంభించేందుకు అన్ని ఏర్పాట్లు జరుగుతున్నాయి. నిర్మాణ పనులు దాదాపు పూర్తయ్యాయి. జనవరిలో నిర్వహించిన ప్రయోగాత్మక ప్రయాణం విజయవంతంగా పూర్తయింది. ఆ పరీక్షలో భాగంగా ఢిల్లీ నుంచి విమానం భోగాపురం విమానాశ్రయానికి చేరుకుంది. ఇందులో కేంద్ర విమానయాన శాఖ మంత్రి రామ్మోహన్ నాయుడు, ప్రజాప్రతినిధులు పాల్గొన్నారు. విశాఖపట్నం నుంచి భోగాపురం వరకు సులభంగా చేరుకునేలా రహదారులను కూడా అభివృద్ధి చేశారు.