AP Local Body Poll: ఏపీలో ఈ నెల 14న స్థానిక సంస్థల ఎన్నికల షెడ్యూల్‌!
ఈ వార్తాకథనం ఏంటి
ఆంధ్రప్రదేశ్‌లో స్థానిక సంస్థల ఎన్నికల షెడ్యూల్‌ ఈ నెల 14న విడుదలయ్యే అవకాశం ఉందని తెలుస్తోంది. ఈ నేపథ్యంలో ముఖ్యమంత్రి చంద్రబాబు నాయుడు నివాసంలో కూటమి నేతలు కీలక సమావేశం నిర్వహించారు. ఎన్నికల్లో మూడు పార్టీల మధ్య సీట్ల సర్దుబాటుపై ఈ భేటీలో తుది నిర్ణయం తీసుకున్నారు. ఈ సమావేశానికి జనసేన తరఫున మంత్రి నాదెండ్ల మనోహర్‌, భాజపా రాష్ట్ర అధ్యక్షుడు మాధవ్‌, తెదేపా రాష్ట్ర అధ్యక్షుడు పల్లా శ్రీనివాస్‌, మంత్రి నిమ్మల రామానాయుడు తదితరులు హాజరయ్యారు. ముఖ్యమంత్రి చంద్రబాబుతో వారు ఎన్నికలకు సంబంధించిన అంశాలపై చర్చించారు.
వివరాలు
సీట్ల సర్దుబాటుపై తుది నిర్ణయం
స్థానిక సంస్థల ఎన్నికల్లో ఏ పార్టీ ఎక్కడ పోటీ చేయాలనే అంశంపై కూటమి నేతలు చర్చించారు.
ఇప్పటికే మూడు పార్టీల రాష్ట్ర స్థాయి సమన్వయ కమిటీ సమావేశం జరిగింది.
ఆ భేటీలో జనసేన, భాజపా నేతలు తాము పోటీ చేయాలనుకుంటున్న స్థానాల జాబితాలను సమన్వయ కమిటీకి అందజేశారు.
తాజాగా చంద్రబాబు నివాసంలో నిర్వహించిన సమావేశంలో ఆ జాబితాలపై మరోసారి చర్చించి తుది నిర్ణయం తీసుకున్నారు.
దీంతో స్థానిక సంస్థల ఎన్నికల్లో కూటమి పార్టీల మధ్య సీట్ల సర్దుబాటుకు సంబంధించి కీలక ప్రక్రియ పూర్తయింది.
ఎన్నికల షెడ్యూల్‌ ఈ నెల 14న విడుదలయ్యే అవకాశం ఉన్న నేపథ్యంలో కూటమి నేతల సమావేశానికి ప్రాధాన్యం ఏర్పడింది.