Supreme Court: ఏపీ మున్సిపల్‌ ఎన్నికలు.. నామినేషన్ల గడువుపై సుప్రీంకోర్టు కీలక తీర్పు!
ఈ వార్తాకథనం ఏంటి
ఏపీలో మున్సిపల్‌ ఎన్నికలకు సంబంధించి నామినేషన్ల దాఖలు గడువును పొడిగించాలంటూ వైఎస్సార్‌ కాంగ్రెస్‌ పార్టీ (YSRCP) దాఖలు చేసిన పిటిషన్‌పై సుప్రీంకోర్టులో విచారణ జరిగింది. రాష్ట్రంలోని 19 చోట్ల తమ పార్టీ అభ్యర్థులను నామినేషన్లు దాఖలు చేయకుండా అడ్డుకున్నారని వైకాపా తన పిటిషన్‌లో పేర్కొంది. ఈ పిటిషన్‌పై విచారణ చేపట్టిన అత్యున్నత న్యాయస్థానం.. నామినేషన్ల గడువును మొత్తంగా పొడిగించేందుకు, వాయిదా వేసేందుకు నిరాకరించింది. అయితే నామినేషన్ల దాఖలును అడ్డుకున్నారని ఫిర్యాదులు వచ్చిన ప్రాంతాల్లోనే సమస్యను పరిశీలించి తగిన నిర్ణయం తీసుకోవాలని రాష్ట్ర ఎన్నికల సంఘాన్ని (SEC) ఆదేశించింది. ఇప్పటికే నామినేషన్లకు సంబంధించి ఫిర్యాదులు అందిన చోట్లకే ఈ ఉత్తర్వులు వర్తిస్తాయని స్పష్టం చేసింది.
వివరాలు
నామినేషన్లు దాఖలు చేసే అవకాశం
ఫిర్యాదులు వచ్చిన ప్రాంతాల్లో అభ్యర్థులకు నామినేషన్లు దాఖలు చేసే అవకాశం కల్పించే అంశాన్ని పరిశీలించాలని సుప్రీంకోర్టు సూచించింది.
అవసరమైతే సంబంధిత జిల్లా కలెక్టర్‌ వద్ద కూడా నామినేషన్లు దాఖలు చేసేందుకు అవకాశం కల్పించే అంశాన్ని పరిశీలించాలని ఎస్‌ఈసీని ఆదేశించింది.
దీనిపై గురువారంలోపు నిర్ణయం తీసుకోవాలని స్పష్టం చేసింది. మరోవైపు అభ్యర్థుల తుది జాబితాను ప్రకటించేందుకు గడువును ఈ నెల 25వ తేదీ వరకు సుప్రీంకోర్టు పొడిగించింది.
ఈ సందర్భంగా రాష్ట్ర ఎన్నికల సంఘం తన వాదనలను కోర్టు ముందు ఉంచింది. నామినేషన్లకు సంబంధించి కోర్టుల్లో కేసులు వేయడం మినహా ఇతర చోట్ల ఎలాంటి ఫిర్యాదులు చేయలేదని ఎస్‌ఈసీ తెలిపింది.
వివరాలు
ఆదేశాలను జారీ చేసిన సుప్రీంకోర్టు
ఈ వ్యవహారంలో సుప్రీంకోర్టు ఇచ్చిన ఆదేశాల మేరకు తీసుకున్న చర్యలపై ఈ నెల 27వ తేదీన నివేదిక సమర్పించాలని రాష్ట్ర ఎన్నికల సంఘాన్ని అత్యున్నత న్యాయస్థానం ఆదేశించింది.
దీంతో నామినేషన్ల దాఖలుపై ఫిర్యాదులు అందిన ప్రాంతాల్లో ఎస్‌ఈసీ తీసుకునే నిర్ణయం కీలకంగా మారింది.