APSRTC: ఆర్టీసీలో ఇకపై అన్నీ విద్యుత్‌ బస్సులే.. ఆర్టీసీ పాలకవర్గ సమావేశంలో నిర్ణయాలు
ఈ వార్తాకథనం ఏంటి
రాష్ట్ర ప్రభుత్వం విద్యుత్‌ బస్సులకు ప్రాధాన్యం ఇస్తున్న నేపథ్యంలో, ఇకపై ఆర్టీసీలో కొనుగోలు చేసే బస్సులన్నీ విద్యుత్‌ ఆధారితవే కావాలని పాలకమండలి నిర్ణయం తీసుకుంది. ఈ విద్యుత్‌ బస్సుల నిర్వహణకు అవసరమైన మౌలిక సదుపాయాలు బస్టాండ్లలో ఏర్పాటు చేయాలని తీర్మానించారు. మహిళల ఉచిత బస్సు ప్రయాణ పథకాన్ని అమలు చేయనున్న నేపథ్యంలో, దానికి అనుగుణంగా తగిన ఏర్పాట్లు చేయాలని కూడా పాలకవర్గం నిర్ణయించింది. ఈ మేరకు ఆర్టీసీ పాలకమండలి తొలి సమావేశం మంగళవారం విజయవాడలోని ఆర్టీసీ హౌస్‌లో ఛైర్మన్‌ కొనకళ్ల నారాయణరావు అధ్యక్షతన జరిగింది. సమావేశంలో పలు ముఖ్యమైన అంశాలపై విస్తృతంగా చర్చించి కీలక నిర్ణయాలు తీసుకున్నారు.
వివరాలు
2020కి ముందు చనిపోయిన ఉద్యోగుల వారసులకు కారుణ్య నియామకాలు
ఉచిత బస్సు పథకాన్ని సమర్థంగా అమలు చేయడం కోసం తాత్కాలికంగా డ్రైవర్లు,కండక్టర్లను నియమించేందుకు ప్రభుత్వ అనుమతిని కోరాలని తీర్మానించారు. అంతేగాక, ప్రస్తుతం ఖాళీగా ఉన్న సుమారు 7,000పోస్టులను భర్తీ చేయాలని ప్రభుత్వాన్ని కోరేలా నిర్ణయం తీసుకున్నారు. విజిలెన్స్‌ విభాగానికి అధిపతిగా పోలీస్ శాఖ నుండి ఐజీ లేదా డీఐజీ స్థాయి అధికారిని నియమించేందుకు ప్రభుత్వంతో సంప్రదించాలని తీర్మానించారు. ఆర్టీసీని ప్రభుత్వం విలీనం చేయడానికి ముందు మరణించిన ఉద్యోగులు,మెడికల్‌గా అన్‌ఫిట్ అయిన ఉద్యోగుల వారసులకు ఉద్యోగ అవకాశాలు కల్పించాలన్న ప్రతిపాదనను ప్రభుత్వానికి పంపాలని నిర్ణయం తీసుకున్నారు. అలాగే విలీనానికి ముందు పదవీ విరమణ పొందిన ఉద్యోగులకు ప్రస్తుతం ఉన్న పింఛన్లు చాలా తక్కువగా ఉండటంతో,వారికి ప్రభుత్వం అందించే సామాజిక పింఛన్లకు అర్హత కల్పించాలని కోరనున్నారు.
వివరాలు
ప్రతి మూడు నెలలకోసారి పాలకవర్గ సమావేశం
ఆర్టీసీ ఉద్యోగులకు మునుపటి విధంగా అపరిమిత వైద్య ఖర్చుల భారం భరించే విధంగా ప్రభుత్వం చర్యలు తీసుకోవాలని తీర్మానం చేయనున్నారు. ప్రస్తుతం శిథిలావస్థకు చేరిన ఆర్టీసీ డిస్పెన్సరీలను పునర్నిర్మించడం లేదా అవసరమైతే మరమ్మతులు చేయడం వంటి చర్యలు చేపట్టాలని నిర్ణయించారు. ఇకపై ప్రతి మూడు నెలలకోసారి పాలకవర్గ సమావేశం నిర్వహించాలని కూడా నిర్ణయించారు.
వివరాలు
రూ.75 కోట్ల చెల్లింపుల వివరాలివ్వండి
గతంలో సంస్థ 1,489 బస్సులను కొనుగోలు చేయగా,వాటిలో 904 బస్సుల బాడీ బిల్డింగ్‌కు టెండర్‌ ప్రక్రియ చేపట్టి అప్పగించారు. అయితే 518 ఎక్స్‌ప్రెస్‌ బస్సులకు టెండర్‌ను పునరావృతం చేసి అధిక ధరకు బాడీ బిల్డింగ్‌కు గుత్తేదారుకు అప్పగించారు. ఈ వ్యవహారంలో రూ.75 కోట్ల చెల్లింపుల అంశం బోర్డు సమావేశంలో చర్చకు వచ్చింది. మరోవైపు కొంతమంది సభ్యులు ఈ నిర్ణయాన్ని ప్రశ్నించారు. టెండర్‌ తిరిగి ఎందుకు పిలవాల్సి వచ్చింది? ధర పెరగడానికి గల కారణాలు ఏమిటి? అన్న వివరాలను వచ్చే సమావేశంలో సమర్పించాలని కోరారు.
వివరాలు
రూ.75 కోట్ల చెల్లింపుల వివరాలివ్వండి
రాయలసీమ ప్రాంతంలో బస్టాండ్ల దిగజారిన పరిస్థితులను కడప జోనల్‌ ఛైర్మన్‌ పూల నాగరాజు పవర్‌పాయింట్‌ ప్రజెంటేషన్‌ రూపంలో వివరించారు. ఈ సమావేశంలో ఆర్టీసీ వైస్‌ ఛైర్మన్‌ మునిరత్నం, నాలుగు జోన్ల ఛైర్మన్లు, ఎండీ ద్వారకా తిరుమలరావు, రవాణా శాఖ ముఖ్య కార్యదర్శి కాంతిలాల్‌ దండే, ఆర్థిక శాఖ కార్యదర్శి రోనాల్డ్‌ రాస్‌, జీఏడీ ప్రత్యేక ప్రధాన కార్యదర్శి రావత్‌ తదితరులు పాల్గొన్నారు.