Indian Army: సీనియర్ అధికారుల డ్రెస్కోడ్పై వెనక్కి తగ్గిన ఆర్మీ.. డిసెంబర్ 1 నుంచి పాత నిబంధనలు
ఈ వార్తాకథనం ఏంటి
భారత సైన్యం సీనియర్ అధికారుల యూనిఫాం నిబంధనల్లో కీలక మార్పు చేయాలని నిర్ణయించింది. 2023లో తీసుకొచ్చిన డ్రెస్కోడ్ మార్పులను వెనక్కి తీసుకుంటూ పాత విధానాన్ని పునరుద్ధరించనుంది. ఈ మేరకు నవంబర్ 13న 'Dress for Brig & Above Rk Offrs' అనే శీర్షికతో అంతర్గత లేఖ జారీ చేసినట్లు హిందుస్థాన్ టైమ్స్ (HT) వెల్లడించింది. సీనియర్ నాయకత్వంలో అందరికీ ఒకే విధమైన యూనిఫాం ఉండాలనే ఉద్దేశంతో గతంలో బ్రిగేడియర్ హోదా, అంతకంటే పై స్థాయి అధికారులకు ఉమ్మడి డ్రెస్కోడ్ను అమలు చేశారు.
వివరాలు
రెజిమెంటల్ గుర్తులు, లాన్యార్డుల తొలగింపు
2023 ఆగస్టులో అమల్లోకి వచ్చిన మార్పుల ప్రకారం.. సీనియర్ అధికారులు తమతమ ఆర్మ్స్, సర్వీసులకు సంబంధించిన ప్రత్యేక గుర్తులను యూనిఫాంపై ధరించకూడదని నిర్ణయించారు.
భుజానికి వేలాడదీసే లాన్యార్డ్ (Lanyard)ను కూడా తొలగించారు. అలాగే డార్క్ గ్రీన్ బెరెట్లు, ఒకే తరహా బెల్టులు, ఇత్తడితో తయారుచేసిన ర్యాంక్ గుర్తులను తప్పనిసరి చేశారు.
సీనియర్ అధికారులంతా నల్లటి బూట్లనే ధరించాలని నిబంధన విధించారు.
ఈ మార్పులు మేజర్ జనరల్, లెఫ్టినెంట్ జనరల్ హోదా అధికారులతో పాటు ఆర్మీ చీఫ్కు కూడా వర్తించాయి.
వివరాలు
అధికారుల అభిప్రాయాల మేరకు నిర్ణయం వెనక్కి
అధికారుల నుంచి వచ్చిన అభిప్రాయాలు, సూచనలను పరిగణనలోకి తీసుకున్న తర్వాత సమగ్ర సమీక్ష నిర్వహించి ఈ నిర్ణయం తీసుకున్నట్లు ఆర్మీ వెల్లడించింది.
నవంబర్ 13న జారీ చేసిన లేఖలో.. అధికారుల నుంచి అందిన అభిప్రాయాల ఆధారంగా బ్రిగేడియర్, అంతకంటే పై స్థాయి అధికారుల డ్రెస్కు సంబంధించిన సూచనలపై సమగ్ర సమీక్ష చేపట్టామని పేర్కొంది.
దీంతో డిసెంబర్ 1 నుంచి మళ్లీ 'ఆర్మీ యూనిఫామ్స్ పాంప్లెట్-2018' నిబంధనలను అమలు చేయనున్నారు.
తద్వారా యూనిఫాంలపై సంప్రదాయ రెజిమెంటల్ గుర్తులు తిరిగి కనిపించనున్నాయి.
వివరాలు
ఆర్మీ చీఫ్ కూడా పాత యూనిఫాంలోకి..
ఈ మార్పులతో ఆర్మీ చీఫ్ జనరల్ ధీరజ్ సేథ్ కూడా తన యూనిఫాంలో మార్పులు చేసుకోనున్నారు. జూన్ 30న ఆర్మీ చీఫ్గా బాధ్యతలు చేపట్టిన ఆయన.. ఇకపై గ్రీన్ బెరెట్కు బదులుగా బ్లాక్ బెరెట్ ధరించనున్నారు.
అలాగే నల్లటి బూట్ల స్థానంలో గోధుమ రంగు బూట్లు వేసుకోనున్నారు. స్కిన్నర్స్ హార్స్, పూణా హార్స్ వంటి కొన్ని రెజిమెంట్లలో సంప్రదాయంగా గోధుమ రంగు బూట్లను ధరిస్తారు.
డిసెంబర్ నుంచి బ్రిగేడియర్ హోదా అధికారులు యుద్ధేతర విధుల్లో ఉండే సమయంలో తమ రెజిమెంట్ లేదా కార్ప్స్కు సంబంధించిన గుర్తులను మళ్లీ యూనిఫాంపై ప్రదర్శించేందుకు ఈ నిర్ణయం అవకాశం కల్పిస్తుందని ఈ వ్యవహారంతో సంబంధం ఉన్న ఓ వ్యక్తిని ఉటంకిస్తూ న్యూస్18 నివేదించింది.