Trains Cancelled : అర్నాబ్ తుఫాన్ ఎఫెక్ట్.. 53 రైళ్లు రద్దు..!

వ్రాసిన వారు Sirish Praharaju

Oct 27, 2026

10:18 am

ఈ వార్తాకథనం ఏంటి

పశ్చిమ మధ్య బంగాళాఖాతంలో ఏర్పడిన 'అర్నబ్' తుపాను అతి తీవ్ర తుపానుగా బలపడింది. వేగంగా కదులుతున్న ఈ తుపాను ఆంధ్రప్రదేశ్‌ తీరంవైపు దూసుకొస్తోంది. మంగళవారం ఉదయానికి విశాఖపట్నానికి 300 కిలోమీటర్లు,కాకినాడకు 360 కిలోమీటర్లు, మచిలీపట్నానికి 460 కిలోమీటర్లు, బాపట్లకు 530 కిలోమీటర్ల దూరంలో తుపాను కేంద్రీకృతమైనట్లు రాష్ట్ర విపత్తుల నిర్వహణ సంస్థ వెల్లడించింది. దీని ప్రభావంతో మంగళవారం, బుధవారం రాష్ట్రంలోని పలు జిల్లాల్లో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. గంటకు 115 నుంచి 140 కిలోమీటర్ల వేగంతో ఈదురుగాలులు వీచే ప్రమాదం ఉందని తెలిపింది. ఈ నేపథ్యంలో రైల్వే శాఖ అప్రమత్తమైంది. ప్రయాణికుల భద్రతను దృష్టిలో ఉంచుకుని పలు రైళ్లను రద్దు చేసింది.

వివరాలు

తుపాను ప్రభావిత ప్రాంతాల్లో నిరంతరం నిఘా

అర్నబ్ తుపాను నేపథ్యంలో దక్షిణ కోస్తా రైల్వే అధికారులు ముందస్తు చర్యలు చేపట్టారు.

విశాఖపట్నం నుంచి నడిచే 53 రైళ్లను రద్దు చేశారు.ప్రయాణికులకు అవసరమైన సమాచారం అందించేందుకు టోల్‌ఫ్రీ నంబర్‌ను ఏర్పాటు చేశారు.

తుపాను కారణంగా రైల్వే ట్రాక్‌లు దెబ్బతినకుండా పర్యవేక్షించేందుకు అదనపు సిబ్బందిని అందుబాటులో ఉంచారు.

దక్షిణ కోస్తా రైల్వే జనరల్ మేనేజర్ సందీప్ మాథుర్ సోమవారం నాలుగు డివిజన్ల డీఆర్ఎంలతో సమీక్ష నిర్వహించారు.

తుపాను ప్రభావిత ప్రాంతాల్లో రైల్వే వంతెనలు, పట్టాలు, యార్డులు, సిగ్నల్ వ్యవస్థలపై నిరంతరం నిఘా ఉంచాలని అధికారులను ఆదేశించారు.

జోనల్, డివిజన్ ప్రధాన కార్యాలయాల్లో వార్‌రూమ్‌లు,ప్రయాణికుల సహాయ కేంద్రాలను ఏర్పాటు చేశారు. రైళ్లు రద్దయిన సందర్భాల్లో టికెట్‌ రీఫండ్‌ కోసం అదనపు కౌంటర్లను కూడా నిర్వహించనున్నారు.

వివరాలు

రద్దయిన రైళ్ల వివరాలు ఇవే..

విశాఖపట్నం - కిరండూల్ - విశాఖపట్నం మధ్య నడిచే నైట్ ఎక్స్‌ప్రెస్ (18515-18516)ను ఈ నెల 29 నుంచి నవంబర్ 4 వరకు రద్దు చేశారు.

విశాఖపట్నం - కొరాపుట్ - విశాఖపట్నం పాసింజర్ రైలు (58538-58537)ను ఈ నెల 27 నుంచి 31 వరకు నిలిపివేశారు.

ఇదే మార్గంలో నడిచే ఇంటర్‌సిటీ ఎక్స్‌ప్రెస్ (18512-18511)ను ఈ నెల 30, 31 తేదీల్లో రద్దు చేశారు.

విశాఖపట్నం - కిరండూల్ - విశాఖపట్నం పాసింజర్ రైలు (58501-58502)ను ఈ నెల 27 నుంచి 30 వరకు రద్దు చేశారు.

వివరాలు

హీరాఖండ్ ఎక్స్‌ప్రెస్‌ రాకపోకల్లో మార్పులు..

వీటితోపాటు రాజమండ్రి - విజయవాడ, విజయవాడ - మచిలీపట్నం, మచిలీపట్నం - గుడివాడ, కాకినాడ పోర్ట్ - విశాఖపట్నం, పార్వతీపురం - విశాఖపట్నం, విజయవాడ - నరసాపురం, నరసాపురం - నిడదవోలు, భీమవరం - నిడదవోలు, గుంటూరు - రేపల్లె మార్గాల్లో నడిచే పలు రైళ్లను కూడా రద్దు చేసినట్లు రైల్వే అధికారులు తెలిపారు.

భువనేశ్వర్ - జగదల్‌పూర్ మధ్య నడిచే హీరాఖండ్ ఎక్స్‌ప్రెస్ (18447) ఈ నెల 27 నుంచి 30 వరకు రాయగడ రైల్వే స్టేషన్‌లోనే నిలిచిపోనుంది.

మరోవైపు జగదల్‌పూర్ - భువనేశ్వర్ మధ్య నడిచే హీరాఖండ్ ఎక్స్‌ప్రెస్ (18448) ఈ నెల 28 నుంచి నవంబర్ 31 వరకు కొరాపుట్‌కు బదులుగా రాయగడ నుంచి బయలుదేరుతుందని సమాచారం.

వివరాలు

ప్రయాణానికి ముందు రైలు వివరాలు తనిఖీ చేసుకోండి..

అయితే ఈ తేదీల్లో ఏవైనా పొరపాట్లు ఉన్నాయా, రైళ్ల తాజా షెడ్యూల్‌లో మార్పులున్నాయా అనే విషయాలను ప్రయాణికులు అధికారిక రైల్వే ప్రకటనల్లో నిర్ధారించుకోవాలి.

తుపాను ప్రభావంతో రైళ్ల రాకపోకల్లో మార్పులు, ఆలస్యాలు చోటుచేసుకునే అవకాశం ఉంది.

అందువల్ల ప్రయాణికులు స్టేషన్‌కు వెళ్లే ముందు రైల్వే అధికారిక వెబ్‌సైట్‌, రైల్వే విచారణ సేవలు, స్టేషన్లలో చేసే ప్రకటనలను పరిశీలించాలి.

ఇప్పటికే టికెట్లు బుక్ చేసుకున్నవారు తమ రైలు నంబర్‌, ప్రయాణ తేదీ, సర్వీసు అందుబాటులో ఉందో లేదో ముందుగానే తనిఖీ చేసుకోవాలి.

చివరి నిమిషంలో స్టేషన్‌కు చేరుకుని ఇబ్బందులు పడకుండా ముందస్తు జాగ్రత్తలు తీసుకోవాలని అధికారులు సూచిస్తున్నారు.