Arvind Kejriwal: పంజాబ్‌లోని అన్ని లోక్‌సభ స్థానాల్లో పోటీ చేస్తాం: అరవింద్ కేజ్రీవాల్ ప్రకటన
ఈ వార్తాకథనం ఏంటి
ఆమ్ ఆద్మీ పార్టీ చీఫ్ అరవింద్ కేజ్రీవాల్ ఇండియా కూటమికి షాకిచ్చారు. రానున్న 15రోజుల్లో పంజాబ్‌లోని మొత్తం 13లోక్‌సభ స్థానాలు, చండీగఢ్‌లోని ఒక లోక్‌సభ స్థానాల్లో ఆప్ అభ్యర్థులను ప్రకటిస్తామని కేజ్రీవాల్ స్పష్టం చేశారు.
ప్రస్తుతం కేజ్రీవాల్ పంజాబ్ పర్యటనలో ఉన్నారు. శనివారం పంజాబ్‌లోని ఖన్నాలో ఆయన మాట్లాడుతూ. మొత్తం 14లోక్‌సభ స్థానాలకు అభ్యర్థులను ప్రకటిస్తామన్నారు.
రెండేళ్ల క్రితం అసెంబ్లీ ఎన్నికల్లో రాష్ట్ర ప్రజలు తమ పార్టీని ఆశీర్వదించారని కేజ్రీవాల్ గుర్తు చేశారు.
పంజాబ్‌లోని 117సీట్లకు గాను 92సీట్లతో తమ అభ్యర్థులను గెలిపించారన్నారు. ఇప్పుడు పంజాబ్ రాష్ట్ర ప్రజలను మరొక వరం కోరడానికి ఇక్కడికి వచ్చినట్లు చెప్పారు.
రెండు నెలల తర్వాత జరగబోయే లోక్‌సభ ఎన్నికల్లో 14స్థానాల్లో తమ అభ్యర్థులను గెలిపించాలని కోరారు.
పంజాబ్
దిల్లీలో కలిసి పోటీ చేసేందుకు కొనసాగుతున్న చర్చలు
ఆమ్ ఆద్మీ పార్టీ, కాంగ్రెస్‌లు భారత కూటమిలో భాగమే అయినప్పటికీ పంజాబ్‌లో మాత్రం పొత్తు ఉండదని దిల్లీ సీఎం ప్రకటన ద్వారా స్పష్టమవుతుంది.
పంజాబ్‌లో కాంగ్రెస్, ఆప్ విడివిడిగా పోటీచేస్తామని, అయితే దిల్లీలో మాత్రం పొత్తు కోసం ఇరు పార్టీల మధ్య చర్చలు జరుగుతున్నాయని ఆప్ పంజాబ్ ఇన్‌ఛార్జ్, ఎంపీ సందీప్ పాఠక్ తెలిపారు.
ఇదిలా ఉంటే, రాష్ట్రాల వారీగా ఇండియా కూటమికి ఇబ్బందులు తలెత్తుతున్నాయి. రాబోయే లోక్‌సభ ఎన్నికల కోసం ఏర్పాటైన ప్రతిపక్ష పార్టీల ఈ కూటమి విచ్ఛిన్నమైంది.
పశ్చిమ బెంగాల్‌లో మమతా బెనర్జీ, బిహార్‌లో నితీష్ కుమార్, ఉత్తర్‌ప్రదేశ్‌లో అఖిలేష్ యాదవ్ ఇప్పటికే తమ వైఖరిని స్పష్టం చేశారు. ఉత్తర్‌ప్రదేశ్‌లో సమాజ్‌వాదీ పార్టీ కూడా ఇప్పటికే 16 సీట్లను ప్రకటించింది.