Ayodhya Ram Temple: అయోధ్య రామమందిర దర్శన వేళల్లో మార్పులు.. నవంబర్‌ 1 నుంచి కొత్త సమయాలు అమలు
ఈ వార్తాకథనం ఏంటి
ఉత్తర్‌ప్రదేశ్‌లోని అయోధ్య రామమందిరంలో భక్తుల దర్శన వేళల్లో స్వల్ప మార్పులు చోటుచేసుకోనున్నాయి. సీజన్‌ మార్పు నేపథ్యంలో ఆలయ సమయాలను సవరించాలని శ్రీరామ జన్మభూమి తీర్థక్షేత్ర ట్రస్టు నిర్ణయించింది. ఈ కొత్త సమయాలు నవంబర్‌ 1 నుంచి అమల్లోకి రానున్నాయి. ప్రస్తుతం తెల్లవారుజామున 3.45 గంటలకు తెరుచుకుంటున్న ఆలయం రాత్రి 10.30 గంటల వరకు భక్తులకు అందుబాటులో ఉంటోంది. అయితే నవంబర్‌ 1 నుంచి ఉదయం 4 గంటలకు ఆలయాన్ని తెరిచి, రాత్రి 10 గంటలకు మూసివేయనున్నారు. కొత్త షెడ్యూల్‌ ప్రకారం.. ఉదయం 4.30 నుంచి 4.40 గంటల వరకు మంగళ హారతి నిర్వహిస్తారు. అనంతరం అభిషేకం, ఇతర పూజా కార్యక్రమాల కోసం ఉదయం 6.30 గంటల వరకు ఆలయ ద్వారాలను మూసి ఉంచుతారు.
వివరాలు
మధ్యాహ్నం 1.30 గంటల వరకు ఆలయంలో విశ్రాంతి సమయం
ఆ తర్వాత భక్తులను దర్శనానికి అనుమతిస్తారు. ఉదయం 8 నుంచి 8.10 గంటల వరకు బాలభోగ్‌ నైవేద్య సమర్పణ కోసం మరోసారి ఆలయ ద్వారాలను మూసివేస్తారు.
అనంతరం ఉదయం 11.30 గంటల వరకు భక్తులు స్వామివారిని దర్శించుకోవచ్చు.
మధ్యాహ్నం 12 గంటలకు స్వామివారికి రాజ్‌భోగ్‌ నైవేద్యం సమర్పిస్తారు.
ఈ కార్యక్రమం అనంతరం మధ్యాహ్నం 1.30 గంటల వరకు ఆలయంలో విశ్రాంతి సమయం ఉంటుంది.
తిరిగి మధ్యాహ్నం 1.35 గంటల నుంచి భక్తులకు దర్శన అవకాశం కల్పిస్తారు.
సాయంత్రం 6 గంటలకు సంధ్యా హారతి నిర్వహించనున్నారు.
ఈ సమయంలో 15 నిమిషాల పాటు ఆలయ ద్వారాలను మూసివేసి, హారతి కార్యక్రమం పూర్తయిన తర్వాత మళ్లీ భక్తులను దర్శనానికి అనుమతిస్తారు.