Babu Jagjivan Ram Birth Anniversary: అగ్రనేతగా ఎదిగిన బాబుజీ.. కానీ ప్రధాని కుర్చీ దక్కకపోవడానికి కారణమిదే?
ఈ వార్తాకథనం ఏంటి
భారతదేశపు తొలి దళిత ఉప ప్రధానిమంత్రి బాబు జగజీవన్ రామ్ జయంతి నేడు. 1908ఏప్రిల్ 5న బీహార్లోని ఆరా జిల్లా చంద్వాలో జన్మించిన ఆయన, స్వాతంత్య్ర సమరయోధుడిగా, ప్రముఖ రాజకీయవేత్తగా, రక్షణ మంత్రిగా, రాజ్యాంగ సభ సభ్యుడిగా విశేష సేవలు అందించారు. 1977 నుంచి 1979 వరకు జనతా పార్టీ ప్రభుత్వంలో ఉప ప్రధానమంత్రిగా పనిచేసిన ఆయనను ప్రజలు ప్రేమతో 'బాబూజీ' అని పిలిచేవారు. అయితే ప్రధానమంత్రి అవ్వాల్సిన అవకాశం వచ్చినప్పటికీ, ఒక వివాదాస్పద సంఘటన ఆయన కలను చెదరగొట్టింది. ఈ విషయాన్ని నీరజ చౌదరి తన 'How Prime Ministers Decide' పుస్తకంలో ప్రస్తావించారు. మొరార్జీ దేశాయ్ రాజీనామా తర్వాత ప్రధానమంత్రి పదవికి ప్రధాన పోటీదారుల్లో జగ్జీవన్ రామ్ ఒకరుగా నిలిచారు.
వివరాలు
రక్షణ మంత్రి పదవిలో ఉండగా కీలక పరిణామం
ఈ విషయం అప్పటి ప్రముఖ నేతలు ఇందిరా గాంధీ, చరణ్ సింగ్లకు కూడా తెలిసినదే. ఈ సమయంలో జగ్జీవన్ రామ్ కుమారుడు సురేష్ రామ్కు సంబంధించిన వివాదం ఒక్కసారిగా వెలుగులోకి వచ్చింది. ఒక కళాశాల విద్యార్థినితో అతనికి వివాహేతర సంబంధం ఉందని, వారికి సంబంధించిన ఫొటోలు బయటపడ్డాయని వార్తలు వచ్చాయి. ఆ సమయంలో మేనకా గాంధీ'Surya'అనే పత్రికకు ఎడిటర్గా ఉన్నారు. ఆమె ఆ ఫొటోలను సూర్య పత్రికలో ప్రచురించడంతో పెద్ద ఎత్తున సంచలనం రేగింది. ఆ సమయంలో రక్షణ మంత్రిగా కీలక పదవిలో ఉండటంతో ఈ వివాదం ఆయన ప్రతిష్టపై తీవ్ర ప్రభావం చూపింది. ఇతర మీడియా సంస్థలు ఈ వార్తలను పెద్దగా ప్రచురించకపోయినా, 'సూర్య' పత్రిక మాత్రం ఆ ఫొటోలను ప్రచురించింది.
వివరాలు
అప్పట్లో భారీగా పెరిగిన 'సూర్య' పత్రిక అమ్మకాలు
సురేష్ రామ్ 42 ఏళ్ల వివాహితుడు కాగా, సంబంధం ఉన్న యువతి వయసు కేవలం 20 సంవత్సరాలేనని ఆ పత్రిక పేర్కొంది. ఈ వివాదం కారణంగా జగ్జీవన్ రామ్ ప్రధానమంత్రి పదవి అవకాశాన్ని కోల్పోయారు. అదే సమయంలో ఆ ఫొటోలు ప్రచురించడంతో 'సూర్య' పత్రిక అమ్మకాలు భారీగా పెరిగినట్లు సమాచారం. ఈ చిత్రాలను 'సూర్య'తో పాటు నేషనల్ హెరాల్డ్లో ప్రచురించవద్దని జగ్జీవన్ రామ్, ఇందిరా గాంధీకి సందేశం పంపినట్లు కూడా చెబుతారు. అయితే దీనిపై ఆమె నుంచి సరైన స్పందన రాలేదని కథనాలు పేర్కొంటున్నాయి. ఈ సంఘటనను ప్రముఖ రచయిత ఖుష్వంత్ సింగ్ తన 'సత్యం, ప్రేమ, కొద్దిపాటి ద్వేషం'లో కూడా ప్రస్తావించారు.