NEET UG: నీట్ యూజీలో భారీ మార్పు.. వచ్చే ఏడాది నుంచి పూర్తిగా ఆన్లైన్ పరీక్ష!
ఈ వార్తాకథనం ఏంటి
దేశవ్యాప్తంగా వైద్య విద్య ప్రవేశాల కోసం నిర్వహించే నీట్ యూజీ పరీక్ష విధానంలో కేంద్ర ప్రభుత్వం కీలక మార్పులను ప్రకటించింది. వచ్చే ఏడాది నుంచి ఈ పరీక్షను పూర్తిగా కంప్యూటర్ బేస్డ్ టెస్ట్ (CBT) విధానంలో నిర్వహించనున్నట్లు కేంద్ర విద్యాశాఖ మంత్రి ధర్మేంద్ర ప్రధాన్ వెల్లడించారు. జాతీయ స్థాయి ప్రవేశ పరీక్షల వ్యవస్థలో ఇది ఒక పెద్ద సంస్కరణగా భావిస్తున్నారు. మీడియాతో మాట్లాడిన ఆయన, పేపర్ లీకేజీ కారణంగా రద్దు చేసిన నీట్ యూజీ 2026 పరీక్షను మళ్లీ జూన్ 21న నిర్వహించనున్నట్లు స్పష్టం చేశారు. ఈ రీ-ఎగ్జామ్కు సంబంధించిన అడ్మిట్ కార్డులను జూన్ 14 నాటికి విడుదల చేస్తామని తెలిపారు.
వివరాలు
ప్రశ్నాపత్రం లీక్ అయినట్లు నిర్ధారణ
మే 3న నిర్వహించిన పరీక్ష అనంతరం, మే 7న గెస్ పేపర్పై అనుమానాలు వ్యక్తమయ్యాయని, అనంతరం కొద్ది రోజుల్లోనే ప్రశ్నాపత్రం లీక్ అయినట్లు అధికారులు నిర్ధారించారని వివరించారు. పేపర్ లీక్ నిజమని తేలిన వెంటనే విద్యార్థుల భవిష్యత్తుతో రాజీ పడకూడదని నిర్ణయించి మే12న పరీక్షను రద్దు చేశామని ధర్మేంద్ర ప్రధాన్ పేర్కొన్నారు. పరీక్షల నిర్వహణలో అవకతవకలు, అసాంఘిక శక్తుల జోక్యాన్ని ఏమాత్రం సహించమని ఆయన స్పష్టం చేశారు. ఈ ఘటనపై సీబీఐతో లోతైన దర్యాప్తు జరిపించాలని ఆదేశించినట్లు మంత్రి తెలిపారు. పేపర్ లీక్ వెనుక ఉన్న అసలు మూలాలను వెలికితీయాలని దర్యాప్తు సంస్థలకు సూచించినట్లు చెప్పారు. కష్టపడి చదివే విద్యార్థుల సీట్లను ఏ మాఫియా కూడా దోచుకునే పరిస్థితి రానివ్వమని ఆయన వ్యాఖ్యానించారు.
వివరాలు
పరీక్ష ఫీజును పూర్తిగా తిరిగి చెల్లిస్తాం
గతంలో జరిగిన ఇలాంటి ఘటనల నేపథ్యంలో ఏర్పాటు చేసిన రాధాకృష్ణన్ కమిటీ సిఫార్సులను అమలు చేసినప్పటికీ, పరీక్షల నిర్వహణలో లోపాలు చోటుచేసుకున్నాయని ఆయన అంగీకరించారు. అలాగే నేషనల్ టెస్టింగ్ ఏజెన్సీ (ఎన్టీఏ)లో నిరంతర సంస్కరణలు కొనసాగుతున్నాయని, సుప్రీంకోర్టు సూచనల మేరకు 'జీరో-ఎర్రర్' పరీక్షల నిర్వహణ లక్ష్యంగా వ్యవస్థను మరింత బలోపేతం చేయాల్సిన అవసరం ఉందని అభిప్రాయపడ్డారు. ఇక రద్దయిన పరీక్షకు హాజరైన అభ్యర్థులకు చెల్లించిన పరీక్ష ఫీజును పూర్తిగా తిరిగి ఇస్తామని మంత్రి హామీ ఇచ్చారు. త్వరలో నిర్వహించే రీ-ఎగ్జామ్ను ఉచితంగా నిర్వహిస్తామని తెలిపారు. విద్యార్థుల సౌకర్యార్థం పరీక్షకు వారం రోజుల ముందు తమకు అనుకూలమైన పరీక్షా నగరాన్ని ఎంచుకునే అవకాశం కల్పిస్తామని చెప్పారు.