Ravindra Kaushik: బ్లాక్ టైగర్ రవీంద్ర కౌశిక్ వర్ధంతి: దేశం కోసం ప్రాణత్యాగం చేసిన గూఢచారి గాథ
ఈ వార్తాకథనం ఏంటి
భారత గూఢచార చరిత్రలో చిరస్మరణీయంగా నిలిచిపోయిన పేరు'బ్లాక్ టైగర్'రవీంద్ర కౌశిక్. దేశ రక్షణ కోసం తన జీవితాన్నే పణంగా పెట్టిన ఈ మహా దేశభక్తుడి వర్ధంతి నేడు(మార్చి 23). ఈ సందర్భంగా సోషల్ మీడియాలో నెటిజన్లు ఆయన త్యాగాన్ని స్మరించుకుంటూ ఘన నివాళులు అర్పిస్తున్నారు. నటుడి నుంచి గూఢచారి వరకూ.. 1952లో రాజస్థాన్లోని శ్రీగంగానగర్లో జన్మించిన రవీంద్ర కౌశిక్ సాధారణ మధ్యతరగతి కుటుంబంలో పెరిగారు. మొదట రంగస్థల నటుడిగా తన ప్రయాణాన్ని ప్రారంభించారు. అయితే, ఆయన ప్రతిభను గమనించిన భారత గూఢచార సంస్థ 'రా' అధికారులు 23 ఏళ్ల వయసులోనే ఆయనను ఎంపిక చేశారు. దేశ భద్రత కోసం అత్యంత సాహసోపేతమైన బాధ్యతను స్వీకరించిన కౌశిక్,పాకిస్థాన్లో గూఢచర్యం కోసం ప్రత్యేకంగా శిక్షణ పొందారు.
వివరాలు
పాక్ సైన్యంలోకి ప్రవేశం.. మేజర్ స్థాయి వరకు..
ఇస్లాం సంప్రదాయాలు, ఉర్దూ భాషలో ప్రావీణ్యం సాధించి, 'నబీ అహ్మద్ షాకిర్' అనే కొత్త గుర్తింపుతో పాకిస్థాన్లో ప్రవేశించారు. పాకిస్థాన్లో లా డిగ్రీ పూర్తి చేసిన కౌశిక్, అక్కడి సైన్యంలోనే చేరి ఆశ్చర్యపరిచారు. తన ప్రతిభ, తెలివితో మేజర్ హోదా వరకు ఎదిగారు. శత్రు దేశంలో కీలక స్థానంలో ఉంటూనే భారతదేశానికి అత్యంత విలువైన రహస్య సమాచారాన్ని అందించారు. 1979 నుంచి 1983 మధ్య కాలంలో ఆయన అందించిన సమాచారం వల్ల వేలాది మంది భారత సైనికుల ప్రాణాలు కాపాడబడ్డాయని చెబుతారు.
వివరాలు
'బ్లాక్ టైగర్' బిరుదు.. కానీ చేదు ముగింపు
కౌశిక్ ధైర్యసాహసాలకు ముగ్ధురాలైన అప్పటి ప్రధాని ఇందిరా గాంధీ, ఆయనకు 'బ్లాక్ టైగర్' అనే బిరుదు ఇచ్చి సత్కరించారు. అయితే, మరో గూఢచారి చేసిన చిన్న పొరపాటు కారణంగా కౌశిక్ అసలు గుర్తింపు బయటపడింది. దాంతో పాక్ సైన్యానికి చిక్కిన ఆయన, ఎన్నో సంవత్సరాలు జైల్లో అమానుష హింసను ఎదుర్కొన్నారు. అయినప్పటికీ, దేశ రహస్యాలను మాత్రం ఎట్టి పరిస్థితుల్లోనూ బయటపెట్టలేదు. ముల్తాన్ జైలులో చివరి శ్వాస చివరకు 2001లో పాకిస్థాన్లోని ముల్తాన్ జైలులో గుండెపోటుతో రవీంద్ర కౌశిక్ కన్నుమూశారు. తన చివరి వరకు దేశభక్తిని వదలని ఈ నిశ్శబ్ద సైనికుడి త్యాగం భారత చరిత్రలో చిరస్థాయిగా నిలిచిపోతుంది.
వివరాలు
నెటిజన్ల డిమాండ్
కౌశిక్ వర్ధంతి సందర్భంగా సోషల్ మీడియాలో నెటిజన్లు స్పందిస్తున్నారు. ఆయనలాంటి అజ్ఞాత వీరులకు తగిన గుర్తింపు ఇవ్వాలని, వారి కుటుంబాలకు ప్రభుత్వం పూర్తి స్థాయిలో అండగా నిలవాలని కోరుతున్నారు.