Rekha Nayak BRS : గులాబీ పార్టీకి ఎమ్మెల్యే రేఖానాయక్‌ గుడ్ బై
ఈ వార్తాకథనం ఏంటి
తెలంగాణలో రాజకీయ ముసలం జోరు అందుకుంటోంది.మరో 2 నెలల్లో రాష్ట్రంలో అసెంబ్లీకి ఎన్నికలు జరగనున్నందున పొలిటికల్ హీట్ పెరిగిపోయింది.
ఈ మేరకు ఖానాపూర్ అధికార పార్టీ ఎమ్మెల్యే రేఖా నాయక్ పార్టీకి, ప్రాథమిక సభ్వత్వానికి రాజీనామా చేస్తున్నట్లు ప్రకటించారు.
బీఆర్ఎస్ పార్టీలో మహిళలకు గౌరవం, సముచిత స్థానం లేదని, ఈ క్రమంలోనే పార్టీని వీడుతున్నానని తెలిపారు.
అయితే అసెంబ్లీ ఎన్నికలకు గడువు సమీపిస్తున్న వేళ అసెంబ్లీకి కచ్చితంగా పోటీ చేస్తానని తేల్చి చెప్పారు. కానీ ఏ పార్టీ నుంచి బరిలోకి దిగనున్నారో అనే విషయాన్ని త్వరలోనే ప్రకటిస్తానన్నారు.
రేఖా భర్త శ్యామ్‌ నాయక్ మాత్రం ఇప్పటికే కాంగ్రెస్‌లో చేరిపోయారు.ఈ నేపథ్యంలోనే రేఖా కూడా కాంగ్రెస్ తీర్థం పుచ్చుకోనున్నట్లు నియోజకవర్గంలో జోరుగా చర్చ సాగుతోంది.
DETAILS
కాంగ్రెస్ ఖానాపూర్ టిక్కెట్ రేసులో రేఖా నాయక్
ఆగస్ట్ 21న అన్ని పార్టీల కంటే ముందుగానే బీఆర్ఎస్ అధ్యక్షుడు, సీఎం కేసీఆర్‌ తమ పార్టీ అభ్యర్థులను ప్రకటించారు.
ఈ మేరకు ఖానాపూర్ నియోజకవర్గ బీఆర్ఎస్ అభ్యర్థిగా బుక్యా జాన్సన్ రాథోడ్ నాయక్ పేరును ప్రకటించారు.
దీంతో అసెంబ్లీ ఎన్నికల అభ్యర్థుల జాబితాలో తన పేరు లేకపోవడంతో రేఖా నాయక్ తీవ్ర అసంతృప్తికి గురయ్యారు.
ఈ మధ్యే టీపీసీసీ కార్యాలయం గాంధీ భవన్ లో రేఖా నాయక్ కూడా ఖానాపూర్ అభ్యర్థిగా తన పేరిట ఓ అప్లికేషన్ పెట్టుకున్నారు.
ఖానాపూర్ మున్సిపాలిటీ అభివృద్ధిని మంత్రి కేటీఆర్ అడ్డుకున్నారని రేఖా ఆరోపించారు. ఈ మేరకు జాన్సన్ నాయక్ ఎలా గెలుస్తావో చూస్తా బిడ్డా అంటూ సవాల్ చేశారు. బీఆర్ఎస్ లో మహిళలకు విలువలేదన్నారు.