Chandrababu Naidu: ఆంధ్రప్రదేశ్‌ను దేశంలో లాజిస్టిక్స్ హబ్‌గా తీర్చిదిద్దాలి: సీఎం చంద్రబాబు
ఈ వార్తాకథనం ఏంటి
ఆంధ్రప్రదేశ్‌ను దేశవ్యాప్తంగా ప్రముఖ లాజిస్టిక్స్ కేంద్రంగా రూపుదిద్దే దిశగా ముఖ్యమంత్రి చంద్రబాబు నాయుడు రైల్వే ప్రాజెక్టుల పురోగతిపై సోమవారం సచివాలయంలో ఉన్నత స్థాయి సమీక్షా సమావేశం నిర్వహించారు. రాష్ట్రంలో ప్రస్తుతం ఉన్న కాకినాడ, విశాఖ పోర్టులు మాత్రమే కాకుండా నిర్మాణ దశలో ఉన్న మూలపేట, రామాయపట్నం వంటి కొత్త పోర్టులకు కూడా రైల్వే కనెక్టివిటీ తప్పనిసరిగా కల్పించాలని ఆయన అధికారులను ఆదేశించారు. రాష్ట్ర ఉత్పత్తుల రవాణా వ్యవస్థను సులభతరం చేసి, లాజిస్టిక్స్ రంగాన్ని బలోపేతం చేయడంలో రైల్వే రవాణా మార్గాలు కీలక పాత్ర పోషిస్తాయని సీఎం స్పష్టం చేశారు.
వివరాలు
హైస్పీడ్ రైల్వే కారిడార్లపై దృష్టి సారించిన సీఎం
రాష్ట్ర భవిష్యత్ రవాణా అవసరాలను దృష్టిలో ఉంచుకొని హైస్పీడ్ ఎలివేటెడ్ రైల్వే కారిడార్ల ప్రతిపాదనలను సీఎం చంద్రబాబు సమీక్షించారు. హైదరాబాద్-బెంగళూరు, అమరావతి మీదుగా హైదరాబాద్-చెన్నై మార్గాల్లో ఈ ప్రాజెక్టులు చేపట్టే అవకాశాలపై చర్చించారు. అమరావతిలో నిర్మించబోయే అంతర్జాతీయ విమానాశ్రయానికి అనుసంధానం కలిగించేలా బుల్లెట్ ట్రైన్ ప్రణాళికలు సిద్ధం చేయాలని సూచించారు. అదేవిధంగా తిరుపతిని కలుపుతూ చెన్నై-బెంగళూరు హైస్పీడ్ కారిడార్ ఏర్పాటు చేయాలని ఆదేశించారు. ఖరగ్‌పూర్ నుంచి చెన్నై వరకు నిర్మించబోయే డెడికేటెడ్ ఫ్రైట్ కారిడార్ పనులను వేగవంతం చేయాలని కూడా సూచించారు. ఇప్పటి వరకు ఉత్తర-దక్షిణ మార్గాలపైనే ఎక్కువ దృష్టి సారించామని, ఇకపై తూర్పు-పశ్చిమ రాష్ట్రాలను కలుపుతూ కొత్త ప్రాజెక్టులకు ప్రాధాన్యత ఇవ్వాలని సీఎం పేర్కొన్నారు.
వివరాలు
అమరావతి, గన్నవరంలో కొత్త రైల్వే టెర్మినళ్లు.. ఐకానిక్ స్టేషన్ల అభివృద్ధి
రాజధాని ప్రాంతంలోని రైల్వే మౌలిక సదుపాయాల అభివృద్ధి అంశంపై చర్చిస్తూ, అమరావతి మరియు గన్నవరంలో కొత్త రైల్వే కోచింగ్ టెర్మినళ్లు నిర్మించాలనే రైల్వే శాఖ ప్రతిపాదనకు సీఎం చంద్రబాబు ఆమోదం తెలిపారు. ఇందుకోసం రాష్ట్ర ప్రభుత్వం అవసరమైన భూమి కేటాయిస్తుందని హామీ ఇచ్చారు. విజయవాడ, గుంటూరు నగరాల్లో ఇప్పటికే కోచింగ్ టెర్మినల్ విస్తరణ పనులు కొనసాగుతున్నాయని అధికారులు వివరించారు. రాష్ట్రంలోని విజయవాడ, విశాఖపట్నం, తిరుపతి స్టేషన్లను 'ఐకానిక్ స్టేషన్లు'గా తీర్చిదిద్దాలని సీఎం ఆదేశించారు. కొత్తగా నిర్మించబోయే అమరావతి రైల్వే స్టేషన్ వినూత్న డిజైన్‌తో రూపుదిద్దుకోవాలని సూచించారు. తిరుపతిలో ప్రయాణికుల సౌకర్యార్థం స్కైవాక్ నిర్మాణం చేపట్టాలని, విశాఖలో జ్ఞానాపురం వైపున స్టేషన్‌ను విస్తరించడం ద్వారా ట్రాఫిక్ సమస్యలను తగ్గించవచ్చని సూచించారు.
వివరాలు
రాష్ట్రవ్యాప్తంగా రైల్వే స్టేషన్ల ఆధునీకరణ
రాష్ట్రంలో మొత్తం 73 స్టేషన్లను 'అమృత్ భారత్ స్టేషన్స్' పథకం కింద ఆధునీకరిస్తున్నట్లు అధికారులు వివరించారు. గోదావరి పుష్కరాల నాటికి రాజమండ్రి రైల్వే స్టేషన్ అభివృద్ధి పనులను పూర్తి చేస్తామని తెలిపారు. పుష్కరాల సందర్భంగా వివిధ ప్రాంతాల నుంచి మొత్తం 1,012 ప్రత్యేక రైళ్లు నడిపేందుకు ఏర్పాట్లు జరుగుతున్నాయని చెప్పారు. ఈ సమీక్షా సమావేశంలో రాష్ట్ర మౌలిక సదుపాయాలు మరియు పెట్టుబడుల శాఖ మంత్రి బీసీ జనార్ధన్ రెడ్డి, ప్రత్యేక ప్రధాన కార్యదర్శి ఎం.టి. కృష్ణబాబు, దక్షిణ మధ్య రైల్వే జనరల్ మేనేజర్ సంజయ్ శ్రీవాస్తవతో పాటు పలువురు ఉన్నతాధికారులు పాల్గొన్నారు.