Andhra Pradesh: వ్యవసాయ ధోరణిలో మార్పులు.. మొక్కజొన్న వైపు రైతుల మొగ్గు
ఈ వార్తాకథనం ఏంటి
ఉమ్మడి గుంటూరు,కృష్ణా, ప్రకాశం జిల్లాల రైతుల వ్యవసాయంలో పంటల సరళి మారుతోంది. సంప్రదాయ పంటల స్థానంలో ఇప్పుడు సుబాబుల్‌, యూకలిప్టస్‌, సరుగుడు వంటి వాణిజ్య వృక్షాల సాగు దిశగా అడుగులు వేస్తున్నారు. ఈ మొక్కలు ఒక్కసారి నాటి,మూడు సంవత్సరాలు పెంచితే, కర్రలుగా కోసుకోవచ్చు. గతంలో టన్ను ధర రూ.1,000 నుంచి రూ.1,500 మధ్య ఉండగా, ప్రస్తుతం ఇది సగటున రూ.5,000-6,000 వరకు పెరిగింది. మొదటి సంవత్సరం ఎకరానికి సుమారు రూ.15,000 ఖర్చు పెట్టి, మూడు సంవత్సరాలు సంరక్షిస్తే తదుపరి విడతలుగా ఆదాయం అందుతుంది. సాధారణ విత్తనంతో సాగు చేస్తే ఎకరాకు 25 టన్నుల దిగుబడి వచ్చే అవకాశం ఉంటే, క్లోనింగ్ మొక్కలతో సాగు చేస్తే ఇది 40 టన్నుల వరకు పెరుగుతుందని అంచనా.
వివరాలు
మొక్కజొన్న - రైతుల ఆశాజ్యోతి
కాగిత పరిశ్రమలు యూకలిప్టస్‌ క్లోనింగ్ మొక్కను ఒక్కొక్కటిని రూ.3కు, సుబాబుల్‌ మొక్కను రూ.4.25కు విక్రయిస్తున్నాయి. ఈ నేపథ్యంలో పత్తి, మిరప, సెనగ, పొగాకు వంటి పంటల నుంచి రైతులు మళ్లిపోతున్నారు. కొందరు రైతులు దీర్ఘకాలిక ఆదాయాన్ని అందించే కుంకుడు తోటలు కూడా ఏర్పాటు చేస్తున్నారు. ప్రస్తుతానికి రాష్ట్రవ్యాప్తంగా రైతులకు భరోసాగా నిలుస్తున్న ఏకైక పంట మొక్కజొన్న. మార్కెట్లో క్వింటాలుకు రూ.2,100 నుంచి రూ.2,600 వరకు ధర లభిస్తోంది. ఎకరాకు సుమారు రూ.30-35 వేల వరకు పెట్టుబడి పడుతున్నా,ఖర్చులు మినహాయించి రూ.50 వేల వరకు లాభం వస్తుందని రైతుల అంచనా. చాలా ప్రాంతాల్లో వర్షాలు పడుతున్నప్పటికీ, ఖరీఫ్‌ పంటలు వేయడం లేదు. వానాకాలం వదిలేసి రబీ సీజన్‌లో మొక్కజొన్న సాగుకు రైతులు సిద్ధమవుతున్నారు.
వివరాలు
సెనగ సాగు - కార్పొరేట్ శైలిలో సాగు
పత్తి పంట వేసిన కొంతమంది రైతులు రెండు తీతల తర్వాత పంటను తొలగించి, మొక్కజొన్న వేసే యోచనలో ఉన్నారు. ఈ ఏడాది రాష్ట్రంలో మొక్కజొన్న సాగు విస్తృతి భారీగా పెరిగే అవకాశముంది. ఇథనాల్ తయారీ, కోళ్ల దాణా, ఇతర వినియోగాల కోసం డిమాండ్‌ పెరగడం ఇందుకు ప్రధాన కారణం. ఇప్పుడు సెనగ సాగు కేవలం ఉమ్మడి కడప, ప్రకాశం జిల్లాలకే పరిమితం కాదు. ఇది రాష్ట్రంలోని అనేక జిల్లాలకు విస్తరించి, కార్పొరేట్ వ్యవసాయాన్ని తలపించే స్థాయికి చేరుకుంది. విత్తనం నాటడం నుంచి, అంతరసేద్యం, పురుగు మందుల పిచికారి, నూర్పిడి వరకు అన్నీ ట్రాక్టర్ల సహాయంతోనే జరుగుతున్నాయి. కొంతమంది రైతులు వందలకు పైగా ఎకరాలను కౌలుకు తీసుకుని,ఎకరాకు రూ.15,000-17,000 వరకు యజమానులకు ముందుగానే చెల్లిస్తున్నారు.
వివరాలు
సెనగ సాగు - కార్పొరేట్ శైలిలో సాగు
ముఖ్యంగా ప్రకాశం, బాపట్ల జిల్లాల రైతులు ఇతర జిల్లాలకు వెళ్లి వేల ఎకరాల్లో సెనగ సాగు చేస్తున్నారు. ఉపాధ్యాయులు, వ్యాపారులు కూడా ఇద్దరిముగ్గురు కలిసి పెట్టుబడులు సమకూర్చి సెనగ సాగుకు ముందుకొస్తున్నారు. వారు లేకపోతే ఈ ఏడాది గ్రామాల్లో పొలాలను కౌలుకు తీసుకునేవారు కనిపించకుండా పోతారని పల్నాడు జిల్లా సత్తెనపల్లి మండలం గుడిపూడి గ్రామ రైతులు చెబుతున్నారు.
వివరాలు
వరుస నష్టాలే కారణం
రైతులు గత ఐదు సంవత్సరాలుగా వ్యవసాయంలో వరుసగా నష్టాలనే ఎదుర్కొంటున్నారు. ప్రతి సంవత్సరం నష్టాల నుండి బయటపడతామన్న ఆశతో అప్పు తెచ్చి పెట్టుబడులు పెడుతున్నారు. కానీ చివరకు ఏదో ఒక కారణంగా నష్టపోతున్నారు.ఉదాహరణకు,గతేడాది పొగాకు ధర క్వింటాలకు రూ.15 వేలు వరకూ లభించడంతో సాగు విస్తరించగా, చివరికి కొనుగోలుదారులు దొరకలేదు. మిరప పంటలో ఎకరాకు రూ.3 లక్షల వరకు పెట్టుబడి పెట్టినా, రూ.లక్ష వరకు నష్టం రావడంతో రైతులు నిరాశకు గురయ్యారు.
వివరాలు
వరుస నష్టాలే కారణం
సెనగ, కందులు కూడా మార్కెట్లో విక్రయించబడలేదు. పత్తి పంటనూ లాభదాయకంగా భావించలేని పరిస్థితి ఏర్పడింది. ఈ పరిస్థితుల్లో అనేక మంది కౌలు రైతులు ఈ సంవత్సరం వ్యవసాయం చేయడం మానేశారు. గతంలో ఎకరాకు రూ.20-35 వేల వరకు కౌలుకు తీసుకున్న పొలాలను ఇప్పుడు రూ.10 వేలకైనా తీసుకోవాలనుకునే వారు లేరు. పొలాలను ఖాళీగా వదిలేయలేక భూమి యజమానులు సామాజికవనాల సాగు వైపు దృష్టి మళ్లిస్తున్నారు.