Sammakka Sagar Project: సమ్మక్క సాగర్‌ ప్రాజెక్ట్‌కు ఛత్తీస్‌గఢ్‌ అధికారికంగా అంగీకారం.. పరిహారం చెల్లింపు, పునరావాస చర్యలపై హామీ
ఈ వార్తాకథనం ఏంటి
సమ్మక్క సాగర్‌ ప్రాజెక్టు నిర్మాణంపై ఛత్తీస్‌గఢ్‌ రాష్ట్రం ఎలాంటి అభ్యంతరాలు లేవని స్పష్టం చేసింది. తెలంగాణ నీటి వనరుల శాఖ మంత్రి ఉత్తమ్‌కుమార్‌రెడ్డి, ఇంజినీర్ల బృందంతో కలిసి సోమవారం రాయ్‌పుర్‌ చేరి ఆ రాష్ట్ర సీఎం విష్ణుదేవ్‌ సాయ్‌తో సమావేశమయ్యారు. ఈ సమావేశంలో ప్రాజెక్ట్‌కు నిరభ్యంతర (No Objection) పత్రం ఇవ్వడానికి సీఎం సూత్రప్రాయంగా అంగీకరించారు. ములుగు జిల్లాలో తుపాకులగూడెం సమీపంలో గోదావరి నదిపై నిర్మిస్తున్న బ్యారేజీలో 6.7 టీఎంసీ నీటిని నిల్వ చేయనున్నట్లు ఉత్తమ్‌కుమార్‌రెడ్డి వివరించారు. ఈ సందర్భంలో ప్రాజెక్టు ప్రగతిపై పవర్‌పాయింట్‌ ప్రజెంటేషన్ కూడా ఇచ్చారు.
వివరాలు
పరిహారం చెల్లించడానికి తెలంగాణ ప్రభుత్వం సిద్ధం
బ్యారేజీ వెనుక ఏర్పడే జలాలు ఛత్తీస్‌గఢ్‌లోని బీజాపుర్‌ జిల్లా భూపాలపట్నం తహసీల్‌లో 54.03 హెక్టార్ల నదీతీర ప్రాంతాన్ని,19.41 హెక్టార్ల భూములను ముంపునకు గురిచేస్తాయని ఉత్తమ్ వివరించారు. ముంపుతో సంబంధిత రాష్ట్ర ఆందోళనను పరిగణనలోకి తీసుకొని,తెలంగాణ ప్రభుత్వం పునరావాస చర్యలకు ప్రతిపాదనలు సిద్ధం చేసింది. ఐఐటీ ఖరగ్‌పుర్‌ అధ్యయనం చేసిన నివేదిక ఆధారంగా, ముంపు బాధిత భూమి యజమానులకు, ఇతర భూములకు సరైన పరిహారం చెల్లించడానికి ప్రభుత్వం సిద్ధంగా ఉందని ఆయన తెలిపారు. ఛత్తీస్‌గఢ్‌ చట్టాల ప్రకారం పరిహారం అందిస్తామని,ఎన్వోసీ ఇచ్చే సమయానికి చెల్లింపులు పూర్తిచేస్తామని ఆయన స్పష్టం చేశారు. ఈ విషయంపై స్పందించిన సీఎం విష్ణుదేవ్‌ సాయ్‌ "ఈ అంశాన్ని వీలైనంత త్వరగా పరిష్కరిస్తాం, త్వరలో అధికారిక నిర్ణయం తీసుకుంటాం" అని చెప్పారు.
వివరాలు
సుదీర్ఘకాల సమస్యకు పరిష్కారం: మంత్రి ఉత్తమ్‌కుమార్‌రెడ్డి
ప్రాజెక్టు ద్వారా తెలంగాణలో సాగునీటి సమస్యలు తగ్గే అవకాశం ఉందని ఆయన ఆశాభావం వ్యక్తం చేశారు. ఛత్తీస్‌గఢ్‌ సీఎంతో భేటీ అనంతరం మీడియాతో మాట్లాడిన మంత్రి ఉత్తమ్‌కుమార్‌రెడ్డి, "ప్రతిపాదనపై సానుకూల స్పందన చూపినందుకు ఛత్తీస్‌గఢ్‌ సీఎం విష్ణుదేవ్‌ సాయ్‌కు ధన్యవాదాలు. సుదీర్ఘకాలంగా ఉన్న సమస్యకు ఇది ఒక గొప్ప అడుగు. భూసేకరణ, పరిహారం, పునరావాస బాధ్యతలను రాష్ట్రం పూర్తిగా తీసుకుంటుందని ఓ పత్రంలో భరోసా ఇచ్చాం" అన్నారు. ప్రాజెక్టుకు కేంద్ర జలసంఘం నుంచి తుది ఆమోదం పొందడానికి ఛత్తీస్‌గఢ్‌ ఎన్వోసీ తప్పనిసరి. తెలంగాణలోని నల్గొండ, వరంగల్‌ జిల్లాల్లోని ఫ్లోరైడ్‌ ప్రభావిత ప్రాంతాలకు, సాగు,తాగునీటి అవసరాల కోసం ఈ ప్రాజెక్ట్ నిర్మించడం జరుగుతుంది.
వివరాలు
బ్యారేజీ, మూడు పంపుహౌస్‌లు, 90 కిలోమీటర్ల సొరంగాలు, కాలువలు
శ్రీరామసాగర్‌ రెండో దశ కింద 3.91 లక్షల ఎకరాలకు నీరు అందిస్తుంది. రామప్పపాకాల లింక్‌ కాలువ ద్వారా 26,000 ఎకరాల కొత్త భూభాగానికి సాగునీరు అందుతుంది. వరంగల్‌, సూర్యాపేట, మహబూబాబాద్, జనగామ, ఖమ్మం, నల్గొండ జిల్లాలకు సాగునీటి భరోసా లభిస్తుంది. ఈ ప్రాజెక్ట్‌లో బ్యారేజీ, మూడు పంపుహౌస్‌లు, 90 కిలోమీటర్ల సొరంగాలు, కాలువలు కూడా నిర్మించారు. మంత్రి ఉత్తమ్‌కుమార్‌రెడ్డి వెంట నీటి వనరుల శాఖ ముఖ్య కార్యదర్శి రాహుల్‌ బొజ్జా, సలహాదారు ఆదిత్యనాథ్‌ దాస్, ఈఎన్‌సీ అంజద్‌ హుస్సేన్, సంయుక్త కార్యదర్శి శ్రీనివాస్‌, ఓఎస్డీ భీంప్రసాద్‌, సీఈ విజయభాస్కర్‌ తదితరులు ఉన్నారు.