CJP Leaders Arrest: సీజేపీ నేతలకి 5 రోజుల జ్యుడీషియల్ కస్టడీ..!
ఈ వార్తాకథనం ఏంటి
జంతర్ మంతర్‌లోకి అక్రమంగా ప్రవేశించిన కేసులో కాక్రోచ్ జనతా పార్టీ (CJP) నేతలు సౌరవ్ దాస్, ఆశుతోష్ రంకాలకు ఐదు రోజుల జ్యుడీషియల్ కస్టడీ విధించారు. వీరితో పాటు అజింక్య షిండేపై కూడా కేసులు నమోదు చేశారు. బాండ్ నిబంధనలను ఉల్లంఘించడం,ప్రభుత్వ అధికారుల విధులకు ఆటంకం కలిగించడం వంటి అభియోగాలు వారిపై ఉన్నాయి. బుధవారం ఉదయం 8 గంటల సమయంలో ఈ ముగ్గురినీ ఢిల్లీలోని మందిర్ మార్గ్ ప్రాంతంలో ఉన్న మేజిస్ట్రేట్ ఎదుట పోలీసులు హాజరుపరిచారు. ఢిల్లీ పోలీసుల సమాచారం ప్రకారం.. సౌరవ్ దాస్,ఆశుతోష్ రంకా మరోసారి భారతీయ నాగరిక్ సురక్షా సంహిత (BNSS)లోని సెక్షన్ 163 నిబంధనలను ఉల్లంఘించినట్లు ఆరోపణలు ఉన్నాయి.
వివరాలు
బాండ్ నిబంధనల ఉల్లంఘన
గతంలోనూ ఇలాంటి ఉల్లంఘనలకు పాల్పడినందున,వారు హామీ పత్రంలో పేర్కొన్న షరతులను కూడా ఉల్లంఘించినట్లు పోలీసులు తెలిపారు.
ఈ విషయాలను పరిగణనలోకి తీసుకున్న కోర్టు వారిద్దరినీ ఐదు రోజుల జ్యుడీషియల్ కస్టడీకి పంపించింది.
మంగళవారం ఉదయం ఈ ముగ్గురు నేతలు పోలీసుల బారికేడ్లను దాటి జంతర్ మంతర్‌లోకి ప్రవేశించారు.
అనంతరం ప్రధాన ఎన్నికల కమిషనర్(CEC)జ్ఞానేశ్ కుమార్ రాజీనామా చేయాలంటూ నినాదాలు చేశారు.
దీంతో పోలీసులు వారిని అదుపులోకి తీసుకున్నారు. గతంలో ఓ నిరసన సందర్భంగా అరెస్టయిన దాస్, రంకాలు రూ.50 వేల బాండ్ సమర్పించి విడుదలయ్యారు.
ఏడాది పాటు శాంతిభద్రతలకు విఘాతం కలిగించే ఘటనల్లో పాల్గొనబోమని అప్పట్లో హామీ ఇచ్చారు.
అయితే,ఈసారి బాండ్ నిబంధనల ఉల్లంఘనతో పాటు అక్రమ ప్రవేశం వంటి ఆరోపణలను ఎదుర్కొంటున్నారు.
వివరాలు
తీహార్ జైలుకు పంపించే అవకాశం
ఈ ఘటనపై సీజేపీ న్యాయ బృందం అధిపతి రత్నా సింగ్ సోషల్ మీడియా వేదిక ఎక్స్‌లో స్పందించారు.
జంతర్ మంతర్ ఘటనకు సంబంధించి సౌరవ్ దాస్, ఆశుతోష్ రంకా, అజింక్య షిండేలను పార్లమెంట్ స్ట్రీట్ పోలీస్ స్టేషన్‌లో అరెస్టు చేసినట్లు తెలిపారు.
అక్రమ ప్రవేశం, బాండ్ నిబంధనల ఉల్లంఘన, ప్రభుత్వ అధికారుల విధులకు ఆటంకం కలిగించడం వంటి ఆరోపణలతో కేసులు పెట్టారని పేర్కొన్నారు.
అర్ధరాత్రి వరకు వారిని న్యాయవాదులను కలవనివ్వలేదని, తెల్లవారుజామున 3 గంటలకు ప్రైవేట్ వ్యాన్‌లో పార్లమెంట్ స్ట్రీట్ పోలీస్ స్టేషన్‌కు తీసుకొచ్చారని ఆరోపించారు.
ఉదయం కోర్టులో హాజరుపరచనున్నారని, తీహార్ జైలుకు పంపించే అవకాశం ఉందని చెప్పారు.
ఈ చర్యలు చట్టవిరుద్ధమైనవని ఆరోపించినప్పటికీ, నేతల ఆత్మవిశ్వాసం తగ్గలేదని రత్నా సింగ్ పేర్కొన్నారు.
ట్విట్టర్ పోస్ట్ చేయండి
రత్నా సింగ్ చేసిన ట్వీట్
#BREAKING: Delhi Police arrests Saurav Das, Ashutosh Ranka, and Ajinkya Shinde at Parliament Street Police Station in today’s Jantar Mantar case.
— Ratna Singh (@whattalawyer) October 13, 2026
Trespass, bond violation, obstruction of public official’s duty, etc.
They’ll be produced before the SCM Court in the morning. A…
వివరాలు
రాజధానిలో భద్రత మరింత కట్టుదిట్టం
ప్రత్యేక ఓటర్ల జాబితా సవరణ (SIR)లో అక్రమాలు జరిగాయంటూ సీజేపీతో పాటు పలు సంఘాలు ఢిల్లీలో నిరసనలు చేపడుతున్న నేపథ్యంలో ఈ అరెస్టులు జరిగాయి.
దీంతో రాజధానిలో భద్రతను మరింత కట్టుదిట్టం చేశారు.
అక్టోబర్ 11న ఢిల్లీ పోలీస్ కమిషనర్ అనురాగ్ కుమార్ నిరసనలు,ఆందోళనల కోసం రామ్‌లీలా మైదాన్, బురారీ గ్రౌండ్, సీబీడీ గ్రౌండ్‌లను గుర్తించిన ప్రాంతాలుగా ప్రకటించారు.
అదే సమయంలో అనుమతించిన నిరసన ప్రాంతాల జాబితా నుంచి జంతర్ మంతర్‌ను తొలగించారు.
ఈ నిర్ణయాన్ని సీజేపీ వ్యతిరేకిస్తోంది. ఢిల్లీ నడిబొడ్డున నిరసనలకు అనుమతి ఇవ్వకపోతే ప్రజా ఆందోళనలకు ప్రచారం, ప్రభావం తగ్గిపోతాయని ఆ పార్టీ అభిప్రాయపడుతోంది.