సెల్ఫీ ఛాలెంజ్‌పై కౌంటర్; సుపరిపాలనపై చంద్రబాబుకు సవాల్ విసిరిన ఏపీ సీఎం జగన్
ఈ వార్తాకథనం ఏంటి
టిడ్కో ఇళ్లపై టీడీపీ అధినేత చంద్రబాబు నాయుడు విసిరిన సెల్ఫీ ఛాలెంజ్‌పై ఆంధ్రప్రదేశ్ సీఎం జగన్ కౌంటర్ ఇచ్చారు. సెల్ఫీ ఛాలెంజ్ అంటే కేవలం నాలుగు ఫొటోలను పోస్ట్ చేయడం కాదని వైఎస్ జగన్మోహన్‌ రెడ్డి హితవు పలికారు.
వైసీపీ హయాంలో సంక్షేమ పథకాల అమలుపై కుటుంబాలు, గ్రామాలు, జిల్లాల వారీగా సవాల్ విసరాలని చంద్రబాబు నాయుడికి సీఎం జగన్ కౌంటర్ ఇచ్చారు.
వైఎస్ఆర్ ఈబీసీ నేస్తం పథకం కింద రాష్ట్రవ్యాప్తంగా రెడ్డి, కమ్మ, ఆర్యవైశ్య, బ్రాహ్మణ, క్షత్రియ, వెలమ తదితర ఓసీ వర్గాలకు చెందిన అర్హులైన 4,39,068మంది పేద మహిళల ఖాతాల్లోకి రూ.658.6కోట్ల ఆర్థిక సహాయాన్ని బుధవారం సీఎం జగన్ జమచేశారు. అనంతరం మార్కాపురంలో నిర్వహించిన జరిగిన సభలో జగన్ ప్రసంగించారు.
ఆంధ్రప్రదేశ్
సెల్ఫీ తీసుకునే నైతిక హక్కు చంద్రబాబుకు ఉందా?: జగన్
సంక్షేమ పథకాల అమలుకు సంబంధించిన వాస్తవాలు ప్రజలకు తెలుసునని జగన్ అన్నారు. చంద్రబాబుతో పాటు, ఆయన మీడియా ఛానెళ్లు నిజాన్ని దాచిపెట్టి అసత్యాన్ని ప్రచారం చేస్తున్నాయని మండిపడ్డారు.
టీడీపీ హయాంలో ఇళ్ల స్థలాలు ఎందుకు ఇవ్వలేకపోయారని ప్రశ్నించారు. తాము 30 లక్షల ఇళ్ల స్థలాలు ఇచ్చామని, వాటి ముందుకు సెల్ఫీ తీసుకునే నైతిక హక్కు చంద్రబాబుకు ఉందా? అని అడిగారు.
ఈబీసీ నేస్తం లాంటి పథకం దేశంలో మరెక్కడా లేదని చెప్పిన జగన్, ఎన్నికల మేనిఫెస్టోలో భాగం కానప్పటికీ ప్రభుత్వం అమలు చేస్తోందన్నారు. తనది మహిళా స్నేహపూర్వక ప్రభుత్వం కాబట్టి గడిచిన రెండేళ్లలో ఈ పథకం ద్వారా మహిళల ఖాతాల్లో రూ.1,258 కోట్లు జమ చేశామన్నారు.