India-China: అరుణాచల్‌ ప్రదేశ్‌లోని కొన్నిప్రాంతాలకు పేర్లు పెట్టిన చైనా.. తీవ్రంగా మండిపడిన భారత విదేశాంగ శాఖ..
ఈ వార్తాకథనం ఏంటి
అరుణాచల్‌ ప్రదేశ్‌లోని వివిధ ప్రాంతాల పేర్లను మార్చే ప్రయత్నాలను చైనా చేపట్టిన నేపథ్యంలో భారత్‌ తీవ్ర నిరసన వ్యక్తం చేసింది.
ఈ అంశంపై భారత కేంద్ర విదేశాంగ శాఖ స్పందిస్తూ,చైనా వైఖరిని తీవ్రంగా ఖండించింది.
చైనా చేస్తున్న అప్రజాస్వామిక ప్రయత్నాలను భారత్‌ స్పష్టంగా తిరస్కరించింది.
ఈ విషయాన్ని విదేశాంగ శాఖ అధికార ప్రతినిధి రణ్‌ధీర్‌ జైస్వాల్‌ వివరిస్తూ, "భారతదేశంలోని అరుణాచల్‌ప్రదేశ్‌ రాష్ట్రంలోని కొంత ప్రాంతాలకు కొత్త పేర్లు పెట్టేందుకు చైనా నిరర్థక,ఫలించని ప్రయత్నాలు చేస్తోంది.ఇవి పూర్తిగా మా నిబంధనలకు వ్యతిరేకంగా ఉన్నాయి" అని పేర్కొన్నారు.
అలాంటి చర్యలను భారత్‌ తేటతెల్లంగా తిరస్కరిస్తుందని ఆయన స్పష్టం చేశారు.
"అరుణాచల్‌ప్రదేశ్‌ భారతదేశానికి అంతర్భాగం.ఇది విడదీయలేని భాగం.ఏ పేర్లు మార్చినా,ఆ వాస్తవాన్ని మార్చలేరు"అంటూ ఆయన ఘాటుగా వ్యాఖ్యానించారు.
వివరాలు
2017లో ఆరు ప్రాంతాలకు కొత్త పేర్లు
చైనా అరుణాచల్‌ప్రదేశంపై వేసే అర్ధరహిత వ్యాఖ్యలకు భారత ప్రభుత్వం ఎప్పటికప్పుడు గట్టిగా స్పందిస్తూ వస్తోంది.
గత ఏడాది కూడా చైనా అరుణాచల్‌లోని 30 ప్రాంతాలకు చైనీస్‌, టిబెటన్‌ పేర్లను పెట్టే ప్రయత్నం చేసింది.
భారత ప్రభుత్వం ఆ కుట్రను కూడా తక్షణమే వ్యతిరేకించింది. బీజింగ్‌ గతంలో వాస్తవాధీన రేఖ (LAC) వెంబడి ఉన్న అరుణాచల్‌ప్రదేశ్‌లోని కొన్ని ప్రాంతాలకు పేర్లు మార్చే ప్రయత్నంలో నాలుగు విడతల జాబితాలను విడుదల చేసింది.
మొదటిగా 2017లో ఆరు ప్రాంతాలకు కొత్త పేర్లు పెట్టింది.
అనంతరం 2021లో 15 ప్రాంతాలకు, 2023లో 11 ప్రాంతాలకు, 2024లో మరో 30 ప్రాంతాలకు పేర్లను మార్చింది. అయితే, ఈ అన్నీ చర్యలను భారత్‌ ప్రతి దఫా ధీటుగా తిరస్కరిస్తూ వస్తోంది.