Delhi water crisis: ఢిల్లీ నీటి సంక్షోభం.. నేటి మధ్యాహ్నం నుంచి నిరవధిక నిరాహార దీక్ష చేపట్టనున్న అతిషి
హర్యానా నుండి ప్రతిరోజూ 100 మిలియన్ గ్యాలన్ల నీటిని డిమాండ్ చేస్తూ ఢిల్లీ నీటి మంత్రి అతిషి మార్లెనా నేటి(జూన్ 21)నుండి నిరాహార దీక్ష చేస్తున్నారు. సమ్మె ప్రారంభించే ముందు ఆమె రాజ్ఘాట్కు చేరుకుని మహాత్మాగాంధీకి నివాళులర్పించారు. అరవింద్ కేజ్రీవాల్ భార్య సునీతా కేజ్రీవాల్, ఆప్ ఎంపీ సంజయ్ సింగ్, సౌరభ్ భరద్వాజ్ కూడా ఆమె వెంట ఉన్నారు. దక్షిణ ఢిల్లీలోని భోగల్లో అతిషి నిరాహార దీక్షకు కూర్చుంటారు. ఎన్ని ప్రయత్నాలు చేసినా హర్యానా ప్రభుత్వం ఢిల్లీ నీటి వాటా మొత్తాన్ని విడుదల చేయడం లేదని ఆమె ఆరోపించారు. "ఆయన చూపిన బాటలోనే ఈరోజు ఢిల్లీ ప్రజల కోసం నిరాహార దీక్ష చేస్తున్నాను" అని అతిషి ఎక్స్ పోస్ట్లో రాసుకొచ్చారు.
ఇది 'నీటి సత్యాగ్రహం' :అతిషి
అతిషి తన సమ్మెను నీటి సత్యాగ్రహంగా అభివర్ణించారు. " నేను ఈ రోజు నుండి నీటి సత్యాగ్రహాన్ని ప్రారంభిస్తాను.ఢిల్లీ ప్రజలకు హర్యానా నుంచి రావాల్సిన నీటి వాటా వచ్చే వరకు నేను భోగల్, జంగ్పురాలో నిరవధిక నిరాహార దీక్ష చేస్తాను" అని X లో ఒక పోస్ట్లో ఆమె రాశారు. గత రెండు వారాలుగా హర్యానా ఢిల్లీకి 613 MGDలకు గాను రోజుకు 100 మిలియన్ గ్యాలన్ల తక్కువ నీటిని ఇస్తోందని, దీని కారణంగా ఢిల్లీలో 28 లక్షల మంది ప్రజలు ప్రభావితమయ్యారని అతిషి పేర్కొన్నారు. ఢిల్లీలో విపరీతమైన వేడి ఉండటంతో నీటికి డిమాండ్ పెరిగింది.
అతిషి సత్యాగ్రహం విజయవంతం కావాలని ఆశిస్తున్నాను: సునీతా కేజ్రీవాల్
అతిషి నిరాహార దీక్షకి కూర్చున్న అనంతరం ఢిల్లీ సీఎం కేజ్రీవాల్ భార్య సునీతా కేజ్రీవాల్ మాట్లాడుతూ.. హర్యానా ప్రభుత్వానికి విజ్ఞప్తి చేసేందుకు ఢిల్లీ మంత్రి అతిషి నిరవధిక సత్యాగ్రహం చేయనున్నారు. ఆమె ఏమీ తినదు, నీరు మాత్రమే తాగుతుందని అన్నారు. దాహంతో అలమటిస్తున్న ఢిల్లీ ప్రజల కోసం ఆమె ఇలా చేస్తోందన్నారు. ఢిల్లీ ప్రజల బాధలను టీవీల్లో చూస్తుంటే చాలా బాధగా ఉందని సీఎం అరవింద్ కేజ్రీవాల్ అన్నారని తెలిపారు. అతిషి తపస్సు సఫలమై ప్రజలకు కొంత ఉపశమనం కలుగుతుందని ఆమె ఆకాంక్షించారు.
ఢిల్లీలో నీటి సంక్షోభం ఎందుకు వచ్చింది?
ఢిల్లీలో నీటి సంక్షోభానికి రెండు కారణాలు ఉన్నాయి - వేడి, పొరుగు రాష్ట్రాలపై ఆధారపడటం. ఢిల్లీకి సొంత నీటి వనరు లేదు. నీటి కోసం పొరుగు రాష్ట్రాలపై ఆధారపడుతోంది. ఢిల్లీ జల్ బోర్డు ప్రకారం, ఈ సంవత్సరం ఢిల్లీ రోజుకు 321 మిలియన్ గ్యాలన్ల నీటి కొరతను ఎదుర్కొంటోంది. ఢిల్లీ జల్ బోర్డు లెక్కల ప్రకారం రాష్ట్రానికి రోజూ 129 కోట్ల గ్యాలన్ల నీరు అవసరం. అయితే, వేసవిలో రోజుకు 969 మిలియన్ గ్యాలన్ల డిమాండ్ మాత్రమే నెరవేరుతోంది. అంటే ఢిల్లీలోని 2.30 కోట్ల జనాభాకు ప్రతిరోజు 129 కోట్ల గ్యాలన్ల నీరు అవసరం కాగా కేవలం 96.9 కోట్ల గ్యాలన్ల నీరు మాత్రమే అందుతోంది.
ఢిల్లీకి ఏఏ రాష్ట్రాల నుంచి నీరు వస్తుందంటే..
ఢిల్లీ నీటి అవసరాలను హర్యానా ప్రభుత్వం యమునా నది నుండి, ఉత్తర ప్రదేశ్ ప్రభుత్వం గంగా నది నుండి, పంజాబ్ ప్రభుత్వం భాక్రా నంగల్ డ్యాం నుండి నీటి అవసరాలను తీరుస్తాయి. 2023 నివేదిక ప్రకారం, ఢిల్లీకి ప్రతిరోజూ యమునా నుండి 389 మిలియన్ గ్యాలన్లు, గంగా నది నుండి 253 మిలియన్ గ్యాలన్లు, భాక్రా-నంగల్ (రావి-బియాస్ నది) నుండి 221 మిలియన్ గ్యాలన్ల నీరు అందింది. ఇది కాకుండా బావులు, గొట్టపు బావులు, భూగర్భ జలాల ద్వారా 9 కోట్ల గ్యాలన్ల నీరు వచ్చింది. అంటే ఢిల్లీకి ప్రతిరోజూ 95.3 కోట్ల గ్యాలన్ల నీరు వచ్చేది. 2024 నాటికి, ఈ సంఖ్య 969 మిలియన్ గ్యాలన్లకు పెరుగుతుంది.
జైలుకు వెళ్లే ముందు కేజ్రీవాల్ విజ్ఞప్తి
లొంగిపోయే ముందు, ఢిల్లీ ముఖ్యమంత్రి అరవింద్ కేజ్రీవాల్ నీటి కొరతతో బాధపడుతున్న ఢిల్లీ ప్రజలను ఆదుకోవాలని బిజెపికి విజ్ఞప్తి చేశారు. ఢిల్లీకి నెల రోజుల పాటు నీళ్లు ఇవ్వాలని హర్యానా, ఉత్తరప్రదేశ్లోని తమ ప్రభుత్వాలను బీజేపీ కోరాలని ముఖ్యమంత్రి కేజ్రీవాల్ అన్నారు.