MMK Protest Chennai: కోయంబత్తూర్ బాంబు పేలుళ్ల కేసు ఖైదీల విడుదలకు డిమాండ్.. తమిళనాడులో నిరసనలు!
ఈ వార్తాకథనం ఏంటి
తమిళనాడు రాజధాని చెన్నైలో మనితనేయ మక్కల్ కట్చి (MMK) భారీ నిరసన ర్యాలీ నిర్వహించింది. జీవిత ఖైదు అనుభవిస్తున్న 22 మంది ముస్లిం ఖైదీలను విడుదల చేయాలని ఈ సందర్భంగా డిమాండ్ చేసింది. అలాగే ముస్లిం మతంలోకి మారిన వెనుకబడిన తరగతులు (BC), అత్యంత వెనుకబడిన తరగతులు (MBC), డీనోటిఫైడ్ కమ్యూనిటీలకు చెందిన వారికి గతంలో అమలైన 3.5 శాతం రిజర్వేషన్లను పునరుద్ధరించాలని కోరింది. ఈ నిరసన ర్యాలీలో సుమారు 10 వేల మంది పాల్గొన్నారు.
వివరాలు
కోయంబత్తూర్ పేలుళ్ల కేసులోని 14 మంది కూడా..
MMK విడుదల చేయాలని కోరుతున్న 22 మంది ఖైదీల్లో 1998లో జరిగిన కోయంబత్తూర్ వరుస బాంబు పేలుళ్ల కేసులో జీవిత ఖైదు పడిన 14 మంది కూడా ఉన్నారు.
బీజేపీ నేత ఎల్.కే. అద్వానీని లక్ష్యంగా చేసుకుని ఈ దాడికి పాల్పడ్డారు. ఈ పేలుళ్లలో 58 మంది ప్రాణాలు కోల్పోయారు.
ఈ కేసులో శిక్ష పడిన వారు గత 28 ఏళ్లుగా జైలులోనే ఉంటున్నారు. ఉగ్రవాద దాడికి పాల్పడిన నేరస్తులను విడుదల చేయాలన్న డిమాండ్పై విమర్శలు వ్యక్తమవుతున్నాయి.
ఈ నేపథ్యంలో MMK అధినేత డాక్టర్ ఎం.హెచ్. జవాహిరుల్లా స్పందించారు. సదరు ఖైదీలు తమ జీవితకాలం మొత్తం జైలులోనే గడిపారని పేర్కొన్నారు.
వివరాలు
డీఎంకే కూటమిలోనే కొనసాగుతున్న MMK
గతంలో డీఎంకే ప్రభుత్వం అధికారంలో ఉన్న సమయంలో ఓ కమిషన్ సిఫారసుల మేరకు ఇతర మతాలకు చెందిన వారితో పాటు ఇలాంటి కేసుల్లో శిక్ష అనుభవిస్తున్న 41 మందిని విడుదల చేసిన విషయాన్ని గుర్తుచేశారు.
ప్రస్తుతం మనితనేయ మక్కల్ కట్చి (MMK) డీఎంకేకు మిత్రపక్షంగా కొనసాగుతోంది.
ఎన్నికల తర్వాత కాంగ్రెస్ సహా గతంలో డీఎంకే కూటమిలో ఉన్న కొన్ని పార్టీలు విజయ్ నేతృత్వంలోని టీవీకే వైపు వెళ్లినప్పటికీ.. MMK మాత్రం డీఎంకేతోనే కొనసాగుతోంది.
తమ డిమాండ్లపై విజయ్ ప్రభుత్వం చర్యలు తీసుకోవాలని ఆ పార్టీ నేతలు కోరుతున్నారు.