Delhi: ఢిల్లీలో దట్టమైన పొగమంచు,వణికించే చలి… 130కి పైగా విమానాలు రద్దు

వ్రాసిన వారు Sirish Praharaju

Dec 30, 2025

09:03 am

ఈ వార్తాకథనం ఏంటి

దేశ రాజధాని దిల్లీని ఒకవైపు దట్టమైన పొగమంచు పూర్తిగా కప్పివేయగా, మరోవైపు ఎముకలు గడ్డకట్టే చలి ప్రజలను వణికిస్తోంది. మంగళవారం తెల్లవారుజామున నగరమంతా భారీగా పొగమంచు విస్తరించడంతో సాధారణ జీవనం తీవ్రంగా అస్తవ్యస్తమైంది. భారత వాతావరణ శాఖ (ఐఎండీ) ఢిల్లీతో పాటు పంజాబ్, హర్యానా సహా పలు రాష్ట్రాలకు చలిగాలుల హెచ్చరికలు జారీ చేసింది. అనేక ప్రాంతాల్లో కనిష్ఠ ఉష్ణోగ్రతలు భారీగా పడిపోవడంతో ప్రజలు చలికి గజగజ వణికిపోతున్నారు. దట్టమైన పొగమంచు ప్రభావంతో ఢిల్లీలో దృశ్యమానత తీవ్రంగా తగ్గిపోయింది. ఈ కారణంగా ఇందిరా గాంధీ అంతర్జాతీయ విమానాశ్రయంలో 130కుపైగా విమానాలు రద్దు కాగా, మరికొన్ని విమానాలు ఆలస్యంగా నడుస్తున్నాయి.

వివరాలు

రహదారులపై తీవ్ర ఇబ్బందులు ఎదుర్కొంటున్న వాహనదారులు

అలాగే రైల్వే శాఖ కూడా పొగమంచు కారణంగా 100కుపైగా రైళ్లు ఆలస్యమవుతున్నట్లు వెల్లడించింది. పాలం, సఫ్దర్‌జంగ్ వంటి ప్రాంతాల్లో దృశ్యమానత కేవలం 50 మీటర్ల వరకే పరిమితమైంది. ఒకపక్క ప్రమాదకర స్థాయికి చేరిన కాలుష్యం, మరోపక్క తీవ్ర చలి, దానికి తోడు పొగమంచుతో ఢిల్లీలో వాయు నాణ్యత సూచిక (ఏక్యూఐ) అత్యంత దయనీయ స్థాయికి చేరింది. పొగమంచు కారణంగా రహదారులపై వాహనదారులు తీవ్ర ఇబ్బందులు ఎదుర్కొంటున్నారు. ప్రమాదాల ముప్పు ఉన్నందున పోలీసులు అప్రమత్తంగా ఉండి ట్రాఫిక్‌ను నియంత్రిస్తున్నారు. వృద్ధులు, శ్వాస సంబంధిత సమస్యలతో బాధపడుతున్న వారు అత్యవసరమైతే తప్ప బయటకు వెళ్లవద్దని వైద్య నిపుణులు సూచిస్తున్నారు.

వివరాలు

రానున్న రెండు మూడు రోజుల పాటు పొగమంచు ప్రభావం

ప్రస్తుత పరిస్థితులను దృష్టిలో ఉంచుకుని, ప్రయాణికులు విమానాశ్రయం లేదా రైల్వే స్టేషన్‌కు వెళ్లే ముందు తమ ప్రయాణానికి సంబంధించిన తాజా సమాచారం తెలుసుకోవాలని అధికారులు సూచిస్తున్నారు. ఐఎండీ అంచనాల ప్రకారం రానున్న రెండు మూడు రోజుల పాటు పొగమంచు ప్రభావం కొనసాగనున్న అవకాశం ఉంది. వాహనదారులు ఫాగ్ లైట్లను తప్పనిసరిగా వినియోగించాలని, వేగాన్ని తగ్గించి జాగ్రత్తగా డ్రైవ్ చేయాలని ట్రాఫిక్ పోలీసులు హెచ్చరిస్తున్నారు.

ట్విట్టర్ పోస్ట్ చేయండి

ఢిల్లీ అతలాకుతలం: భారీ పొగమంచు.. వణికించే చలి

#WATCH | Delhi | Visibility in the national capital is affected as a layer of dense fog engulfs the city.

(Visuals from Dwarka Expressway) pic.twitter.com/EzuKlWW0wK
— ANI (@ANI) December 30, 2025