డిజిటల్ లావాదేవీల్లో ఇండియాకు ప్రత్యేక గుర్తింపు: ప్రధాని నరేంద్ర మోదీ
ఈ వార్తాకథనం ఏంటి
దేశ రాజధాని దిల్లీలో జరుగుతున్న 17వ భారత సహకార కాంగ్రెస్ సమావేశంలో మాట్లాడిన ప్రధాని నరేంద్ర మోదీ, డిజిటల్ ఇండియాపై కొన్ని ఆసక్తికరమైన కామెంట్లు చేసారు.
డిజిటల్ చెల్లింపుల్లో ప్రపంచ స్థాయిలో ఇండియాకు ప్రత్యేక గుర్తింపు లభిస్తోందని ప్రధాని మోదీ అన్నారు. డిజిటల్ లావాదేవీలను సహకార రంగంలోనూ తీసుకురావాల్సిన అవసరం ఉందని గుర్తు చేసారు.
సంక్షేమ ప్రయోజనాలు ప్రత్యక్షంగా ప్రజలకే అందాలని, మధ్యవర్తులు లేకుండా చెల్లింపులు జరగాలన్నారు. నగదుపై ఆధపరపడకుండా లావాదేవీలు జరగాలన్న ఉద్దేశ్యంతో డిజిటల్ ఇండియాను భారత ప్రభుత్వం ప్రోత్సహిస్తుందని ప్రధాని తెలియజేసారు.
గడిచిన నాలుగేళ్లలో 2.5 లక్షల కోట్ల రూపాయలను పీఎమ్ కిసాన్ ద్వారా లబ్దిదారులైన రైతులకు అందజేస్తున్నామని, ఎలాంటి మధ్యవర్తులు లేరని ప్రధాని మోదీ అన్నారు.
Details
2014కి ముందు వ్యవసాయానికి కేవలం 90వేల కోట్ల ఖర్చు
2014 సంవత్సరానికి ముందు వ్యవసాయ రంగానికి 90వేల కోట్లు ఖర్చు చేసారని, ఆ ఖర్చు కంటే దాదాపు మూడు రెట్ల మొత్తాన్ని పీఎమ్ కిసాన్ ద్వారా రైతులకు అందజేసినట్లు ప్రధాని మోదీ వెల్లడి చేసారు.
పాలపొడి, వెన్న, నెయ్యి, ఇంకా అనేక రకాల ఉత్పత్తులు దేశంలోనే తయారవుతున్నాయని, చిరుధాన్యాలకు(మిల్లెట్స్) సరికొత్త మార్కెట్ గా ఇండియా ఏర్పడిందని, ఇదంతా భారత ప్రభుత్వం తీసుకుంటున్న నిర్ణయాల వల్లే జరిగిందని అన్నారు.
అలాగే ఈ సంవత్సరాన్ని అంతర్జాతీయ మిల్లెట్స్ సంవత్సరంగా మార్చడంలో భారతదేశ కృషి ఉందని మోదీ చెప్పుకొచ్చారు.