Umar Nabi: ఢిల్లీ పేలుడు..10 రోజుల ముందు కారు కొని అండర్‌గ్రౌండ్‌కు వెళ్లిన డాక్టర్ ఉమర్ నబీ
ఈ వార్తాకథనం ఏంటి
దిల్లీ పేలుడు కేసుపై దర్యాప్తు వేగంగా కొనసాగుతోంది. ఎర్రకోటకు సమీపంలో పేలిన ఐ20 కారును డాక్టర్ ఉమర్ నబీ పేలుడు జరిగే పది రోజుల ముందే కొనుగోలు చేసినట్లు విచారణ సంస్థలకు తెలిసింది. అక్టోబర్‌ 29న అతడు కారు కొనుగోలు చేసి, వెంటనే దానికి కాలుష్య నియంత్రణ ధ్రువపత్రం తీసుకున్నాడు. ఆ తర్వాత అతడు అండర్‌గ్రౌండ్‌కి వెళ్లిపోయాడు. అప్పటి నుండి ఆ వాహనం ఎక్కడుందో ఖచ్చితమైన సమాచారం లభించలేదు. అయితే, సోషల్‌ మీడియాలో ఆ కారు అల్‌ ఫలాహ్‌ విశ్వవిద్యాలయం సమీపంలో ఉన్నట్లు వార్తలు ప్రచారంలోకి వచ్చాయి. కానీ, ఫరీదాబాద్‌ పోలీసులు మాత్రం ఈ సమాచారాన్ని ఖండించారు. గత 10-11 రోజులుగా ఆ వాహనం తమ పరిధిలో కనిపించలేదని వారు తెలిపారు.
వివరాలు
గురుగ్రామ్‌లో పోలీసులు అదుపులోకి వాహనం మొదటి యజమాని
కాలుష్య నియంత్రణ ధ్రువీకరణ పత్రం పొందేటప్పుడు ముగ్గురు వ్యక్తులు కారులో నుంచి బయటకు వచ్చినట్లు సమాచారం ఉంది. వారెవరనే అంశంపై పోలీసులు గట్టి విచారణ చేస్తున్నారు. ఇదిలా ఉండగా, తన స్నేహితులను వరుసగా పోలీసులు అదుపులోకి తీసుకుంటున్నారని తెలుసుకున్న ఉమర్, నవంబర్‌ 10న ఆ కారుతో దిల్లీ వైపు ప్రయాణించినట్లు దర్యాప్తు వర్గాలు చెబుతున్నాయి. ఈ ఘటనపై జాతీయ దర్యాప్తు సంస్థ (NIA), నేషనల్‌ సెక్యూరిటీ గార్డ్‌ (NSG) సహా పలు ఏజెన్సీలు సమగ్ర విచారణ చేపట్టాయి. ఈ దర్యాప్తులో భాగంగా, ఆ వాహనం మొదటి యజమాని సల్మాన్‌ను గురుగ్రామ్‌లో పోలీసులు అదుపులోకి తీసుకున్న విషయం ఇప్పటికే వెల్లడైంది. 2014 మార్చి 18న సల్మాన్ తన పేరుతో ఆ కారును కొనుగోలు చేశాడు.
వివరాలు
అధికారిక రిజిస్ట్రేషన్‌ మార్పులు ఎక్కడా నమోదు కాలేదు
అనంతరం అతడు దానిని దేవేంద్ర అనే వ్యక్తికి విక్రయించాడు. తర్వాత అది సోనుకు, ఆపై పుల్వామాకు చెందిన తారిక్‌ చేతికి చేరింది. ఈ క్రమంలో వాహనం అనేకసార్లు యజమానులు మారినా, అధికారిక రిజిస్ట్రేషన్‌ మార్పులు ఎక్కడా నమోదు కాలేదని అధికారులు గుర్తించారు. కొనుగోలు, విక్రయాల సమయంలో నకిలీ పత్రాలు వినియోగించిన అవకాశం ఉన్నట్లు దర్యాప్తు అధికారులు అనుమానం వ్యక్తం చేస్తున్నారు.