Earthquake: ప్రకాశం జిల్లాను వణికించిన భూకంపం.. నాలుగు సెకండ్లపాటు కంపించిన భూమి
ఈ వార్తాకథనం ఏంటి
ప్రకాశం జిల్లా ముండ్లమూరు మండల పరిసరాల్లో మరోసారి భూమి స్వల్పంగా కంపించడంతో ప్రజలు తీవ్ర ఆందోళనకు గురయ్యారు.
ఆదివారం అర్ధరాత్రి 12.47 గంటల సమయంలో ఈ భూప్రకంపనలు చోటు చేసుకున్నాయి. ఒక్కసారిగా భూమి కంపించడంతో నివాస గృహాల నుంచి ప్రజలు పరుగెత్తుతూ రోడ్లపైకి వచ్చారు.
ఈ ప్రకంపనలు సుమారు నాలుగు సెకండ్లపాటు కొనసాగినట్లు స్థానికులు తెలిపారు. గత నెల 6న కూడా ప్రకాశం జిల్లాలో భూకంపం సంభవించింది.
పొదిలిలో ఉదయం 9.54 గంటల సమయంలో భూమి కంపించడంతో ఆ ప్రాంతం ప్రజలు తీవ్ర భయాందోళనకు లోనయ్యారు.
ఆ సమయంలో కూడా సుమారు ఐదు సెకండ్లపాటు ప్రకంపనలు కొనసాగినట్లు నివేదికలు వెల్లడించాయి.
Details
ఆందోళనలో ప్రజలు
కొత్తూరు పరిధిలోని రాజు దవాఖాన వీధి, బ్యాంకు కాలనీ, ఇస్లాంపేట వంటి ప్రాంతాల్లో స్పష్టంగా ప్రకంపనలు గుర్తించబడ్డాయి.
అంతకు ముందు రోజు సాయంత్రం తెలంగాణలోని పలు ప్రాంతాల్లో భూప్రకంపనలు చోటుచేసుకున్న విషయం తెలిసిందే. ఉమ్మడి కరీంనగర్‌ జిల్లాలో భూమి 3.8తీవ్రతతో కంపించింది.
గంగాధర్, చొప్పదండిలోని పలు నివాస గృహాలు, వాణిజ్య భవనాల్లోని వస్తువులు కిందపడిపోయాయి. దీంతో ప్రజలు ఏం జరుగుతుందోనన్న భయంతో గుబురుక్కు గురయ్యారు.
ఇక నిర్మల్ జిల్లాలో ఖానాపూర్‌, కడెం, జన్నారం, లక్సెట్టిపేట ప్రాంతాల్లోనూ భూప్రకంపనలు నమోదయ్యాయి.
వరుసగా రెండు రాష్ట్రాల్లో ఇటువంటి ప్రకంపనలు చోటుచేసుకోవడం ప్రజల్లో ఆందోళన కలిగిస్తోంది.
ప్రస్తుతం ఈ ప్రకంపనల తీవ్రత ఎంత..? భవిష్యత్తులో మరిన్ని ప్రభావాలు ఉంటాయా? అనే అంశాలపై అధికార వర్గాలు పర్యవేక్షణ కొనసాగిస్తున్నాయి.