Srisailam Dam: శ్రీశైలానికి 2 లక్షల క్యూసెక్కుల వరద ప్రవాహం
ఈ వార్తాకథనం ఏంటి
కృష్ణా పరీవాహకంలోని అన్ని రిజర్వాయర్లు ప్రస్తుతం పూర్తిస్థాయి నీటిమట్టాలతో నిండిపోయాయి. స్థానికంగా కురుస్తున్న వర్షాలు, పెరుగుతున్న ప్రవాహాల కారణంగా వచ్చిన నీటికంటే దిగువకు విడుదల అవుతున్న నీరు ఎక్కువగా ఉంది. ప్రకాశం బ్యారేజీ నుంచి బుధవారం నాటికే 120 టీఎంసీల నీటిని సముద్రంలోకి వదిలేశారు. మొత్తం ఆగస్టు రెండో వారానికల్లా కృష్ణా, గోదావరి పరీవాహకాల్లో కలిపి వెయ్యి టీఎంసీలకు పైగా నీరు సముద్రంలోకి చేరింది. అయితే, ఈ రెండు బేసిన్ల పరిస్థితుల్లో వ్యత్యాసం స్పష్టంగా కనిపిస్తోంది. కృష్ణా బేసిన్‌లో ఆలమట్టి రిజర్వాయర్‌కు 17 వేల క్యూసెక్కులు, నారాయణపూర్‌కు 16 వేల క్యూసెక్కులు, తుంగభద్ర నుంచి 10 వేల క్యూసెక్కుల ప్రవాహం మాత్రమే చేరుతోంది.
Details
26 గేట్లు ఎత్తివేత
శ్రీశైలానికి ప్రస్తుతం రెండు లక్షల క్యూసెక్కులు వస్తున్నప్పటికీ, నిల్వ సామర్థ్యం మరొక 10 టీఎంసీలకే పరిమితమవడంతో వచ్చిన నీటిని వెంటనే నాగార్జునసాగర్‌కు వదిలేశారు. నాగార్జునసాగర్‌ పూర్తిస్థాయి నీటిమట్టం 590 అడుగులు కాగా, ప్రస్తుతం 589.3 అడుగుల వరకు నీరు నిల్వ ఉంది. బుధవారం సాయంత్రం 26 గేట్లు ఎత్తి భారీగా నీటిని విడుదల చేశారు.
Details
గోదావరి బేసిన్‌లో నీటి కొరత
గోదావరి బేసిన్‌లో మాత్రం విభిన్న పరిస్థితి ఉంది. శ్రీరామసాగర్‌కు 5,500 క్యూసెక్కులు, నిజాంసాగర్‌కు 2,125 క్యూసెక్కులు, కడెంకి 2,134 క్యూసెక్కులు, ఎల్లంపల్లికి 5,272 క్యూసెక్కుల ప్రవాహం మాత్రమే చేరుతోంది. ఈ రిజర్వాయర్లలో నీటి మట్టాలు సగానికి కూడా చేరలేదు. ఎగువన ఉన్న రిజర్వాయర్లు నిండటానికి ఇంకా 100 టీఎంసీల నీటి అవసరం ఉంది. అయితే ప్రాణహిత, సీలేరు నదుల నుంచి వచ్చిన నీటితో ధవళేశ్వరం వద్ద లక్షా 20 వేల క్యూసెక్కులను సముద్రంలోకి విడుదల చేశారు.
Details
శ్రీపాద ఎల్లంపల్లి నుంచి ఎత్తిపోతల ప్రారంభం
పెద్దపల్లి జిల్లా శ్రీపాద ఎల్లంపల్లి జలాశయం నుంచి రాజన్న సిరిసిల్ల జిల్లా శ్రీరాజరాజేశ్వర మధ్య మానేరు జలాశయానికి గోదావరి జలాల ఎత్తిపోతలు బుధవారం ప్రారంభమయ్యాయి. నందిమేడారంలోని నందిపంపుహౌస్‌లో నీటిపారుదల శాఖ అధికారులు మూడు మోటార్లను ప్రారంభించి, 9,450 క్యూసెక్కుల నీటిని నందిమేడారం రిజర్వాయర్లోకి ఎత్తిపోశారు. అక్కడి నుంచి అంతే ప్రవాహాన్ని గాయత్రి పంపుహౌస్‌కు పంపించారు. గాయత్రి పంపుహౌస్‌లో కూడా మూడు మోటార్లను నడిపి, అదే పరిమాణంలో జలాలను శ్రీరాజరాజేశ్వరం జలాశయానికి తరలించారు. సాయంత్రం 5.30 గంటలకు రెండు పంపుహౌస్‌లలో మోటార్లను నిలిపివేసి, వారం రోజుల పాటు ఎత్తిపోతలు కొనసాగించాలని ప్రభుత్వం ఆదేశాలు జారీ చేసింది.