Andhra Pradesh: విశాఖ తీరంలో విషాదం.. గల్లంతైన ఆరుగురు మత్స్యకారులు మృతి
ఈ వార్తాకథనం ఏంటి
విశాఖపట్టణం తీరంలో సముద్రంలో గల్లంతైన ఆరుగురు మత్స్యకారుల కోసం నాలుగు రోజులుగా కొనసాగిన గాలింపు చర్యలు ఎలాంటి ఫలితం లేకుండానే ముగిశాయి. ఇండియన్ నేవీ,కోస్ట్ గార్డ్ సంయుక్తంగా చేపట్టిన విస్తృత స్థాయి రెస్క్యూ ఆపరేషన్ను మంగళవారం అర్ధరాత్రి 12 గంటలకు అధికారులు అధికారికంగా ముగించారు. సముద్రంలో అన్ని అవకాశాలను పరిశీలిస్తూ ముమ్మరంగా గాలించినప్పటికీ గల్లంతైన జాలర్ల ఆచూకీ లభించకపోవడంతో వారి కుటుంబాల్లో తీవ్ర విషాదం నెలకొంది. జులై 1న విశాఖపట్నం ఫిషింగ్ హార్బర్ నుంచి ఏడుగురు మత్స్యకారులు చేపల వేట కోసం సముద్రంలోకి వెళ్లారు. అనంతరం బంగాళాఖాతంలో వాతావరణ పరిస్థితులు ఒక్కసారిగా మారడంతో సముద్రం అల్లకల్లోలంగా మారింది. ప్రతికూల వాతావరణ ప్రభావంతో జులై 4న వారి బోటు ప్రమాదానికి గురై సముద్రంలో మునిగిపోయింది.
వివరాలు
రెస్క్యూ ఆపరేషన్ను అధికారులు ముగిస్తున్నట్లు ప్రకటన
ఈ ఘటనలో ఒక మత్స్యకారుడు ప్రాణాలతో బయటపడగా, మిగిలిన ఆరుగురు సముద్రంలో గల్లంతయ్యారు. సమాచారం అందుకున్న వెంటనే ఇండియన్ నేవీ, కోస్ట్ గార్డ్ బృందాలు రంగంలోకి దిగి నాలుగు రోజుల పాటు నిరంతరంగా గాలింపు చర్యలు చేపట్టాయి. సముద్రంలో విస్తృత ప్రాంతాలను జల్లెడ పట్టినా గల్లంతైన వారి జాడ కనిపించలేదు. దీంతో రెస్క్యూ ఆపరేషన్ను అధికారులు ముగిస్తున్నట్లు ప్రకటించారు. గాలింపు చర్యలు నిలిపివేయడంతో విశాఖ తీరంలోని మత్స్యకార గ్రామాల్లో విషాద ఛాయలు అలుముకున్నాయి. తమ కుటుంబ సభ్యులు క్షేమంగా తిరిగి వస్తారనే ఆశతో ఎదురు చూసిన కుటుంబాల నిరీక్షణ ఆవేదనగా మారింది. గంగపుత్రుల కుటుంబాల్లో రోదనలు మిన్నంటగా, గ్రామాల్లో విషాద వాతావరణం నెలకొంది.
వివరాలు
మత్స్యకారుడి కుటుంబానికి రూ.10 లక్షల చొప్పున తక్షణ ఆర్థిక సాయం
ఈ ప్రమాదంపై రాష్ట్ర ప్రభుత్వం వెంటనే స్పందించింది. బాధిత కుటుంబాలకు తక్షణ సహాయం అందించేందుకు యుద్ధప్రాతిపదికన చర్యలు ప్రారంభించింది. గల్లంతైన ప్రతి మత్స్యకారుడి కుటుంబానికి రూ.10 లక్షల చొప్పున తక్షణ ఆర్థిక సాయం అందించాలని మంత్రి అచ్చెన్నాయుడు విశాఖ జిల్లా కలెక్టర్ను ఆదేశించారు. ఇదిలా ఉండగా, బాధిత కుటుంబాలను పరామర్శించేందుకు రాష్ట్ర మత్స్యశాఖ మంత్రి కొల్లు రవీంద్ర విశాఖకు చేరుకున్నారు. ప్రమాద పరిస్థితులను స్వయంగా పరిశీలించనున్న ఆయన, బాధిత కుటుంబాలను కలిసి ప్రభుత్వ తరఫున పూర్తి సహకారం అందిస్తామని భరోసా ఇవ్వనున్నారు.