Fruits Artificial Ripening: వేసవిలో కృత్రిమంగా పండ్లు మగ్గపెడితే కఠిన చర్యలు .. రాష్ట్రాలకు FSSAI కీలక ఆదేశాలు
ఈ వార్తాకథనం ఏంటి
వేసవికాలం ప్రారంభమయ్యాక రోజుకు కనీసం ఒక పండు తినడం ఆరోగ్యానికి ఎంతో మంచిదని నిపుణులు చెబుతున్నారు. ముఖ్యంగా మామిడి పండ్ల కాలం కావడంతో మార్కెట్లలో పండ్ల కొనుగోలు సందడి మరింత పెరిగింది. అయితే ఈ పరిస్థితిని దుర్వినియోగం చేస్తూ కొందరు వ్యాపారులు పండ్లను సహజంగా కాకుండా కృత్రిమంగా మగ్గబెట్టే చర్యలకు పాల్పడుతున్నట్లు గుర్తించారు. ఈ నేపథ్యంలో భారత ఆహార భద్రత ప్రమాణాల ప్రాధికార సంస్థ (FSSAI) కీలక సూచనలు జారీ చేసింది. పండ్లను త్వరగా మగ్గబెట్టేందుకు హానికర రసాయనాల వినియోగాన్ని పూర్తిగా నిషేధిస్తూ, అలాంటి అక్రమ చర్యలను అరికట్టేందుకు దేశవ్యాప్తంగా కఠిన తనిఖీలు చేపట్టాలని అన్ని రాష్ట్రాలు, కేంద్రపాలిత ప్రాంతాలకు ఆదేశాలు ఇచ్చింది.
వివరాలు
అనారోగ్య సమస్యలు వచ్చే ప్రమాదం
ప్రత్యేకంగా మామిడి, బొప్పాయి వంటి పండ్లను కృత్రిమంగా మాగబెట్టేందుకు ఉపయోగించే కాల్షియం కార్బైడ్పై ఇప్పటికే నిషేధం అమలులో ఉందని సంస్థ మరోసారి స్పష్టం చేసింది. ఈ రసాయనం ఉపయోగించిన పండ్లు తింటే వాంతులు, చర్మ సమస్యలు వంటి అనారోగ్య సమస్యలు వచ్చే ప్రమాదం ఉందని హెచ్చరించింది. అలాగే అరటి,ఇతర పండ్లను మాగబెట్టేందుకు ఎథోఫాన్ పొడిని వినియోగిస్తున్నారని కూడా తెలిపింది. ఈ పరిస్థితిని దృష్టిలో ఉంచుకుని పండ్ల మార్కెట్లు, నిల్వ కేంద్రాలు, టోకు వ్యాపారులు, పంపిణీదారుల వద్ద తనిఖీలు మరింత కఠినంగా నిర్వహించాలని ఆదేశాలు జారీ చేసింది. కాల్షియం కార్బైడ్ వంటి ప్రమాదకర రసాయనాలను ఉపయోగిస్తున్నట్లు ఎవరైనా తేలితే వారిపై చట్టపరమైన కఠిన చర్యలు తీసుకోవాలని స్పష్టం చేసింది.