Germany: జర్మనీకి వెళ్ళడానికి ఇకపై ట్రాన్సిట్ వీసా అవసరం లేదు!
ఈ వార్తాకథనం ఏంటి
అంతర్జాతీయంగా ప్రయాణించే భారతీయులకు జర్మనీ ప్రభుత్వం భారీ ఊరటనిచ్చింది. జర్మనీ విమానాశ్రయాల ద్వారా మూడో దేశాలకు వెళ్లే భారతీయ ప్రయాణికులు ఇకపై ప్రత్యేకంగా 'ట్రాన్సిట్ వీసా' తీసుకోవాల్సిన అవసరం ఉండదని స్పష్టం చేసింది. సోమవారం ప్రధాని నరేంద్ర మోదీ, జర్మనీ ఛాన్సలర్ ఫ్రెడరిక్ మెర్స్ మధ్య జరిగిన సమావేశం అనంతరం విడుదలైన ఉమ్మడి ప్రకటనలో ఈ నిర్ణయాన్ని వెల్లడించారు. ఇప్పటి వరకు జర్మనీ మీదుగా ఇతర దేశాలకు ప్రయాణించాలంటే భారతీయులకు ట్రాన్సిట్ వీసా తప్పనిసరిగా ఉండేది. తాజా నిర్ణయంతో పత్రాల ప్రక్రియ తగ్గి, ప్రయాణం మరింత సులభంగా, వేగంగా పూర్తయ్యే అవకాశం ఏర్పడింది.
వివరాలు
రెండు దేశాల మధ్య బలపడనున్న వ్యూహాత్మక సంబంధాలు
ఈ కీలక నిర్ణయంపై ప్రధాని మోదీ ఆనందం వ్యక్తం చేస్తూ, దీనికి సహకరించిన ఛాన్సలర్ మెర్స్కు కృతజ్ఞతలు తెలిపారు. ఈ చర్యతో భారత్-జర్మనీ ప్రజల మధ్య సంబంధాలు మరింత బలపడతాయని ఇరువురు నేతలు అభిప్రాయపడ్డారు. ఛాన్సలర్ మెర్స్ తొలిసారి భారత్కు వచ్చిన సందర్భంగా విద్య, పరిశోధన, ఉపాధి రంగాలపై విస్తృతంగా చర్చలు జరిగాయి. జర్మనీలో చదువుతున్న భారతీయ విద్యార్థుల సంఖ్య క్రమంగా పెరుగుతున్న నేపథ్యంలో ఈ పరిణామాన్ని ఇరుదేశాల నేతలు స్వాగతించారు. భారతీయ విద్యార్థులు, గ్రాడ్యుయేట్లు జర్మనీ ఉద్యోగ మార్కెట్లో సులభంగా స్థిరపడేలా అవసరమైన చర్యలు తీసుకోవాలని నిర్ణయించారు.
వివరాలు
జర్మనీలో పెరగనున్న భారతీయ విద్యార్థులు, నిపుణుల అవకాశాలు
ఉన్నత విద్య రంగంలో భాగంగా భారతదేశంలోని ఐఐటీలు, జర్మనీలోని సాంకేతిక విశ్వవిద్యాలయాల మధ్య సహకారాన్ని మరింత పెంచాలని ఇరుదేశాలు అంగీకరించాయి. నూతన విద్యా విధానం (ఎన్ఈపీ) కింద జర్మనీలోని ప్రముఖ విశ్వవిద్యాలయాలు భారత్లో తమ క్యాంపస్లను ఏర్పాటు చేయాలని ప్రధాని మోదీ ఆహ్వానించారు. ఈ సందర్భంగా భారతీయ నిపుణులు జర్మనీ ఆర్థిక వ్యవస్థ అభివృద్ధికి అందిస్తున్న కీలక సహకారాన్ని ఛాన్సలర్ మెర్స్ ప్రశంసించారు.