Khamenei: ట్రాఫిక్ కెమెరాల నుంచి ఫోన్ టవర్ల వరకు… ఖమేనీ ట్రాకింగ్ ఆపరేషన్ బహిర్గతం
ఈ వార్తాకథనం ఏంటి
ఇరాన్ రాజధాని తెహ్రాన్లో ఇజ్రాయెల్ గూఢచర్యం నడిపిందనే సంచలన వార్త బయటకు వచ్చింది. ఇరాన్ సుప్రీం లీడర్ అయతొల్లా అలీ ఖమేనీని ట్రాక్ చేయడానికి ఇజ్రాయెల్ ట్రాఫిక్ కెమెరాలు, మొబైల్ ఫోన్ నెట్వర్క్లను హ్యాక్ చేసినట్టు అంతర్జాతీయ మీడియా వెల్లడించింది. ప్రముఖ పత్రిక Financial Times తెలిపిన వివరాల ప్రకారం, తెహ్రాన్ నగరంలోని దాదాపు అన్ని ట్రాఫిక్ కెమెరాలు ఏళ్ల తరబడి ఇజ్రాయెల్ నియంత్రణలోనే ఉన్నట్టు సమాచారం. ఆ కెమెరాల ఫుటేజ్ను ఎన్క్రిప్ట్ చేసి Tel Avivతో పాటు దక్షిణ ఇజ్రాయెల్లోని సర్వర్లకు పంపినట్టు రెండు వర్గాలు పేర్కొన్నాయి.
వివరాలు
'ప్యాటర్న్ ఆఫ్ లైఫ్' పేరుతో ప్రత్యేక డేటా ప్రొఫైల్స్
ఈ కెమెరాల్లో ఒక ప్రత్యేక యాంగిల్ చాలా ఉపయోగపడిందని రిపోర్ట్ చెబుతోంది. ఖమేనీ భద్రతా సిబ్బంది తమ వ్యక్తిగత వాహనాలను ఎక్కడ పార్క్ చేస్తున్నారో స్పష్టంగా కనిపించేదట. దీంతో వారి రోజువారీ కదలికలు, విధులు, ప్రయాణ మార్గాలపై పూర్తి సమాచారం సేకరించగలిగినట్టు తెలుస్తోంది. తెహ్రాన్లోని పాస్టర్ స్ట్రీట్ సమీపంలోని సముదాయంలో భద్రతా ఏర్పాట్లపై కూడా స్పష్టత దక్కినట్టు సమాచారం. భద్రతా సిబ్బంది చిరునామాలు, డ్యూటీ టైమింగ్స్, బాధ్యతలు వంటి వివరాలతో 'ప్యాటర్న్ ఆఫ్ లైఫ్' పేరుతో ప్రత్యేక డేటా ప్రొఫైల్స్ సిద్ధం చేసినట్టు నివేదిక పేర్కొంది. ఇదే కాకుండా పాస్టర్ స్ట్రీట్ పరిసర ప్రాంతాల్లో ఉన్న కొద్ది మొబైల్ టవర్ల వ్యవస్థలను కూడా ఇజ్రాయెల్ ప్రభావితం చేసినట్టు రిపోర్ట్ వెల్లడించింది.
వివరాలు
ఖమేనీ భద్రతా బృందానికి హెచ్చరికలు
ఫోన్కు కాల్ చేస్తే బిజీగా ఉన్నట్టు కనిపించేలా వ్యవస్థను మార్చడంతో ఖమేనీ భద్రతా బృందానికి హెచ్చరికలు చేరకుండా అడ్డుకున్నట్టు సమాచారం. ఇంకా సామాజిక నెట్వర్క్ విశ్లేషణ అనే గణిత పద్ధతిని ఉపయోగించి కోట్లాది డేటా పాయింట్లను పరిశీలించినట్టు తెలుస్తోంది. దీని ద్వారా కీలక నిర్ణయాలు తీసుకునే వ్యక్తులను గుర్తించి కొత్త లక్ష్యాలను ఎంపిక చేసినట్టు సమాచారం. 2025 జూన్లో జరిగిన 12 రోజుల యుద్ధంలో ఇజ్రాయెల్ తొలి దాడి తర్వాత కొద్ది నిమిషాల్లోనే పలువురు ఇరాన్ అణు శాస్త్రవేత్తలు, ఉన్నత స్థాయి సైనిక అధికారులను హతమార్చినట్టు కూడా రిపోర్ట్ ప్రస్తావించింది. అంతేకాదు, ఈ ఆపరేషన్లో అమెరికాకు చెందిన మానవ వనరుల నుంచి కూడా ఇంటెలిజెన్స్ సహాయం లభించి ఉండొచ్చని అంచనా వేస్తోంది.