Ayyappa: అయ్యప్ప భక్తులకు శుభవార్త.. 18 మెట్లు ఎక్కగానే నేరుగా అయ్యప్ప దర్శనం
ఈ వార్తాకథనం ఏంటి
అయ్యప్ప భక్తులకు శుభవార్త! ఇకపై ఇరుముడితో వచ్చే భక్తులకు సన్నిధానం వద్ద మరింత సులభతరం కలిగేలా నిర్ణయం తీసుకున్నారు.
పుణ్య పద్దెనిమిది మెట్లు ఎక్కగానే, వారు నేరుగా అయ్యప్ప సన్నిధిలోకి ప్రవేశించేందుకు అనుమతిస్తారు.
గతంలో పదునెట్టాంబడి ఎక్కగానే భక్తులను ఎడమ వైపుకు మళ్లించేవారు. అక్కడి నుంచి ఆలయాన్ని చుట్టూ తిరిగి, సుమారు 500 మీటర్ల దూరంలో ఉన్న ఫ్లైఓవర్ బ్రిడ్జి ద్వారా అయ్యప్ప సన్నిధి చేరుకోవాల్సి వచ్చేది.
శబరిమల ఆలయ అభివృద్ధిలో భాగంగా, అధికారులు కొత్త లేఅవుట్‌ను రూపొందించారు.
ఈ ప్రణాళిక ప్రకారం, సన్నిధానం చుట్టూ ఉన్న ఫ్లైఓవర్ బ్రిడ్జిని పూర్తిగా తొలగిస్తారు. వచ్చే నెల 14న మీనమాస పూజల కోసం అయ్యప్ప ఆలయాన్ని తెరవనున్నారు.
Details
ఒక నిమిషం పాటు దర్శించుకొనే అవకాశం
ఈ సీజన్ నుంచి ఇరుముడితో వచ్చే భక్తులు 18 మెట్లు ఎక్కగానే, నేరుగా ధ్వజస్తంభానికి ఇరువైపులా ఏర్పాటు చేయనున్న రెండు లేదా నాలుగు లైన్ల ద్వారా సన్నిధానాన్ని చేరుకోగలరు.
భక్తులు కణిక్కవంచి (బలికల్‌పుర-నైవేద్య పాత్ర) మార్గంలో నేరుగా ఎదురుగా ఉన్న అయ్యప్ప సన్నిధిని దర్శించుకోవచ్చు.
ఇంతకు ముందు ఫ్లైఓవర్ దిగిన తర్వాత, భక్తులకు అయ్యప్ప సన్నిధిని ఎడమవైపు నుండి దర్శించుకునే అవకాశం ఉండేది.
దీని వల్ల, అధిక రద్దీ సమయంలో తోపులాట, భక్తులపై పోలీసుల ఒత్తిడి పెరిగి, కొంతమంది భక్తులు పూర్తిగా దర్శనం చేసుకోలేక పోయేవారు.
కానీ కణిక్కవంచి మార్గాన్ని అనుసరించడం వల్ల భక్తులకు 30 సెకన్ల నుండి 1 నిమిషం వరకు అయ్యప్ప స్వామిని ప్రశాంతంగా దర్శించుకునే అవకాశం లభించనుంది.
Details
శబరిమలలో కుంభమాస పూజలు
ప్రస్తుతం శబరిమలలో కుంభమాస పూజలు జరుగుతున్నాయి. ఈ నెల 21 వరకు ఆలయం భక్తులకు అందుబాటులో ఉంటుంది.
17వ తేదీ నుంచి ఫుట్ ఓవర్ బ్రిడ్జి తొలగింపు సహా ఇతర అభివృద్ధి పనులు ప్రారంభమవుతాయి. హైకోర్టు కూడా ఈ కొత్త ప్రణాళికకు ఆమోదం తెలిపింది.
హైకోర్టు నియమించిన శబరిమల ప్రత్యేక కమిషనర్ ఆర్. జయకృష్ణన్, ట్రావెన్‌కోర్ బోర్డు అధ్యక్షుడు పీఎస్ ప్రశాంత్ పర్యవేక్షణలో పనులు కొనసాగించనున్నారు.
గతంలో భక్తుల పెరుగుతున్న రద్దీ నేపథ్యంలో 1989లో ప్రస్తుత ఫుట్ ఓవర్ బ్రిడ్జి ఏర్పాటు చేశారు.
అయితే ఆలయ అభివృద్ధి పథకంలో భాగంగా ఇప్పుడు భక్తులకు మరింత సులభతరంగా అయ్యప్ప స్వామి దర్శనం కల్పించే విధంగా మార్పులు చేపట్టారు.