Loading...
Telangana Darshini: విద్యార్థులకు తెలంగాణ ప్రభుత్వం గుడ్‌న్యూస్.. ఒక్కొక్కరిపై రోజుకు రూ.900 ఖర్చు!
విద్యార్థులకు తెలంగాణ ప్రభుత్వం గుడ్‌న్యూస్.. ఒక్కొక్కరిపై రోజుకు రూ.900 ఖర్చు!

Telangana Darshini: విద్యార్థులకు తెలంగాణ ప్రభుత్వం గుడ్‌న్యూస్.. ఒక్కొక్కరిపై రోజుకు రూ.900 ఖర్చు!

వ్రాసిన వారు Jayachandra Akuri
Nov 18, 2026
05:10 pm

ఈ వార్తాకథనం ఏంటి

పుస్తకాల్లోని పాఠాలకే విద్యను పరిమితం చేయకుండా.. విద్యార్థులకు తెలంగాణ చరిత్ర, సంస్కృతి, ప్రకృతి అందాలపై ప్రత్యక్ష అవగాహన కల్పించేందుకు రాష్ట్ర ప్రభుత్వం సరికొత్త కార్యక్రమానికి శ్రీకారం చుట్టింది. 'తెలంగాణ దర్శిని' పేరుతో విద్యార్థుల కోసం ప్రత్యేక విద్యా పర్యటనలు నిర్వహించాలని నిర్ణయించింది. సమగ్ర శిక్షా పథకంలో భాగంగా పీఎంశ్రీ పాఠశాలల విద్యార్థులకు ఈ అవకాశం కల్పించనుంది. ఇందుకోసం ప్రభుత్వం రూ.26.30 కోట్ల నిధులను మంజూరు చేసింది.

వివరాలు

2.92 లక్షల మంది విద్యార్థులకు అవకాశం.. రోజుకు రూ.900 ఖర్చు

రాష్ట్రవ్యాప్తంగా సుమారు 2,92,286 మంది విద్యార్థులను విజ్ఞాన యాత్రలకు తీసుకెళ్లేలా కార్యాచరణ రూపొందించారు.

విద్యాశాఖతో పాటు పర్యాటక, సాంఘిక, గిరిజన, బీసీ సంక్షేమ, అటవీ శాఖలు సమన్వయంతో ఈ కార్యక్రమాన్ని నిర్వహించనున్నాయి.

రెండో తరగతి నుంచి డిగ్రీ వరకు చదువుతున్న విద్యార్థులకు వారి తరగతుల స్థాయిని బట్టి పర్యటనలను ప్రణాళిక చేస్తున్నారు.

ఈ యాత్రల్లో పాల్గొనే ఒక్కో విద్యార్థిపై రోజుకు రూ.900 చొప్పున ప్రభుత్వం ఖర్చు చేయనుంది. ఇందులో విద్యాశాఖకు చెందిన సర్వశిక్షా అభియాన్ నిధుల నుంచి రూ.500, పర్యాటక శాఖ నుంచి రూ.400 సమకూర్చనున్నారు.

తెలంగాణ పర్యాటక అభివృద్ధి సంస్థ (TGTDC) పర్యవేక్షణలో ఈ పర్యటనలు జరగనున్నాయి.

వివరాలు

చారిత్రక కట్టడాల నుంచి టైగర్ రిజర్వ్‌ల వరకు..

పర్యటనల షెడ్యూల్ రూపొందించడం, సందర్శించే ప్రదేశాలను ఎంపిక చేసే బాధ్యతలను సంస్థ ఎండీకి అప్పగించారు.

'తెలంగాణ దర్శిని'లో భాగంగా రాష్ట్రంలోని ప్రసిద్ధ చారిత్రక కట్టడాలు, ఆలయాలు, కళా కేంద్రాలు, ప్రకృతి రమణీయ ప్రాంతాలను విద్యార్థులకు పరిచయం చేయనున్నారు.

హైదరాబాద్‌లోని గోల్కొండ కోట, చార్మినార్, చౌమహల్లా ప్యాలెస్‌తో పాటు వరంగల్ కోట, యునెస్కో గుర్తింపు పొందిన రామప్ప ఆలయం, వేయి స్తంభాల గుడి, భువనగిరి కోట, బుద్ధవనం, కొలనుపాక జైన మందిరాలను సందర్శించే అవకాశం కల్పించనున్నారు.

అలాగే తెలంగాణ ప్రత్యేక హస్తకళల గురించి తెలుసుకునేందుకు శిల్పారామం, పోచంపల్లి, చేర్యాల, నిర్మల్ ప్రాంతాలకు విద్యార్థులను తీసుకెళ్లనున్నారు.

ఆయా ప్రాంతాల్లో ప్రసిద్ధి చెందిన కళలు, వాటి ప్రత్యేకతలను వివరించనున్నారు.

ADVERTISEMENT

వివరాలు

భావితరాలకు తెలంగాణ వైభవాన్ని పరిచయం చేయడమే లక్ష్యం: జూపల్లి

ప్రకృతి అందాలు, పర్యావరణంపై అవగాహన కల్పించేందుకు అనంతగిరి కొండలు, లక్నవరం, పాకాల సరస్సులు, కవ్వాల్, అమ్రాబాద్ టైగర్ రిజర్వ్‌లు, మేడారం, నాగార్జునసాగర్ వంటి ప్రాంతాలను కూడా పర్యటనల్లో చేర్చనున్నారు.

తరగతి గదుల్లో నేర్చుకున్న విషయాలను క్షేత్రస్థాయిలో ప్రత్యక్షంగా చూడటం వల్ల విద్యార్థుల్లో రాష్ట్ర సంస్కృతి, వారసత్వ సంపద, పర్యావరణంపై మమకారం పెరుగుతుందని ప్రభుత్వం భావిస్తోంది.

తెలంగాణ చారిత్రక వైభవాన్ని, పర్యాటక ప్రాధాన్యతను భావితరాలకు పరిచయం చేయడమే 'తెలంగాణ దర్శిని' కార్యక్రమం ప్రధాన ఉద్దేశమని పర్యాటక శాఖ మంత్రి జూపల్లి కృష్ణారావు పేర్కొన్నారు.

ఈ విద్యా పర్యటనలు విద్యార్థులకు విజ్ఞానాన్ని అందించడంతో పాటు మరపురాని ఆహ్లాదకర అనుభూతిని కలిగిస్తాయని ఆయన ఆశాభావం వ్యక్తం చేశారు.

ADVERTISEMENT