Google Data Centre: గూగుల్ డేటా సెంటర్కు గ్రీన్సిగ్నల్.. భూసేకరణ పూర్తి
ఈ వార్తాకథనం ఏంటి
కూటమి ప్రభుత్వం అధికారంలోకి వచ్చిన తర్వాత ఐటీ రంగంలో అతిపెద్ద పెట్టుబడిగా గూగుల్ డేటా సెంటర్ ప్రాజెక్ట్ నిలిచింది. గూగుల్ ఈ ప్రాజెక్ట్ను ప్రకటించిన నాటి నుంచే వైకాపా నాయకులు భూసేకరణ ఆగిపోవాలని పలు రకాల ప్రయత్నాలు చేసినట్టు సమాచారం. అయితే వచ్చిన అన్ని అడ్డంకులను అధిగమిస్తూ ప్రభుత్వం రైతులతో చర్చలు జరిపి, వారికి పరిహారం చెల్లించింది. ఈ ప్రక్రియలో చివరిగా మిగిలిన రైతు కూడా భూమి ఇవ్వడానికి అంగీకరించడంతో డేటా సెంటర్ ఏర్పాటుకు పూర్తిస్థాయి మార్గం సాఫీ అయింది. వచ్చే నెలలో శంకుస్థాపన కార్యక్రమం నిర్వహించేందుకు అధికారులు సన్నాహాలు చేస్తున్నారు.
వివరాలు
అవాంతరాలు ఇలా..
భూసేకరణను వ్యతిరేకిస్తూ తర్లువాడ రైతుల పేరుతో కొందరు హైకోర్టులో పిటిషన్ దాఖలు చేశారు. ఆ పిటిషన్లో మరణించిన ఒక రైతు పేరు కూడా ఉండటం విశేషం. "మా సంతకాలు నకిలీ చేసి కోర్టులో పిటిషన్ వేశారు" అంటూ కొందరు రైతులు ఆనందపురం పోలీస్ స్టేషన్లో ఫిర్యాదు చేశారు. దీనిపై ఆర్డీవో విచారణ చేపట్టి నివేదిక సమర్పించారు. ఇక వైకాపా అనుబంధ వ్యక్తులు రైతులను ప్రలోభాలకు గురిచేసినట్టు ఆరోపణలు వచ్చాయి. భూములు తమకు అమ్మితే రూ.55 లక్షల నగదు, అలాగే అభివృద్ధి చేసిన 27.50 సెంట్ల స్థలం ఇస్తామని హామీ ఇచ్చినట్టు సమాచారం. ఒప్పుకుంటే వెంటనే 50 శాతం నగదు ఖాతాల్లో జమ చేస్తామని కూడా నమ్మబలికినట్టు తెలుస్తోంది.
వివరాలు
సీఎం దృష్టికి తీసుకెళ్లి.. పరిహారం పెంచి..:
వైకాపా నాయకుల చర్యలను భీమిలి ఎమ్మెల్యే గంటా శ్రీనివాసరావు ఇటీవల ముఖ్యమంత్రి చంద్రబాబు దృష్టికి తీసుకెళ్లారు. దీనిపై స్పందించిన ప్రభుత్వం ఎకరాకు ఇస్తున్న రూ.17 లక్షల పరిహారాన్ని రూ.40 లక్షలకు పెంచింది. అదనంగా ప్రతి రైతుకు 20 సెంట్ల స్థలం కేటాయించాలని నిర్ణయించింది. రికార్డుల్లో లేని శివాయ్ జమేదార్ భూముల్లో సాగు చేస్తున్న రైతులకు కూడా ఎకరాకు రూ.10 లక్షల పరిహారం చెల్లించేలా జీవో జారీ చేశారు. అంతేకాకుండా ప్రతి కుటుంబానికి ఒక ఉద్యోగం, ఉపాధి కోసం షాపింగ్ కాంప్లెక్స్లో ఒక దుకాణం, అలాగే బంజరు భూముల అభివృద్ధి పథకం కింద 520 మంది రైతులకు 3 సెంట్ల నివాస స్థలాలు ఇస్తామని ప్రభుత్వం హామీ ఇవ్వడంతో రైతులు భూసేకరణకు అంగీకరించారు.
వివరాలు
మిగిలిన ఒక్క రైతు అంగీకారం:
ఇప్పటి వరకు భూమి ఇవ్వడానికి నిరాకరించిన రైతు గణేశ్ కూడా చివరకు అంగీకారం తెలిపారు. మంగళవారం భీమిలి ఎమ్మెల్యే గంటా శ్రీనివాసరావును కలిసి తనకు చెందిన 1.94 ఎకరాల అసైన్డ్ భూమిని ఇవ్వనున్నట్లు వెల్లడించారు. అంతకు ముందు మండల రెవెన్యూ అధికారులను కలిసి అంగీకార పత్రాలు సమర్పించినట్టు ఆయన తెలిపారు. తర్లువాడలో అవసరమైన భూములు: 308 ఎకరాలు డీ పట్టా..: 200 ఎకరాలు శివాయ్ జమేదార్..: 108 ఎకరాలు