Andhra Pradesh: భూగర్భజలవనరుల అభివృద్ధిపై రాష్ట్ర ప్రభుత్వం ప్రత్యేక దృష్టి
ఈ వార్తాకథనం ఏంటి
ఏపీ ప్రభుత్వం భూగర్భజల వనరుల పరిరక్షణ,అభివృద్ధిపై ప్రాధాన్యతను ఇచ్చింది. వేసవిలో చేసిన పరిశీలనలో సుమారు 7,800 గ్రామాల్లో భూగర్భజలాలు ఆశించిన స్థాయిలో లభ్యమవ్వడం లేదని స్పష్టమైంది. మొత్తం రాష్ట్రంలో 42 శాతానికి పైగా ప్రాంతాల్లో నీటి మట్టం 8 మీటర్ల కంటే దిగువగా ఉందని గుర్తించారు. ఈ నేపథ్యంలో ఆయా గ్రామాల్లో నీటిని రీఛార్జి చేసేందుకు సమగ్ర నీటి ప్రణాళిక అవసరమని భావించి అందుకు అనుగుణంగా చర్యలు చేపట్టాలని నిర్ణయించారు. ముఖ్యంగా ప్రతి గ్రామంలో నీటి మట్టాన్ని 3 నుంచి 8 మీటర్ల మధ్యగా ఉండేలా ఉంచడమే ప్రధాన లక్ష్యం. ప్రస్తుతం ఇప్పటికే 1,700 గ్రామాలకు సంబంధించి ప్రత్యేక ప్రణాళికలు సిద్ధమయింది. ఈ ప్రణాళికలను అనుసరించి అమలుకు బాధ్యత భూగర్భజలశాఖకు అప్పగించారు.
వివరాలు
ఎలా అమలు?
భూగర్భజలాలు పెరగడానికి అవసరమయ్యే చెక్ డ్యాంలు, పర్క్యులేషన్ ట్యాంకులు, నీటి కుంటలు ఎక్కడ, ఎంత సంఖ్యలో నిర్మించాలో విషయాలను ఖచ్చితంగా గుర్తించి ప్రణాళిక రూపొందిస్తున్నారు. సమీపంలో ఉన్న జల వనరులు ఏమిటి, వాటిని ఎలా సద్వినియోగం చేయాలో కూడా వివరంగా పరిశీలిస్తున్నారు. ఉపాధి హామీ పథకం నిధులతో పాటు ఇతర పథకాలను కూడా ఈ చర్యలకు ఎలా వినియోగించుకోవచ్చో పరిశీలిస్తున్నారు.
వివరాలు
1.56 మీటర్లు పెరిగిన భూగర్భజలాలు
సెప్టెంబరు 1 నాటికి రాష్ట్రవ్యాప్తంగా సగటున భూగర్భజలాల మట్టం 1.56 మీటర్ల మేర పెరిగినట్లు నమోదు చేశారు. కోస్తాంధ్ర జిల్లాలో సగటున 1.68 మీటర్లు, రాయలసీమ జిల్లాల్లో 1.31 మీటర్లు పెరిగినట్లు గణాంకాలు తెలియజేస్తున్నాయి. ఆగస్టు నెలలో రాష్ట్రంలోని భారీ వర్షపాతం కారణంగా పరిస్థితులు మెరుగుపడ్డాయని స్పష్టం చేశారు. గత సంవత్సరం ఇదే సమయంలో ఉండే నీటి మట్టం తో పోల్చితే సగటున 1.25 మీటర్ల మేర ఎక్కువగా నీరు జమైంది.
వివరాలు
కరవు జిల్లాల్లోనే ఎక్కువ పెరుగుదల
భూగర్భజలాల మట్టం పెరుగుదల కరవు జిల్లాల్లో అత్యధికంగా ఉంది. నంద్యాల జిల్లాలో 2.95 మీటర్లు ప్రకాశం జిల్లాలో 2.78 మీటర్లు వైఎస్సార్ కడప జిల్లాలో 2.11 మీటర్లు పల్నాడు జిల్లాలో 1.17 మీటర్లు పెరిగినట్టు గమనించారు. దీని విరుద్ధంగా, ఏలూరు జిల్లాలో 0.36 మీటర్లు, నెల్లూరు జిల్లాలో 0.15 మీటర్లు నీటి మట్టం తగ్గినట్లు నమోదు చేశారు.