హెచ్3ఎన్2, హెచ్1ఎన్1 వైరస్‌లతో భయాలు వద్దు: ఐసీఎంఆర్
హెచ్3ఎన్2, టైప్ బీ ఇన్‌ప్లూయెంజా, అడెనో, కరోనా లాంటి గాలి ద్వారా సంక్రమించే వైరస్‌లు ఆందోళనకరమైనవి కావని నేషనల్ ఇన్‌ప్లూయెంజా సెంటర్ (ఎన్ఐసీ) పేర్కొంది. ఎన్ఐసీ అనేది పుణెలోని ఇన్‌స్టిట్యూట్ ఆఫ్ వైరాలజీ(ఎన్ఐవీ)లో ఒక భాగం. అలాగే వైరాలజీ పరిశోధనా సంస్థ, ఇండియన్ కౌన్సిల్ ఆఫ్ మెడికల్ రీసెర్చ్ (ఐసీఎంఆర్) ఆధ్వర్యంలో నడుస్తుంది. గత రెండు, మూడు నెలలుగా దేశవ్యాప్తంగా రకరకాల ఫ్లూలతో బాధపడేవారి సంఖ్య గణనీయంగా పెరిగినట్లు డాక్టర్లు చెబుతున్నారు. కొందరికి ఆస్పత్రిలో చేరాల్సిన అవసరం కూడా ఏర్పడింది. ఇదే సమయంలో ఫ్లూల కారణంగా కర్ణాటక, హర్యానాలో ఒకరు చొప్పున మరణించారు.
మాస్కులను ధరించి, సామాజిక దూరం పాటించాలి: ఎన్ఐసీ చీఫ్ వర్షా పోత్దార్
హెచ్3ఎన్2, టైప్ బీ ఇన్‌ప్లూయెంజా, అడెనో వైరస్‌లు సీజనల్‌గా వ్యాప్తి చెందుతాయని ఎన్ఐసీ చీఫ్ వర్షా పోత్దార్ చెప్పారు. ఒక సీజన్‌లో ఒక వైరస్‌తో మరొక వైరస్ సర్క్యులేట్ అవుతుందని చెప్పారు. ఆగస్టు నుంచి అక్టోబరు వరకు హెచ్1ఎన్1 ప్రధానంగా ఉందని, నవంబర్ నుంచి హెచ్3ఎన్2 ఆధిపత్యం ప్రారంభమైందని వర్షా పేర్కొన్నారు. ఇప్పుడు హెచ్3ఎన్2తోపాటు టైప్ బి వైరస్ కూడా వ్యాపిస్తోందని వెల్లడించారు. ప్రపంచ‌వ్యాప్తంగా కూడా ఇదే పరిస్థితి నెలకొన్నదని చెప్పారు. పిల్లలు, వృద్ధులు, దీర్ఘకాలిక వ్యాధులతో బాధపడేవారు చాలా జాగ్రత్తగా ఉండాలని వర్ష వెల్లండించారు. చేతులను శుభ్రంగా కడుక్కోవడం, కరోనా నియమాలను పాటించడం, మాస్కులను ధరించడం, సామాజిక దూరం పాటించడం ద్వారా వైరస్‌ల బారిన పడకుండా ఉండొచ్చని తెలిపారు.
