Andhrapradesh: ఏపీలో 1.58 కోట్ల కుటుంబాలకు ఆరోగ్య భరోసా.. బీ ఆయుష్మాన్ భారత్‌ డిజిటల్‌ మిషన్‌ అమల్లో ఏపీ ముందంజ
ఈ వార్తాకథనం ఏంటి
పేద ప్రజలకు మెరుగైన వైద్యసేవలు అందించడానికి కేంద్ర,రాష్ట్ర ప్రభుత్వాలు ప్రవేశపెట్టిన ఆయుష్మాన్ భారత్‌ ప్రధానమంత్రి జన్‌ ఆరోగ్య యోజన (ఏబీపీఎం-జేఏవై, ఎన్టీఆర్ వైద్యసేవ ఆరోగ్య బీమా పథకాలు అందుబాటులో ఉన్న కుటుంబాల సంఖ్య ఆంధ్రప్రదేశ్‌లో 1.58 కోట్లు అని జాతీయ ఆరోగ్య ప్రాధికార సంస్థ (ఎన్‌హెచ్‌ఏ) వెల్లడించింది. రాష్ట్రంలో ఏబీపీఎం-జేఏవై కింద 78,65,341 కుటుంబాలు, ఎన్టీఆర్ వైద్యసేవ కింద 80,30,658 కుటుంబాలు ఉంటాయని నివేదిక తెలిపింది. భోపాల్‌లో నిర్వహించిన ఏబీడీఎం (ఆయుష్మాన్ భారత్‌ డిజిటల్‌ మిషన్‌) జాతీయ సమీక్ష 2024-25 వార్షిక నివేదికను గురువారం విడుదల చేసింది. ఈ నివేదికలో ఆరోగ్యరంగ అభివృద్ధి, క్లెయింల నిర్వహణ, లబ్ధిదారుల కవరేజీ, డైనమిక్‌ ఎంపానల్‌మెంట్ మరియు పోర్టబులిటీలో వచ్చిన పురోగతి వివరించబడింది.
వివరాలు
ట్రస్ట్ మోడల్‌ను ఎంచుకుని పథకాన్ని అమలు చేసిన రాష్ట్రం ఆంధ్రప్రదేశ్‌
పథకం అమలులో ఆంధ్రప్రదేశ్‌ ప్రత్యేక ముందంజ: దేశవ్యాప్తంగా ఏబీపీఎం-జేఏవై పథకాన్ని రాష్ట్రాలు తమ సౌకర్యం, సామర్థ్యాన్ని దృష్టిలో ఉంచుకొని స్వయంగా అమలు చేసుకునే అవకాశాన్ని కేంద్రం ఇచ్చింది. రాష్ట్రాల సన్నద్ధత ఆధారంగా ట్రస్ట్ ఇన్సూరెన్స్, హైబ్రిడ్ మోడల్‌లలో పథకాన్ని అమలు చేసే అవకాశం ఉంది. 2025 మార్చి 1 నాటికి 25 రాష్ట్రాలు/కేంద్ర పాలిత ప్రాంతాల్లో ఈ విధానం అమలు అవుతుండగా, అత్యధికంగా ట్రస్ట్ మోడల్‌ను ఎంచుకుని పథకాన్ని అమలు చేసిన రాష్ట్రం ఆంధ్రప్రదేశ్‌ అని నివేదిక పేర్కొంది.
వివరాలు
బీ ఆయుష్మాన్ భారత్‌ డిజిటల్‌ మిషన్‌లో ఆంధ్రప్రదేశ్‌ ముందంజ
ఏపీలో ఏబీపీఎం-జేఏవై లబ్ధిదారులలో 55% పురుషులు, 45% మహిళలు ఉన్నారు. ప్రభుత్వ ఆసుపత్రుల పరిమాణంపై కూడా గణనీయమైన పురోగతి ఉంది. రాష్ట్రంలో 2018-19లో లక్ష జనాభాకు 99 పడకలు, 2024-25కి 433 పడకలకు పెరిగినట్లు నివేదికలో పేర్కొంది. బీ ఆయుష్మాన్ భారత్‌ డిజిటల్‌ మిషన్‌లో ఆంధ్రప్రదేశ్‌ ముందంజలో ఉందని ఎన్‌హెచ్‌ఏ వివరించింది. నేషనల్‌ డిజిటల్‌ హెల్త్‌ మిషన్‌ కింద ఆరోగ్య వృత్తి నిపుణులు, ఆరోగ్య సదుపాయాల డిజిటల్‌ నమోదులో 92% పురోగతి సాధించబడినట్లు వెల్లడించింది.